4th Phase Voting: ମତଦାନ କଲେ BJD ହେବିୱେଟ ବାପପୁଅ

ଯାଜପୁର: ତ୍ରିସ୍ତରୀୟ ପଞ୍ଚାୟତ ନିର୍ବାଚନର ଆଜି ଚତୁର୍ଥ ପର୍ଯ୍ୟାୟ ମତଦାନ । ଯାଜପୁର ଜିଲ୍ଲାର ସୁକିନ୍ଦା ନିର୍ବାଚନ ମଣ୍ଡଳୀର ସୁକିନ୍ଦା ଓ ଦାନଗଦୀ ବ୍ଲକରେ ମୋଟ 6ଟି ଜୋନ୍ ଓ 48ଟି ପଞ୍ଚାୟତର ଜିଲ୍ଲାପରିଷଦ ସଭ୍ୟ, ସରପଞ୍ଚ, ସମିତିସଭ୍ୟ ଓ ୱାର୍ଡମେମ୍ବର ପଦ ପାଇଁ ମୋଟ 641ଟି ବୁଥରେ ଭୋଟଗ୍ରହଣ କରାଯାଉଛି । ଏହି କ୍ରମରେ ଦାନଗଦୀ ବ୍ଲକ ତ୍ରିଜଙ୍ଗା ପଞ୍ଚାୟତର ସିଙ୍ଗାଗାଡିଆ ପ୍ରାଥମିକ ସ୍କୁଲର ୩ନଂ ବୁଥରେ ମତଦାନ କରିବାକୁ ପହଞ୍ଚିଛନ୍ତି ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେଡି ନେତା ଡଃ ପ୍ରଫୁଲ୍ଲ ଚନ୍ଦ୍ର ଘଡ଼ାଇ ଓ ପୁଅ ତଥା ସୁକିନ୍ଦା ବିଧାୟକ ଇଂ ପ୍ରିତିରଞ୍ଜନ ଘଡାଇ । ଉଭୟ ଲାଇନରେ ରହି ନିଜର ଭୋଟ ଦେଇଥିଲେ। ତେବେ ଉଭୟ ନିଜର ମତ ସାବ୍ୟସ୍ତ କରି ନିଜେ ଉତ୍ସାହ ପ୍ରକାଶ କରିବା ସହିତ ସାଧାରଣ ଭୋଟରଙ୍କୁ ଉତ୍ସାହିତ କରିଥିବା ଦେଖିବାକୁ ମିଳିଥିଲା । ତେବେ ଚଳିତ ନିର୍ବାଚନରେ ବିଜେଡିର ବିପୁଳ ସଫଳତା ହେବ ବୋଲି ଉଭୟ ନେତା ଦୃଢୋକ୍ତି ପ୍ରକାଶ କରିଛନ୍ତି । ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ