ଶହୀଦ ଯବାନ ଦେବାଶିଷଙ୍କ ଏକାଦଶାହ, ଦୀପ ଦାନ କଲା ପୂର୍ବତନ ସୈନିକ ସଂଘ

ପୁରୀ: ଜମ୍ମୁକାଶ୍ମୀରର ପୁଞ୍ଚରେ ଗତ 20 ତାରିଖରେ ଆତଙ୍କବାଦୀଙ୍କ ଆକ୍ରମଣରେ 5 ଜଣ ଯବାନ ଶହୀଦ ହୋଇଥିଲେ । ସେଥିମଧ୍ୟରୁ ଓଡ଼ିଆ ଯବାନ ତଥା ପୁରୀ ସତ୍ୟବାଦୀ ଖଣ୍ଡାୟତ ସାହିର ବାସିନ୍ଦା ଦେବାଶିଷ ବିଶ୍ଵାଳ ମଧ୍ୟ ଶହୀଦ ହୋଇଥିଲେ । ଆଜି ତାଙ୍କ ଏକାଦଶାହ ଅବସରରେ ପୁରୀ ଜିଲ୍ଲା ପୂର୍ବତନ ସୈନିକ ସଂଘ ପକ୍ଷରୁ 5 ଶହୀଦ ଯବାନଙ୍କ ଅମର ଆତ୍ମାର ସଦଗତି ପାଇଁ ଶ୍ରୀଗୁଣ୍ଡିଚା ମନ୍ଦିର ସମ୍ମୁଖରେ ଦୀପଦାନ କରାଯାଇଛି । ମହାପ୍ରଭୁ ଶହୀଦଙ୍କ ଆତ୍ମାକୁ ସଦଗତି ଦିଅନ୍ତୁ ବୋଲି ପ୍ରାର୍ଥନା କରାଯାଇଛି । ଏଭଳି ବିପଦ ସମୟରେ ଶହୀଦ ଦେବାଶିଷ ବିଶ୍ଵାଳଙ୍କ ପରିବାରକୁ ପ୍ରଭୁ ଶ୍ରୀଜଗନ୍ନାଥ ସାହସ, ଧୈର୍ଯ୍ୟ ଓ ଶକ୍ତି ଦେବାକୁ ପ୍ରାର୍ଥନା କରାଯାଇଛି । ସେହିପରି ଆତଙ୍କବାଦୀଙ୍କ ଏଭଳି ହୀନ କାର୍ଯ୍ୟକୁ ପୂର୍ବତନ ସୈନିକମାନେ ନିନ୍ଦା କରିଛନ୍ତି । ଭାରତ ମାତାର ସୁରକ୍ଷା ପାଇଁ ନିଜ ଜୀବନକୁ ତ୍ୟାଗ କରି ଯବାନମାନେ ଦେଶକୁ ରକ୍ଷା କରିବେ ବୋଲି ପୁରୀ ଜିଲ୍ଲା ପୁର୍ବତନ ସୈନିକ ସଂଘ ପକ୍ଷରୁ କୁହାଯାଇଛି ।

ଇଟିଭି ଭାରତ, ପୁରୀ