ହାତୀ ସୁରକ୍ଷାରେ ଥିବା ବନ କର୍ମଚାରୀଙ୍କ ବଣଭୋଜି ମଜା, ଭିଡିଓ ଭାଇରାଲ

ନବରଙ୍ଗପୁର: ବନ କର୍ମଚାରୀଙ୍କ ପାଟ୍ରୋଲିଂ କରିବା ବାହାନାରେ ବଣଭୋଜି । ଭାଇରାଲ ହେଉଛି ଭିଡିଓ । ରୋଷେଇ କରି ଏକାଠି ବସି ଖାଉଛନ୍ତି ବନ କର୍ମଚାରୀ ।  ଭିଡିଓ ଭାଇରଲ୍ ହେବା ପରେ ନବରଙ୍ଗପୁର ଡିଏଫଓ କାରଣ ଦର୍ଶାଅ ନୋଟିସ୍‌ ଜାରି କରିଛନ୍ତି । ଏଭଳି ଘଟଣା ଘଟିଛି ନବରଙ୍ଗପୁର ଜିଲ୍ଲା ରାଇଘର ବନାଞ୍ଚଳ ଅନ୍ତର୍ଗତ କୁନ୍ଦେଇ ବନପାଳଙ୍କ କ୍ଷେତ୍ରରେ । ହାତୀପଲର ସୁରକ୍ଷା କରିବା ଉଦ୍ଦେଶ୍ୟରେ ଫୁଟ୍ ପେଟ୍ରୋଲିଂ କରିବାକୁ ହାତିଗାଁ ସଂରକ୍ଷିତ ଜଙ୍ଗଲକୁ ଯାଇଥିଲେ l ଏହି ଅବସରରେ କୁନ୍ଦେଇ ବନପାଳଙ୍କ ସମେତ ବନରକ୍ଷୀ, ପାରା କର୍ମଚାରୀ, ଆଣ୍ଟି ସ୍ମଗଲିଂ ସ୍କ୍ବାର୍ଡ୍, ୱାଇଲଡ ଲାଇଫ୍ ପ୍ରୋଟେକସାନ୍ କର୍ମଚାରୀ ପ୍ରମୁଖ ଜଙ୍ଗଲକୁ ଯାଇ ପେଟ୍ରୋଲିଂ କରିବା ବଦଳରେ ଏକ ବଣ ଭୋଜିର ଆୟୋଜନ କରି ମଉଜ କରୁଥିବା କିଛି ଫୋଟ ଓ ଭିଡିଓ ପୋଷ୍ଟ୍‌ କରିଥିଲେ । ଏହି ଫୋଟ ଆଉ ଭିଡିଓ ଏବେ ଭାଇରଲ୍ ହେବାରେ ଲାଗିଛି l ଅପରପକ୍ଷରେ ବର୍ତ୍ତମାନ ଛତିଶଗଡ଼ ହାତୀପଲର ଗତିବିଧି ଓଡ଼ିଶା ସୀମାନ୍ତ କିମ୍ବା ହାତିଗାଁ ସଂରକ୍ଷିତ ଜଙ୍ଗଲ ଠାରେ ନଥିବା ବେଳେ ଏହିି ବନ କର୍ମଚାରୀଙ୍କ ବଣଭୋଜିର ଭିଡିଓ ଭାଇରଲ୍ ହେବା ବନ ବିଭାଗ ପାଇଁ ଅଡୁଆ ସୃଷ୍ଟି କରିଛି । ନବରଙ୍ଗପୁର ଡିଏଫଓ ଏହି ଫଟୋ ଓ ଭିଡିଓକୁ ନେଇ ଖପ୍ପା ହୋଇ ସମସ୍ତ ଘଟଣାର କାରଣ ଦର୍ଶାଇବାକୁ ନିର୍ଦ୍ଦେଶ ଦେଇଥିବା ଜଣାପଡିଛି ।

ଇଟିଭି ଭାରତ, ନବରଙ୍ଗପୁର