ରାଜଧାନୀବାସୀଙ୍କୁ ଡରାଇଲାଣି ବର୍ଷା, ସରିନି ଡ୍ରେନେଜ କାମ

ଭୁବନେଶ୍ବର: ବର୍ଷା ଆସିଲେ ରାଜଧାନୀବାସୀଙ୍କୁ ଘାରେ ଡ୍ରେନେଜ ଚିନ୍ତା । ଅସରାଏ ବର୍ଷାରେ ବେହାଲ ହୋଇପଡେ ସ୍ମାର୍ଟ ସିଟି । ଯାହାର ନଜିର ପ୍ରତିବର୍ଷ ଦେଖିବାକୁ ମିଳେ । ହେଲେ ବ୍ୟବସ୍ଥା ଯଥା ପୂର୍ବଂ ତଥା ପରମ । ଚଳିତ ବର୍ଷ ରାଜ୍ୟକୁ ମୌସୁମୀ ପ୍ରବେଶ କରିଛି । କିନ୍ତୁ ଭୁବନେଶ୍ବର ଗଳିକନ୍ଦିରେ ଥିବା ଡ୍ରେନ ଏବେ ବି ମୁକୁଳା ପଡିଛି । କେଉଁଠି ସ୍ଲାବ ପଡିନି ତ କେଉଁଠି ଅଳିଆ ଆବର୍ଜନା ଏଯାବତ ସଫେଇ ହୋଇପାରି ନାହିଁ । ଆଉ କେଉଁଠି ଭଙ୍ଗା ଅବସ୍ଥାରେ ପଡିଛି ଡ୍ରେନ । ଯାହା ଆଗକୁ ଜଳବନ୍ଦୀ କରିବାର ଆଶଙ୍କା ସୃଷ୍ଟି କରିବା ସହ ନାନା ଦୁର୍ଘଟଣାକୁ ମଧ୍ୟ ଏଡାଇ ଦିଆଯାଇପାରିବ ନାହିଁ । ସେପଟେ ସ୍ମାର୍ଟସିଟି ବାସୀଙ୍କ ଅଭିଯୋଗ ବର୍ଷା ଆସିଲେ ବିଏମସିର ମନେ ପଡେ ଡ୍ରେନେଜ କଥା ।