WATCH VIDEO: ସନ୍ତାନ ଜନ୍ମ ପରେ ମାଆ ହାତୀର ରାସ୍ତା ଅବରୋଧ, ଯାତାୟାତ ପ୍ରଭାବିତ

ଥିରୁଅନନ୍ତପୁରମ: ରାସ୍ତା ଉପରେ ଛୁଆ ଜନ୍ମ ଦେଲା ମାଆ ହାତୀ । କେରଳ କନ୍ନୁର ଜିଲ୍ଲା ସ୍ଥିତ ଅରାଲାମା ଅଞ୍ଚଳରେ ଏକ ବଣୁଆ ହାତୀ ଛୁଆ ଜନ୍ମ କରୁଥିବାର ଦେଖିବାକୁ ମିଳିଛି । ଗତକାଲି ରାତିରେ ଏହି ଘଟଣା ଘଟିଛି । ଯାହାକୁ ଜଣେ ସ୍ଥାନୀୟ ବାସିନ୍ଦା ନିଜ ମୋବାଇଲରେ କଏଦ କରିଛନ୍ତି । ରାସ୍ତା ଉପରେ ଶିଶୁଙ୍କୁ ଜନ୍ମ ଦେବା ପରେ ଉକ୍ତ ରାସ୍ତାକୁ ମାଆ ହାତୀ ଅବରୋଧ ମଧ୍ୟ କରିଥିଲା । ନବଜାତଙ୍କ ସୁରକ୍ଷା ଲାଗି ମାଆ ହାତୀଟି ଏପରି କରିଥିଲା । ଫଳରେ ସେହି ରାସ୍ତା ଦେଇ ଯାତାୟାତ ପ୍ରଭାବିତ ହୋଇଥିଲା । ଏହି ଅଞ୍ଚଳରେ ପ୍ରାୟ ୫୦ରୁ ଅଧିକ ବଣୁଆ ହାତୀ ରହୁଥିବା ନେଇ କହିଛନ୍ତି ସ୍ଥାନୀୟ ଲୋକେ । କିଝପଲ୍ଲୀ-ପଲପୁଝା ରାସ୍ତାଟି ବହୁ ସମୟ ଧରି ବନ୍ଦ ରହିଥିଲା । କାରଣ ସେହି ସ୍ଥଳରେ ମାଆ ହାତୀ ନବଜାତ ସହିତ ରହିଥିଲା । ଏନେଇ ବନ ବିଭାଗ ଖବର ପାଇବା ପରେ ଉକ୍ତ ସ୍ଥାନରେ ପହଞ୍ଚିଥିଲା । ସେମାନଙ୍କୁ କୌଶଳ କ୍ରମେ ରାସ୍ତାରୁ ହଟାଯାଇଥିବା ବେଳେ ମାଆ ଓ ଛୁଆ ହାତୀ ସୁସ୍ଥ ଥିବା ଜଣାପଡ଼ିଛି । ରାସ୍ତାରୁ ହାତୀ ହଟିବା ପରେ ଯାତାୟାତ ପୁନଃ ସ୍ବାଭାବିକ ହୋଇଛି ।