'ତେଲେଙ୍ଗାନା ଲୋକଙ୍କ ହୃଦୟରେ ଗାନ୍ଧୀ ପରିବାର', ସ୍ପଷ୍ଟ ବହୁମତରେ ସରକାର ଗଢ଼ିବୁ କହିଲେ କଂଗ୍ରେସ ସାଂସଦ

ହାଇଦ୍ରାବାଦ: ତେଲେଙ୍ଗାନା ବିଧାନସଭା ନିର୍ବାଚନର ଜନାଦେଶ ଆସିବାରେ ଲାଗିଛି । ପ୍ରଥମେ ବାଲାଟ ପେପର ଗଣତି ପରେ ଇଭିଏମ ଗଣତିରେ ମଧ୍ୟ କଂଗ୍ରେସ ସ୍ପଷ୍ଟ ବହୁମତ ପାଉଥିବା ଦେଖିବାକୁ ମିଳିଛି । କଂଗ୍ରେସ ପ୍ରାର୍ଥୀମାନେ ଅଧିକ ଆସନରେ ଆଗୁଆ ରହିଛନ୍ତି । ପ୍ରାୟ ସବୁ ଆସନରେ ଶାସକ ଦଳ ବିଆରଏସ୍ ଏବଂ ବିରୋଧୀ କଂଗ୍ରେସ ମଧ୍ୟରେ କଡ଼ା ଟକ୍କର ହେଉଥିବା ବେଳେ, କଂଗ୍ରେସ ପ୍ରାର୍ଥୀମାନେ ଅଧିକ ଆସନରେ ଆଗୁଆ ଥିବା ଦେଖିବାକୁ ମିଳୁଛି । ଏନେଇ କଂଗ୍ରେସ ସାଂସଦ ଉତ୍ତମ କୁମାର ରେଡ୍ଡୀ କହିଛନ୍ତି, "ତେଲେଙ୍ଗାନାରେ କଂଗ୍ରେସ ସ୍ପଷ୍ଟ ବହୁମତ ସହ ସରକାର ଗଠନ କରିବ । ତେଲେଙ୍ଗାନା ଲୋକଙ୍କ ହୃଦୟରେ ଗାନ୍ଧୀ ପରିବାର ପାଇଁ ଏକ ସ୍ବତନ୍ତ୍ର ସ୍ଥାନ ରହିଛି । ଆମେ ୨୦୧୪ ଓ ୨୦୧୮ ନିର୍ବାଚନରେ କିଛି ଭୁଲ କରିଥିଲୁ । ଏଥର ଆମେ ସବୁ ଭୁଲ ସୁଧାରି ବିଜୟୀ ହେବାକୁ ଯାଉଛୁ ।" ତେବେ ଘୋଡ଼ା ବେପାର ଏଠାରେ ସମ୍ଭବ ନୁହେଁ ବୋଲି କହିଛନ୍ତି କଂଗ୍ରେସ ସାଂସଦ ।

ବ୍ୟୁରୋ ରିପୋର୍ଟ, ଇଟିଭି ଭାରତ