ନାବାଳକଙ୍କ ଉପରେ ମାଡ଼ିଗଲା କାର, ସିସିଟିଭିରେ କଏଦ ହେଲା ଛାତିଥରା ଦୃଶ୍ୟ
![ETV Bharat Odisha Team](https://etvbharatimages.akamaized.net/etvbharat/prod-images/authors/odisha-1716536003.jpeg?imwidth=128)
Published : Sep 10, 2023, 10:50 PM IST
![ETV Thumbnail thumbnail](https://etvbharatimages.akamaized.net/etvbharat/prod-images/10-09-2023/640-480-19480140-thumbnail-16x9-gjk.jpg)
ଥିରୁଅନନ୍ତପୁରମ୍: ନାବାଳକଙ୍କ ଉପରେ ମାଡ଼ିଗଲା କାର । ପୂର୍ବ ଶତ୍ରୁତାକୁ କେନ୍ଦ୍ର କରି ନାବାଳକଙ୍କ ସମ୍ପର୍କୀୟ ଏଭଳି କାଣ୍ଡ ଘଟାଇଛନ୍ତି । ଏହି ଦୁର୍ଘଟଣାରେ ନାବାଳକଙ୍କ ମୃତ୍ୟୁ ହୋଇଥିବା ବେଳେ ଏହାର ଦୃଶ୍ଯ ସିସିଟିଭି କ୍ୟାମେରାରେ କଏଦ ହୋଇଛି । କେରଳର ଥିରୁଅନନ୍ତପୁରମ୍ରୁ ଏଭଳି ଘଟଣା ସାମ୍ନାକୁ ଆସିଛି । ଭିଡ଼ିଓରେ ଦେଖିବାକୁ ମିଳିଛି ଯେ, ଦୁଇ ଜଣ ନାବାଳକ ରାସ୍ତାରେ ଠିଆ ହୋଇଥିବା ସମୟରେ ଏକ କାର ଆସି ଜଣେ ନାବାଳକଙ୍କ ଉପରେ ଚଢ଼ିଯାଇଥିଲା । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା । ଏହି ଘଟଣାଟି ଅଗଷ୍ଟ ୩୦ ତାରିଖର ହୋଇଥିବା ପୋଲିସ ସୂଚନା ଦେଇଛି । ପୋଲିସ କହିଛି ଯେ, ଏହି ଘଟଣାକୁ ନେଇ ଥାନାରେ ଏକ ମାମଲା ରୁଜୁ ହୋଇଥିଲା । ନାବାଳଙ୍କ ଶେଷକୃତ୍ୟ ପରେ ପୋଲିସର ଯାଞ୍ଚ ସମୟରେ ନାବାଳକଙ୍କ କିଛି ସମ୍ପର୍କୀୟଙ୍କୁ ନେଇ ସନ୍ଦେହ ସୃଷ୍ଟି ହୋଇଥିଲା । ଦୁର୍ଘଟଣା ଘଟାଇଥିବା ବ୍ୟକ୍ତି ଜଣକ ସେଠାରୁ ଫେରାର ଥିବାରୁ ପୋଲିସ ତାଙ୍କ ଉପରେ ସନ୍ଦେହ କରିଥିଲା । ରବିବାର ପୋଲିସ ଉକ୍ତ ସ୍ଥାନର ସିସିଟିଭି ଫୁଟେଜ ଯାଞ୍ଚ କରିବା ପରେ ଘଟଣାର ସତ୍ୟତା ସାମ୍ନାକୁ ଆସିଥିଲା । ପୂର୍ବ ଶତ୍ରୁତାକୁ କେନ୍ଦ୍ର କରି ନାବାଳକଙ୍କୁ ହତ୍ୟା କରାଯାଇଥିବା ପୋଲିସ ସୂଚନା ଦେଇଛି ।