ସିଏମସିରେ କ୍ରାଇମବ୍ରାଞ୍ଚ ଟିମ ,ଜାଲ ଦସ୍ତଖତ ଓ ସିଲ ବ୍ୟବହାର କରି କୋଟି କୋଟି ଟଙ୍କ ହଡ଼ପ !

କଟକ: ସିଏମସିରେ କୋଟି କୋଟି ଟଙ୍କାର ଦୁର୍ନୀତିର ଛିଟା । ପୂର୍ବତନ ସିଏମସି କମିଶନରଙ୍କ ଜାଲ ଦସ୍ତଖତ ଓ ସିଲ ବ୍ୟବହାର କରି ହଡ଼ପ ହୋଇଛି କୋଟି କୋଟି ଟଙ୍କାର ମୂଲ୍ୟବାନ ସମ୍ପତି । ଏଥିରେ କିଛି ସିଏମସି ଅଧିକାରୀଙ୍କ ସମ୍ପୃକ୍ତି ରହିଥିବା ଚର୍ଚ୍ଚାର ହେଉଛି । ଏନେଇ କ୍ରାଇମବ୍ରାଞ୍ଚର ଏକ ସ୍ୱତନ୍ତ୍ର ଟିମ ଗତକାଲି ଅପରାହ୍ନରେ ସିଏମସି କାର୍ଯ୍ୟାଳୟରେ ଖୋଳତାଡ଼ ଆରମ୍ଭ କରିଥିଲା । ପ୍ରଥମେ 'ଲ' ବିଭାଗରେ ପହଁଞ୍ଚି ପୂର୍ବତନ କମିଶନର ଅନନ୍ୟା ଦାସଙ୍କ ଦସ୍ତଖତକୁ ଯାଞ୍ଚ କରିଥଲା କ୍ରାଇମବ୍ରାଞ୍ଚ । ଏଥିସହ ସିଏମସିର କିଛି ବରିଷ୍ଠ ଅଧିକାରୀଙ୍କୁ ମଧ୍ୟ ଘଟଣା ସମ୍ପର୍କରେ ପଚରାଉଚରା କରିଥିଲା କ୍ରାଇମବ୍ରାଞ୍ଚ ଟିମ । ତେବେ କ୍ରାଇମବ୍ରାଞ୍ଚର ଖୋଳତାଡ଼କୁ ନେଇ ପ୍ରତିକ୍ରିୟା ରଖିଛନ୍ତି ମେୟର ସୁବାସ ସିଂ ।

ସେ କହିଛନ୍ତି," ଏହି ଘଟଣା ସମ୍ପର୍କରେ ତାଙ୍କ ପାଖରେ କୌଣସି ସୂଚନା କିମ୍ବା ତଥ୍ୟ ନାହିଁ। ଏଥିସହ କ୍ରାଇମବ୍ରାଞ୍ଚ ଟିମ ମଧ୍ୟ ତଦନ୍ତ ବା ଯାଞ୍ଚ ନେଇ କୌଣସି ଆଲୋଚନା କରି ନାହାନ୍ତି । ପୂର୍ବତନ କମିଶନରଙ୍କ ସମୟରେ କିଛି ଜମି ଜାଲିଆତି ହୋଇଥିବା ନେଇ କ୍ରାଇମବ୍ରାଞ୍ଚ ପାଖରେ ଅଭିଯୋଗ ହୋଇଛି । ତେଣୁ ଏଥିରେ ଯଦି କାହାର ସମ୍ପୃକ୍ତି ଥିବ ତେବେ ଆଇନ ଅନୁଯାୟୀ କାର୍ଯ୍ୟନୁଷ୍ଠାନ ନିଆଯିବ ।" ଅନ୍ୟପଟେ ମହାନଗର ନିଗମର ବିଭିନ୍ନ ବିଭାଗର ଅଧିକାରୀଙ୍କ ସହ ଆଲୋଚନା ପରେ ଅନେକ ତଥ୍ୟ କ୍ରାଇମବ୍ରାଞ୍ଚର ହସ୍ତଗତ ହୋଇଥିବା ଜଣାପଡିଛି। 

ଇଟିଭି ଭାରତ, କଟକ