ବରଗଡରେ ଗର୍ଜିଲା ଓକିଲଙ୍କ ବନ୍ଧୁକ, ଜଣେ ଗୁରୁତର

ବରଗଡ: ତାଲପଦର ଗ୍ରାମରେ ଗୁଳିକାଣ୍ଡ । ଜଣେ ବ୍ୟକ୍ତିଙ୍କ ପେଟରେ ଗୁଳିବାଜି ଗୁରୁତର ଆହତ । ଗୁରୁତର ଆହତଙ୍କୁ ବୁର୍ଲାରେ ଭର୍ତ୍ତି କରାଯାଇଛି । ଗୁଳିକାଣ୍ଡ ଘଟାଇଥିବା ବ୍ୟକ୍ତିକୁ ଘରୁ ଗିରଫ କଲା ବିଜେପୁର ପୋଲିସ  । ଗୁଳି ଫୁଟାଇଥିବା ବ୍ୟକ୍ତିଙ୍କ ନାମ ସୁବ୍ରତ ମିଶ୍ର ହୋଇଥିବା ବେଳେ ପେସାରେ ସେ ଜଣେ ଓକିଲ ବୋଲି ଜଣାପଡ଼ିଛି 

। ସୂଚନା ଅନୁଯାୟୀ ବରଗଡ଼ ଜିଲ୍ଲା ବିଜେପୁର ଥାନା ଅନ୍ତର୍ଗତ ତାଲପଦର ଗ୍ରାମରେ ସୁବ୍ରତ ମିଶ୍ର ସେହି ଗ୍ରାମର ତାପପ୍ରକାଶ ସାହୁ ନାମକ ବ୍ୟକ୍ତିକୁ ଗୁଳି କରିଥିଲେ । ତେବେ ଗୁଳିଟି ତାପପ୍ରକାଶଙ୍କ ପେଟରେ ବାଜିଥିଲା ।   ଗୁଳିକାଣ୍ଡ ଘଟାଇଥିବା ସୁବ୍ରତ ମିଶ୍ର ଘଟଣା ସ୍ଥଳରୁ ଫେରାର ହୋଇଯାଇଥିଲେ । ସ୍ଥାନୀୟ ଲୋକେ ସଙ୍ଗେ ସଙ୍ଗେ ତାପପ୍ରକାଶଙ୍କୁ ଉଦ୍ଧାର କରି ପ୍ରଥମେ ବରଗଡ଼ ମୁଖ୍ୟ ଡ଼ାକ୍ତରଖାନାକୁ ଆଣିଥିଲେ । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ବଡ଼ ଡାକ୍ତରଖାନାକୁ ପଠାଯାଇଛି ।  

ତେବେ ଏହି ଘଟଣାକୁ ନେଇ ବିଜେପୁର ଥାନାରେ ଏତଲା ହେବାପରେ ବିଜେପୁର ପୋଲିସ ସଙ୍ଗେ ସଙ୍ଗେ ଘଟଣା ସ୍ଥଳକୁ ପହଞ୍ଚି ତଦନ୍ତ ଆରମ୍ଭ କରିଦେଇଥିଲା । ଆକ୍ରମଣକାରୀ ସୁବ୍ରତ ମିଶ୍ର ନିଜ ଘରେ ଥିବା ବେଳେ ପୋଲିସ ସୁବ୍ରତଙ୍କ ଘରୁ ଏକ ଦେଶୀ ବନ୍ଧୁକ ଜବତ କରିବା ସହ ସୁବ୍ରତକୁ ଗିରଫ କରିଥିଲା । ତେବେ ଧାରା 307, 25 ଏବଂ ଧାରା 27 ଅନୁଯାୟୀ ଏକ ମାମଲା ରୁଜୁ କରାଯାଇ କୋର୍ଟକୁ ଚାଲାଣ କରାଯାଇଥିବା ନେଇ ପଦ୍ମପୁର ଏସଡ଼ିପିଓ ବିଭୁତି ଭୋଇ ସୂଚନା ଦେଇଛନ୍ତି ।

ଇଟିଭି ଭାରତ, ବରଗଡ