ପୁଅ ପାଇଁ କାର୍ ବନେଟରେ ଚଢିଗଲେ ମହିଳା; ୫୦ ମିଟର ଘୋଷାଡି ନେଲା ପୋଲିସ୍

ଭୋପାଳ: ପୋଲିସଠାରୁ ପୁଅକୁ ଛଡାଇବା ପାଇଁ ଚଳନ୍ତା କାର୍‌ର ବନେଟ ଉପରେ ଚଢିଗଲେ ମହିଳା । ୫୦ ମିଟର ଯାଏଁ ମହିଳାଙ୍କୁ ଘୋଷାଡି ନେଲା ପୋଲିସ  । ବର୍ତ୍ତମାନ ସୋସିଆଲ ମିଡିଆରେ ଏହାର ଭିଡିଓ ଭାଇରାଲ ହେଉଛି  । ଏଥିରେ ଦେଖାଯାଉଛି ଯେ, ଜଣେ ମହିଳା କାର୍ ବନେଟ୍ ଉପରେ ଝୁଲନ୍ତା ଅବସ୍ଥାରେ ରହିଛନ୍ତି ଏବଂ ଗାଡିଟି ଚାଲିଛି । ଭିଡିଓଟି ମଧ୍ୟପ୍ରଦେଶ ନରସିଂହପୁର ନୟାବଜାର ଅଞ୍ଚଳର । ତେବେ ଘଟଣାର ଖୋଳତାଡ ପରେ ଜଣାପଡିଛି ଯେ, ପୋଲିସ ଗତ ସୋମବାର ଦିନ ଡ୍ରଗ୍ସ ଚାଲାଣ ମାମଲାରେ ଦୁଇ ଅଭିଯୁକ୍ତଙ୍କୁ କାବୁ କରି ଥାନାକୁ ନେଉଥିଲା । ଏତିକି ବେଳେ ଜଣେ ଅଭିଯୁକ୍ତ ଚିତ୍କାର କରିବାକୁ ତା'ର ମାଆ ସେଠାକୁ ଦୌଡି ଆସିଥିଲେ ଓ ପୋଲିସ ଗାଡ଼ି ବନେଟ ଉପରେ ଚଢି ଯାଇଥିଲେ  ।

ତେବେ ଅଭିଯୁକ୍ତ ଯେମିତି ଖସି ପଳାଇ ନଯାଏ ସେଥିପାଇଁ ପୋଲିସ କମ୍ ସ୍ପିଡରେ ଗାଡି ଚଳାଇ ଥାନାରେ ପହଞ୍ଚିଥିଲେ  । ମହିଳା ମଧ୍ୟ ସେମିତି ବନେଟ୍ ଉପରେ ଝୁଲି ରହିଥିଲେ  । ଏହି ସମୟରେ କେହି ଜଣେ ପୁରା ଘଟଣାର ଭିଡିଓ ଉତ୍ତୋଳନ କରି ସୋସିଆଲ ମିଡିଆରେ ପୋଷ୍ଟ କରିଥିଲେ  । ଯାହା ଖୁବ୍ କମ୍ ସମୟ ମଧ୍ୟରେ ଭାଇରାଲ ହୋଇଯାଇଛି । ଏହି ଘଟଣା ସାମ୍ନାକୁ ଆସିବା ପରେ ଏସପି କାର୍‌ରେ ବସିଥିବା ଦୁଇ ଜଣ ଏସ୍ଆଇ ଓ ଜଣେ କନେଷ୍ଟବଳଙ୍କୁ ନିଲମ୍ବିତ କରିଛନ୍ତି  ।  

ବ୍ୟୁରୋ ରିପୋର୍ଟ, ଇଟିଭି ଭାରତ