ବାଲେଶ୍ୱରରେ କାଳ ବୈଶାଖୀର ତାଣ୍ଡବ: ଗଛ ଭାଙ୍ଗିଲା, ଛପର ଉଡ଼ାଇ ନେଲା

ବାଲେଶ୍ବର: ସୋର ଓ ଖଇରା ଅଞ୍ଚଳରେ କାଳବୈଶାଖୀର ତାଣ୍ଡବ ଆଜି ଦେଖିବାକୁ ମିଳିଛି । କେଉଁଠି ଗଛ ଭାଙ୍ଗି ରାସ୍ତା ଅବରୋଧ ହୋଇଛି ତ କେଉଁଠି ଲୋକେ ଗୁରୁତର ହୋଇଥିବା ଭଳି ଘଟଣା ସାମ୍ନାକୁ ଆସିଛି । ଓଡି଼ଶାକୁ ଗୋଟିଏ ପରେ ଗୋଟିଏ ଦୁର୍ଘଟଣା ସାମ୍ନା କରିବାକୁ ପଡୁଥିବାବେଳେ ପ୍ରକୃତି ମଧ୍ୟ ଦାଉ ସାଧିଛି । ଖଇରା ଅଞ୍ଚଳରେ କାଳବୈଶାଖୀ ଯୋଗୁଁ ବ୍ୟାପକ କ୍ଷୟକ୍ଷତି ହୋଇଛି । ଖଇରା ବ୍ଲକର ତ୍ରିଲୋଚନପୁର ଗ୍ରାମରେ କାଳବୈଶାଖୀ ଯୋଗୁଁ ଅନେକ ଗଛ ଉପୁଡ଼ି ପଡ଼ି ରାସ୍ତା ଉପରେ ପଡ଼ିଛି  । ଲୋକଙ୍କ ଘର ଆଜବେଷ୍ଟସ ଭାଙ୍ଗିଥିବା ବେଳେ ଲୋକଙ୍କ ଉପରେ ବି ଗଛ ପଡ଼ିଛି  । ଜଣେ ଗୁରୁତର ଆହତ ହେବାରୁ ତାଙ୍କୁ ଖଇରା ମେଡିକାଲରେ ଭର୍ତ୍ତି କରାଯାଇଛି ।

ସାରଡାଙ୍ଗ ପଞ୍ଚାୟତରେ ବି କାଳବୈଶାଖୀର ପ୍ରଭାବ ଦେଖିବାକୁ ମିଳିଛି । ଅନେକ ଲୋକ କ୍ଷତିଗ୍ରସ୍ତ ହୋଇଛନ୍ତି । କାହାର ଛପର ଉଡ଼ି ଯାଇଥିବା ବେଳେ କିଏ ଘର ନିର୍ମାଣ ପାଇଁ ବ୍ୟବହୃତ ସାମଗ୍ରୀକୁ ଉଡ଼ାଇ ନେଇଛି ।  ସେହିପରି ସୋରରେ ଓ ସରଶଙ୍ଖ ବଜାରରେ ବି କାଳବୈଶାଖୀ ତାଣ୍ଡବ ରଚିଛି । ଗଛ ପଡ଼ିବାରୁ ଯାତାୟତ ବାଧାପ୍ରାପ୍ତ ହୋଇଛି । ବାଲେଶ୍ଵର ସାଂସଦ ପ୍ରତାପ ଷଡ଼ଙ୍ଗୀ ଏହି ସବୁ ଅଞ୍ଚଳ ପରିଦର୍ଶନ କରିଛନ୍ତି।

ଇଟିଭି ଭାରତ, ବାଲେଶ୍ବର