ଯାଜପୁରରେ ପୁଣି 5T ସଚିବଙ୍କୁ ବିରୋଧ, କଳାବ୍ୟାଚ ପିନ୍ଧି ପ୍ରତିବାଦ କଲେ ବିରୋଧୀ

ଯାଜପୁର: ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ତଥା ୫T ସଚିବ ଭି.କେ ପାଣ୍ଡିଆନଙ୍କ ଗସ୍ତକୁ ନେଇ ଯାଜପୁରରେ ପ୍ରତିବାଦ ଲାଗି ରହିଛି । ୫T ସଚିବ ତିନି ଦିନିଆ ଗସ୍ତରେ ଥିବା ବେଳେ ଜିଲ୍ଲାର ବିଭିନ୍ନ ସ୍ଥାନରେ ତାଙ୍କୁ ବିରୋଧ କରାଯାଇଛି । ଏହି କ୍ରମରେ ସଚିବଙ୍କ ତୃତୀୟ ଦିନ ଗସ୍ତ ନେଇ କୋରେଇ ଠାରେ ଉଭୟ କଂଗ୍ରେସ ଏବଂ ବିଜେପି ପକ୍ଷରୁ ବିରୋଧ ପ୍ରଦର୍ଶନ କରାଯାଇଥିଲା । କୋରେଇ କଂଗ୍ରେସ ନେତା ଅକ୍ଷୟ ଜେନାଙ୍କ ନେତୃତ୍ୱରେ ଅନେକ ଯୁବ, ଛାତ୍ର ଓ ବରିଷ୍ଠ ନେତା କଂଗ୍ରେସ ନେତା ବ୍ୟାସନଗର ସ୍ଥିତ କହ୍ନେଇପୁର ଠାରେ କଳା ବ୍ୟାଚ ପିନ୍ଧି 'ପାଣ୍ଡିଆନ ଗୋ ବ୍ୟାକ' ନାରା ଲଗାଇଥିଲା । ପାଣ୍ଡିଆନ ବ୍ୟାସନଗର ଆସିବାକୁ ବିରୋଧ କରି କଂଗ୍ରେସ କର୍ମୀ ଚାନ୍ଦମା ସ୍ଥିତ ଆୟୋଜିତ ସଭାସ୍ଥଳୀରେ ପଶିବାକୁ ଉଦ୍ୟମ କରିଥିଲେ l ଖବର ପାଇ ଯାଜପୁର ରୋଡ ପୋଲିସ ଘଟଣାସ୍ଥଳରେ ପହଞ୍ଚି କଂଗ୍ରେସ କର୍ମୀଙ୍କୁ ଅଟକାଇଥିଲା । ଏହି ସମୟରେ କଂଗ୍ରେସ କର୍ମୀଙ୍କ ସହ ପୋଲିସର ଧସ୍ତାଧସ୍ତି ହୋଇଥିଲା । ଅନ୍ୟପଟେ ବିଜେପି ପକ୍ଷରୁ ମଧ୍ୟ କୋରେଇରେ ୫T ସଚିବ ଗସ୍ତ ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଛି । 

ଇଟିଭି ଭାରତ, ଯାଜପୁର