ବାଡ଼ିରୁ ମକା ଚୋରି କରିବାରୁ ୧୦ ଶ୍ରମିକଙ୍କୁ ନିର୍ଦ୍ଧୁମ ଛେଚିଲେ ଗ୍ରାମବାସୀ

ନବରଙ୍ଗପୁର: ବାଡ଼ିରୁ ମକା ଖାଇଲେ ବୋଲି ନିସ୍ତୁକ ମାଡ଼ ମାରିଲେ ଗ୍ରାମବାସୀ । ସଂଘବଦ୍ଧ ଭାବେ ଆକ୍ରମଣ କରି ଲହୁ ଲୁହାଣ କରି ପକାଇଲେ । ନବରଙ୍ଗପୁର ଜିଲ୍ଲା ଉମକୋଟରେ ଏଭଳି ଘଟଣା ଦେଖିବାକୁ ମିଳିଛି । ଉମରକୋଟ ସହରରେ ଥିବା ବିଜୁ ପଟ୍ଟନାୟକ ଷ୍ଟାଡିୟମଠାରେ ଉନ୍ନୟନ କାମ ଚାଲିଛି । ଷ୍ଟାଡିୟମରେ ବାହାର ଅଞ୍ଚଳର କିଛି ଶ୍ରମିକ ଏଠାରେ ରହି କାମ କରୁଛନ୍ତି । ଉକ୍ତ ଶ୍ରମିକ ମାନେ କିଛି ଦିନ ହେବ ଷ୍ଟାଡିୟମ ନିକଟସ୍ଥ ମକା ବାଡ଼ିରୁ ଚୋରି କରି ଖାଉଥିଲେ । ଗ୍ରାମବାସୀ ଏନେଇ ଜାଣିବା ପରେ ରାତିରେ ସେମାନଙ୍କୁ ଧରିବା ପାଇଁ ଜଗିଥିଲେ । ଷ୍ଟାଡିୟମରେ କାର୍ଯ୍ୟରତ ୧୦ ଜଣ ଶ୍ରମିକ ମକା ବାଡ଼ି ଭିତରେ ପ୍ରବେଶ ବେଳେ ଗ୍ରାମବାସୀଙ୍କ ହାବୁଡ଼ରେ ପଡ଼ିଥିଲେ । ଏହାପରେ ସେମାନଙ୍କୁ ଠେଙ୍ଗା, ବାଡ଼ିରେ ନିର୍ଦ୍ଧୁମ ମାଡ଼ ମାରିଛନ୍ତି । ଏହାର ଭିଡ଼ିଓ ଉତ୍ତୋଳନ କରି ସୋସିଆଲ ମିଡ଼ିଆରେ ଭାଇରାଲ କରିଛନ୍ତି । ତେବେ ଘଟଣା ନେଇ ଥାନାରେ କୌଣସି ଅଭିଯୋଗ ହୋଇ ନଥିବା ଜଣାପଡ଼ିଛି ।

ଇଟିଭି ଭାରତ, ନବରଙ୍ଗପୁର