'ପାଣ୍ଡିଆନ ଗୋ ବ୍ୟାକ୍‌' ନାରାରେ କମ୍ପିଲା ଯାଜପୁର, ବିରୋଧୀଙ୍କ ଆଗକୁ ମାଡ଼ି ଆସିଲେ 5T ସାର୍ଟ ପିନ୍ଧା ଯୁବକ

ଯାଜପୁର: ୫T ସଚିବ ଭି.କେ ପାଣ୍ଡିଆନଙ୍କ ଯାଜପୁର ଗସ୍ତକୁ ତୀବ୍ର ବିରୋଧ କରିଛି ଜିଲ୍ଲା କଂଗ୍ରେସ । ଜିଲ୍ଲା କଂଗ୍ରେସ କାର୍ଯ୍ୟାଳୟରୁ ସଭାପତି ମନୋଜ ରାଉତ ଏବଂ ସନ୍ତୋଷ ନନ୍ଦଙ୍କ ନେତୃତ୍ୱରେ ଶତାଧିକ କର୍ମୀ ରାଜରାସ୍ତାକୁ ଓହ୍ଲାଇଥିଲେ । ବ୍ୟୟ ବହୁଳ କାର୍ଯ୍ୟକ୍ରମ କରି ସରକାରୀ ଅର୍ଥର ଅପବ୍ୟୟ କରୁଥିବା ଅଭିଯୋଗ କରି ବିରାଟ ଶୋଭାଯାତ୍ରାରେ ଆସି ଗାନ୍ଧୀ ଛକ ନିକଟରେ ବିକ୍ଷୋଭ ପ୍ରଦର୍ଶନ କରିଥିଲେ । କଳାପତାକା ପ୍ରଦର୍ଶନ କରିବା ସହ 'ପାଣ୍ଡିଆନ ଗୋ ବ୍ୟାକ୍‌' ନାରା ଦେଇଥିଲେ । ଏହି ସମୟରେ ବିରୋଧ ପ୍ରଦର୍ଶନ କରୁଥିବା କଂଗ୍ରେସ କର୍ମୀଙ୍କୁ କିଛି ୫T ଲେଖା ଟି-ସାର୍ଟ ପିନ୍ଧା ଯୁବକ ଘେରିଥିଲେ । ହାତରେ ଠେଙ୍ଗା,ବାଉଁଶ ଧରି କର୍ମୀଙ୍କ ଆଗକୁ ମାଡ଼ିଆସିଥିଲେ । ଫଳରେ ଘଟଣାସ୍ଥଳରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିଲା । ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲା । ଏନେଇ କଂଗ୍ରେସ ପକ୍ଷରୁ ଯାଜପୁର ଥାନାରେ ଏନେଇ ଅଭିଯୋଗ କରାଯାଇଛି । ଆନ୍ଦୋଳନକୁ ବିରୋଧ କରି ଉତ୍ତେଜନାମୂଳକ ପରିସ୍ଥିତି ସୃଷ୍ଟି କରିଥିବା ଯୁବକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି କଂଗ୍ରେସ । 

ଇଟିଭି ଭାରତ, ଯାଜପୁର