ବଡଓଷାରେ ଚଳଚଞ୍ଚଳ ବାବା ଧବଳେଶ୍ବର ପୀଠ

ଆଜି ପବିତ୍ର ବଡଓଷା । କାର୍ତ୍ତିକ ମାସର ବଡ଼ଓଷା ପର୍ବରେ ଚଳଚଞ୍ଚଳ ରହିଛି ଖୋର୍ଦ୍ଧା ନିକଟସ୍ଥ ଗୁରୁଜଙ୍ଗର ବାବା ଧବଳେଶ୍ବରଙ୍କ ପୀଠ । ହଜାର ହଜାର ଶ୍ରଦ୍ଧାଳୁ ଆଜିର ଦିନରେ ଧବଳେଶ୍ବରଙ୍କୁ ଦର୍ଶନ ଏବଂ ପୂଜାର୍ଚ୍ଚନା କରି ଆଶିଷ ଭିକ୍ଷା କରୁଛନ୍ତି । ଏହାସହିତ ଶୈବପୀଠରେ ଚାଲିଥିବା ମେଳାର ମଜା ନେଉଛନ୍ତି ଶ୍ରଦ୍ଧାଳୁ । ଦୁଇ ବର୍ଷର କୋରୋନା କଟକଣା ହଟିବା ପରେ ଚଳିତ ବର୍ଷ ଧବଳେଶ୍ବରଙ୍କ ପୀଠରେ ବଡ଼ଓଷା ପର୍ବ ମହାଆଡମ୍ବରରେ ଅନୁଷ୍ଠିତ ହେଉଛି । ରୀତିନୀତି ପରମ୍ପରା ଅନୁଯାୟୀ ବାବାଙ୍କର ପୂଜାର୍ଚ୍ଚନା ହେଉଛି । ଯେଉଁ ଶ୍ରଦ୍ଧାଳୁଙ୍କ ମନସ୍କାମନା ପୂର୍ଣ୍ଣ ହୁଏ ଆଜିର ଦିନରେ ସେ ବାବାଙ୍କ ନିକଟରେ ଅଟକାଳୀ ଭୋଗ ଲାଗି କରିଥାନ୍ତି । ତେବେ କଟକ ଧବଳେଶ୍ବରଙ୍କ ପୀଠରେ ଦର୍ଶନ ପାଇଁ କଟକଣା ଥିବାରୁ ବହୁସଂଖ୍ୟକ ଶ୍ରଦ୍ଧାଳୁ ଏଠାରେ ଭିଡ଼ ଜମାଉଛନ୍ତି । ସୁରକ୍ଷା ଓ ଶାନ୍ତି ଶୃଙ୍ଖଳାର ସହ ଦର୍ଶନ ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି ।