ପୋଲିସ ପଞ୍ଝାରେ ହାଇୱେ ଲୁଟେରା, 5 ଗିରଫ

Highway Robbers Arrested: କଟକ: କମିଶନରେଟ ପୋଲିସକୁ ସଫଳତା । ଗିରଫ ହେଲେ ହାଇୱେ ଲୁଟେରା ଗ୍ୟାଙ୍ଗ । ଏହି ଲୁଟେରା ଗ୍ୟାଙ୍ଗର 5 ଜଣ ସଦସ୍ୟଙ୍କୁ ଗିରଫ କରିବା ସହ ପାଞ୍ଚ ଲକ୍ଷରୁ ଊର୍ଦ୍ଧ୍ବ ଟଙ୍କାର ସୁନା ଗହଣା, ଗୁଳି, ମାଗାଜିନ ସହ କାର ଓ ଗୋଟିଏ ସ୍ପିଡ ବାଇକକୁ ଜବତ କରିଛି କମିଶନରେଟ ପୋଲିସ । ତେବେ ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ନାବାଳକ ଥିବା ପୋଲିସ କହିଛି । ପାଞ୍ଚ ଅଭିଯୁକ୍ତଙ୍କ ନାମରେ ଡର୍ଜନରୁ ଅଧିକ ଲେଖାଏଁ ମାମଲା ଥିବା ଜଣାଇଛନ୍ତି ଅତିରିକ୍ତ ଡିସିପି । ଏହି ଗ୍ୟାଙ୍ଗ ମହିଳାଙ୍କୁ ଟାର୍ଗେଟ କରୁଥିଲେ । ଦିନ 10ଟାରୁ 2ଟା ମଧ୍ୟରେ ବାଇକରେ କରୁଥିଲେ ଲୁଟ୍ । କଟକରୁ ଭୁବନେଶ୍ବର ଯାଉଥିବା ମହିଳାମାନଙ୍କୁ ପିଛା କରି ରାହାଜାନି କରିବାରେ ସଫଳ ହେଉଥିଲେଏହି ଲୁଟେରା ଗ୍ୟାଙ୍ଗ ।  

ଏହା ମଧ୍ୟ ପଢ଼ନ୍ତୁ... ଆଲିଗଡ଼ରେ ନାବାଳିକାକୁ ଦୁଷ୍କର୍ମ, ବନ୍ଧା ହେଲା ୬୬ ବର୍ଷୀୟ ବୃଦ୍ଧ

ଜାତୀୟ ରାଜପଥରେ ସ୍ପିଡ ବାଇକ ଯୋଗେ ହେଲମେଟ ପିନ୍ଧି ଆସି ଆଖି ପିଛୁଳାକେ ବେକରୁ ଝାମ୍ପି ନେଉଥିଲେ ଚେନ । ସଦର ଥାନା ପୋଲିସ ଏଭଳି ଏକ ଅଭିଯୋଗ ପାଇବା ପରେ ବ୍ଲୁ ପ୍ରିଣ୍ଟ ଜରିଆରେ ଆରମ୍ଭ କରିଥିଲା ଖୋଳତାଡ । ତେବେ ଜାତୀୟ ରାଜପଥରେ ଲାଗିଥିବା କ୍ୟାମେରା ହିଁ ପୋଲିସକୁ ଦେଇଥିଲା ଲୁଟେରାଙ୍କ ସୁରାକ । ପରେ ହାଇୱେ ଲୁଟେରାର ମାଷ୍ଟରମାଇଣ୍ଡ ଶୁଭ୍ରାଂଶୁ ପରିଡା ସମେତ ପାଞ୍ଚ ଅଭିଯୁକ୍ତଙ୍କୁ ଗିରଫ କରିଥିଲା ପୋଲିସ । ତେବେ ଶୁଭ୍ରାଂଶୁ ସହ ସମସ୍ତ ଅଭିଯୁକ୍ତଙ୍କ ନାମରେ ଡର୍ଜନରୁ ଅଧିକ ମାମଲା ଥିବା ପୋଲିସ ପକ୍ଷରୁ ସୂଚନା ମିଳିଛି । ଅତିରିକ୍ତ ଡିସିପି ଅନିଲ ମିଶ୍ର କହିଛନ୍ତି ଯେ, ’’ମୁଖ୍ୟ ଅଭିଯୁକ୍ତ ଶୁଭ୍ରାଂଶୁ ନାମରେ ହିଁ ଟୁଇନସିଟିର ବିଭିନ୍ନ ଥାନାରେ 35ଟି ମାମଲା ରହିଛି । ଜାତୀୟ ରାଜପଥରେ ଲୁଟତରାଜ ମାମଲା ବୃଦ୍ଧି ପାଇବାରୁ କମିଶନରେଟ ପୋଲିସ ବେଶ ଯୋଜନା ମାନ କରି ଏହି ଗ୍ୟାଙ୍ଗକୁ ଗିରଫ କରିବାରେ ସଫଳ ହୋଇଛି ।’’

ଇଟିଭି ଭାରତ, କଟକ