ଟୋଲ ପ୍ଲାଜାରେ BJP ନେତାଙ୍କ ଦବଙ୍ଗଗିରି ! ଭିଡିଓ ଭାଇରାଲ

ଲକ୍ଷ୍ନୌ: ଉତ୍ତର ପ୍ରଦେଶରେ କ୍ଷମତାରେ ଥିବା ଭାରତୀୟ ଜନତା ପାର୍ଟିର କାର୍ଯ୍ୟକର୍ତ୍ତା ଓ କର୍ମୀମାନେ ଏକ ଟୋଲ ପ୍ଲାଜାରେ ଦବଙ୍ଗଗିରି ଦେଖାଇଥିବା ଅଭିଯୋଗ ହୋଇଛି । ସେମାନେ ଟୋଲ-ଫି ନଦେଇ ପ୍ଲାଜାରେ ବାରିକେଡ ଭାଙ୍ଗିବା ସହ କାର ନେଇଯାଇଥିବା ମଧ୍ୟ ଅଭିଯୋଗ ହୋଇଛି । ଗତକାଲି (ସ୍ବାଧୀନତା) ଦିବସ ଅବସରରେ କାନପୁର ଦେହାତ ଜିଲ୍ଲାର ଜିଲ୍ଲାର ଆକବରପୁର-କୋତୱାଲୀ ରାସ୍ତାରେ ବାରା ଟୋଲ ପ୍ଲାଜାରେ ଏହି ଘଟଣା ଘଟିଛି । ଯାହାର ଭିଡିଓ ସେଠାରେ ଲାଗିଥିବା ସିସିଟିଭିରେ କଏଦ ହୋଇଛି ।

ଅଭିଯୋଗ ଅନୁସାରେ ସ୍ଥାନୀୟ ବିଜେପି ନେତା ଜିତ୍‌ ପ୍ରତାପ ସିଂ ନିଜର ସମର୍ଥକଙ୍କ ସହ ଏକାଧିକ କାରରେ ଆସିଥିଲେ । ତାଙ୍କୁ ରୋକାଯିବାରୁ ସେ ଟୋଲ-ଫି ନଦେଇ ବାରିକେଡ ଭାଙ୍ଗି ଗାଡିଗୁଡିକ ନେଇଯାଇଥିବା ଅଭିଯୋଗ ହୋଇଛି । ଏହାକୁ ଜିତ ପ୍ରତାପ ଅସ୍ବୀକାର କରିବା ସହ ପୋଲିସ ତଦନ୍ତ ଆରମ୍ଭ ହୋଇଛି ।  

ବ୍ୟୁରୋ ରିପୋର୍ଟ, ଇଟିଭି ଭାରତ