Watch Video: ପାଣ୍ଡିଆନଙ୍କୁ 'ପ୍ରିୟ ମୁଖ୍ୟମନ୍ତ୍ରୀ' କହିଲେ ପ୍ରମିଳା ବିଷୋୟୀ

ବ୍ରହ୍ମପୁର: ପୁଣିଥରେ ଚର୍ଚ୍ଚାରେ ଆସିକା ସାଂସଦ ପ୍ରମିଳା ବିଷୋୟୀ । କେତେବେଳେ ଧାନବିଲ ଖସ ଖସ ଗୀତ ଗାଇବା ତ ଆଉ କେତେବେଳେ ହୁଳହୁଳି ପକାଇବା ହେଉ କିମ୍ବା ଗଣମାଧ୍ୟମରେ ନିଜର ପ୍ରତିକ୍ରିୟା ପାଇଁ ସେ ଅନେକ ସମୟରେ ଚର୍ଚ୍ଚାରେ ରହିଥାନ୍ତି  । ବର୍ତ୍ତମାନ 5T ସଚିବ ପାଣ୍ଡିଆନକୁ ମୁଖ୍ୟମନ୍ତ୍ରୀ ସମ୍ବୋଧନ କରି ପୁଣିଥରେ ଚର୍ଚ୍ଚାକୁ ଆସିଛନ୍ତି ଆସିକା ସାଂସଦ । ବୁଧବାର ଗଞ୍ଜାମ ଜିଲ୍ଲାର ଶେରଗଡରୁ ପୁରୀକୁ ପ୍ରଥମ ଏସି ବସ୍ ଜଗନ୍ନାଥ ଏକ୍ସପ୍ରେସର ଲୋକାର୍ପଣ କାର୍ଯ୍ୟକ୍ରମରେ ଯୋଗ ଦେଇଥିବା ସାଂସଦ ପ୍ରମିଳା ବିଷୋୟୀ ସଭାମଞ୍ଚରେ ଧନ୍ୟବାଦ ଦେବାବେଳେ 'ଆମ ପ୍ରିୟ ମୁଖ୍ୟମନ୍ତ୍ରୀ ପାଣ୍ଡିଆନ ବାବୁ' ବୋଲି ସମ୍ବୋଧନ କରିଥିଲେ । ଏହାର ଭିଡିଓ ଭାଇରାଲ ହେବା ପରେ ଚାରିଆଡେ ଜୋରଦାର ଚର୍ଚ୍ଚା ଚାଲିଛି ।  

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତକାଲି ଭିଡିଓ କନଫରେନ୍ସ ମାଧ୍ୟମରେ ଶେରଗଡ-ପୁରୀ ବସକୁ ପତକା ଦେଖାଇ ଶୁଭାରମ୍ଭ କରିଥିଲେ  । OSRTC ପକ୍ଷରୁ ଏହି ବସ୍ ସେବା ଆରମ୍ଭ କରାଯାଇଛି । ଏନେଇ ଗଞ୍ଜାମ ଜିଲ୍ଲା ପ୍ରଶାସନ ପକ୍ଷରୁ ଆୟୋଜିତ ଲୋକାର୍ପଣ କାର୍ଯ୍ୟକ୍ରମରେ ସ୍ଥାନୀୟ ନିର୍ବାଚନ ପ୍ରତିନିଧିଙ୍କ ସହିତ ଆସିକା ସାଂସଦ ପ୍ରମିଳା ବିଷୋୟୀ ଉପସ୍ଥିତ ରହିଥିଲେ । ଏହି ଅବସରରେ ସଭାରେ ଭାଷଣ ଦେବା ବେଳେ 5T ସଚିବ ପାଣ୍ଡିଆନକୁ 'ଆମର ପ୍ରିୟ ମୁଖ୍ୟମନ୍ତ୍ରୀ' ବୋଲି କହି ଦେଇଥିଲେ  ।  

ଇଟିଭି ଭାରତ, ବ୍ରହ୍ମପୁର