କଂଗ୍ରେସ ବିରୋଧରେ ଆଇନର ଦ୍ବାରସ୍ଥ ହେବେ ମନ୍ମଥ

ଭୁବନେଶ୍ବର: କଂଗ୍ରେସ ବିଧାୟକ ସୁର ରାଉତରାୟଙ୍କ ପରିବାର ମଧ୍ୟରେ ଦଳୀୟ କଳି ଦିନକୁ ଦିନ ବଢ଼ିବାରେ ଲାଗିଛି । ପୁଅ ଅଲବତ କଂଗ୍ରେସ ଟିକେଟ୍‌ରେ ଜଟଣୀରୁ ଲଢ଼ିବ ବୋଲି ସୁର ରାଉତରାୟ ପ୍ରତିଦିନ ଦୃଢ଼ୋକ୍ତି ବାଢ଼ୁଛନ୍ତି । ସେପଟେ କିନ୍ତୁ ପୁଅ ମନ୍ମଥ ଦିନକୁ ଦିନ କଂଗ୍ରେସ ପ୍ରତି କଡ଼ା ଆଭିମୁଖ୍ୟ ରଖୁଛନ୍ତି । କଂଗ୍ରେସ ଟିକେଟ୍‌ରୁ ନିର୍ବାଚନ ଲଢ଼ିବେ ନାହିଁ ବୋଲି ସେ ସ୍ପଷ୍ଟ କରିବା ପରଠାରୁ ଆରମ୍ଭ ହୋଇଛି ବିବାଦ । ଏହାପରେ କଂଗ୍ରେସ ଦଳ ପକ୍ଷରୁ ତାଙ୍କୁ ଦଳରୁ ନିଲମ୍ବିତ କରାଯାଇଥିବା ନେଇ ଏକ ବିଜ୍ଞପ୍ତି ପ୍ରକାଶ ପାଇବା ପରେ ସେ ଦଳର ସଦସ୍ୟ ହିଁ ନଥିଲେ, ନିଲମ୍ବିତ କିପରି ହେଲେ ବୋଲି ପ୍ରଶ୍ନ କରିଥିଲେ ମନ୍ମଥ । ଏହାରି ମଧ୍ୟରେ ଆଜି ପୁଣିଥରେ ସୁର କହିଛନ୍ତି ନିର୍ବାଚନ ପୂର୍ବରୁ ନିଲମ୍ବନ ଉଠିବ ଓ ପୁଅ କଂଗ୍ରେସ ଟିକେଟ୍‌ରୁ ନିର୍ବାଚନ ଲଢ଼ିବ । ସେପଟେ ଏନେଇ ମନ୍ମଥଙ୍କୁ ପଚାରିବାରୁ ସେ କହିଛନ୍ତି, "ମୁଁ ଏନେଇ କୌଣସି ଚିନ୍ତା କରିନାହିଁ । ହେଲେ କଂଗ୍ରେସ ଦଳ ବିରୋଧରେ ଆଇନଗତ ପଦକ୍ଷେପ ନେବାକୁ ଚିନ୍ତା କରିଛି । ମୋ ବିନା ଅନୁମତିରେ ସେ କିପରି ମୋତେ ପିସିସି ସଦସ୍ୟ କରାଇଥିଲେ ଓ କିପରି ନିଲମ୍ବନ କଲେ, ସେନେଇ ମୁଁ ମୋ ଲିଗାଲ ଟିମ୍‌ ସହ ଆଲୋଚନା ପରେ ପଦକ୍ଷେପ ନେବି ।" ଶୁଣନ୍ତୁ ଇଟିଭି ଭାରତକୁ ପ୍ରତିକ୍ରିୟା ଦେଇ ଆଉ କଣ କହିଛନ୍ତି ମନ୍ମଥ ରାଉତରାୟ...

ଇଟିଭି ଭାରତ, ଭୁବନେଶ୍ବର