ବାହାନଗା ଟ୍ରେନ ଟ୍ରାଜେଡି: ବ୍ୟବସାୟ ଲାଗି କୋଲକାତା ଯାଉଥିଲେ, ମୃତଦେହ ହୋଇ ଫେରିଲେ

ଯାଜପୁର: ପ୍ରତ୍ୟେକ ଦିନ ପରି ସେଦିନ ମଧ୍ୟ କୋଲକାତାକୁ ବେପାର କରିବାକୁ ଯାଇଥିଲେ । ହେଲେ କିଏ ଯାଉଥିଲା ସେ ଆଉ ଘରକୁ ଫେରିବେନି ବୋଲି । ପ୍ରତି ମାସରେ ଅନେକ ବାର କୋଲକାତା ଯାଇ ବିଭିନ୍ନ ଜିନିଷ କିଣି ଯାଜପୁର ରୋଡ ବଜାରରେ ବିକ୍ରି କରି ନିଜ ପରିବାର ଚଳାନ୍ତି l ମାତ୍ର ଗତକାଲିର ଟ୍ରେନ ଦୁର୍ଘଟଣା ତାଙ୍କ ପାଇଁ ପାଲଟିଗଲା ଶେଷ ଯାତ୍ରା l ବାଲେଶ୍ଵର ଜିଲ୍ଲା ବାହାନଗା ରେଳ ଷ୍ଟେସନ ନିକଟରେ ଗତକାଲି ସନ୍ଧ୍ୟାରେ ହୋଇଥିବା ଭୟଙ୍କର ଟ୍ରେନ ଦୁର୍ଘଟଣାରେ ଯାଜପୁର ଜିଲ୍ଲା ଦାନଗଦୀ ବ୍ଲକ ରାଛିପୁର ଗ୍ରାମର ଶିବ ପ୍ରସାଦ ସାହୁଙ୍କର ମୃତ୍ୟୁ ଘଟିଛି । ଶିବ ପ୍ରସାଦ ଜେନେରାଲ କମ୍ପାର୍ଟମେଣ୍ଟରେ ରହିଥିବା ବେଳେ ଏହି ଟ୍ରେନର ରିଜର୍ଭେସନ କମ୍ପାର୍ଟମେଣ୍ଟରେ ଥିବା ଉକ୍ତ ଗ୍ରାମର କୁଳମଣି ସାହୁ ନାମକ ଅନ୍ୟ ଜଣେ ବ୍ୟକ୍ତି ସୌଭାଗ୍ୟ କ୍ରମେ ନିଜ ଜୀବନ ବଞ୍ଚାଇ ଘରକୁ ଫେରିପାରିଛନ୍ତି । ସେ ସମ୍ପୂର୍ଣ୍ଣ ସୁସ୍ଥ ଥିବା ଜଣାପଡିଛି । ସେପଟେ ଶିବପ୍ରସାଦଙ୍କ ଗାଁ ମାଟିରେ ପହଞ୍ଚିଛି । ଯାହାକୁ ନେଇ ସାରା ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି । ଖବର ପାଇ ରାଜ୍ୟ ଗ୍ରାମ୍ୟ ଉନ୍ନୟନ ଓ ଦକ୍ଷତା ବିକାଶ ମନ୍ତ୍ରୀ ତଥା ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡାଇ ରାଛିପୁର ଗାଁରେ ପହଞ୍ଚି ମୃତ ଶିବ ପ୍ରସାଦଙ୍କ ପରିବାରକୁ ଭେଟି ଶାନ୍ତ୍ୱନା ଓ ସମବେଦନା ଜଣାଇଛନ୍ତି । ଏଥିସହ କୁଳମଣିଙ୍କ ଘରକୁ ଯାଇ ତାଙ୍କୁ ଭେଟିଛନ୍ତି ଓ ପ୍ରତ୍ୟେକ୍ଷ ଭାବେ ଘଟଣା ସମ୍ପର୍କରେ ଅବଗତ ହୋଇଛନ୍ତି ।

ଇଟିିଭି ଭାରତ, ଯାଜପୁର