ସମ୍ବଲପୁର: ନିଜ ଅଞ୍ଚଳରେ କାମ ଧନ୍ଦା ନପାଇ ଦାଦନ ଖଟିବାକୁ ଯାଇ ଯୁବକ ଯୁବତୀ ନିର୍ଯାତନାର ଶିକାର ହେବ ଭଳି ଅନେକ ଖବରର ନଜିର ରହିଛି । ମୁଖ୍ୟତଃ ଆଦିବାସୀବହୁଳ ଅଞ୍ଚଳରେ ଅନେକ ଯୁବତୀ ପାଠ ପଢ଼ି ଚାକିରି ନ ପାଇବାରୁ ଶ୍ରମିକ ଭାବରେ ଦାଦନ ଖଟିବାକୁ ଯିବାକୁ ବାଧ୍ୟ ହୋଇଥାଆନ୍ତି । ମାତ୍ର ପରବର୍ତ୍ତୀ ସମୟରେ ସେଠାରେ ଅନେକ ସମସ୍ୟାର ସମ୍ମୁଖୀନ ହୋଇଥାନ୍ତି । ତେବେ ଏହି କୁତ୍ସିତ ଧାରାକୁ ରୋକିବାକୁ ସମ୍ବଲପୁର ସହରର ପୁଷ୍ପାଞ୍ଜଳି ମହାକୁଡ଼ ନାମକ ଜଣେ ମହିଳା ଅଣ୍ଟା ଭିଡିଛନ୍ତି । ଆଦିବାସୀ ଯୁବତୀଙ୍କୁ ରୋଜଗାରକ୍ଷମ କରି ସ୍ୱାବଲମ୍ବୀ କରିବାକୁ ପ୍ରୟାସ ସ୍ବରୂପ ସେମାନଙ୍କୁ ଦେଉଛନ୍ତି ମାଗଣା ବିୟୁଟି ପାର୍ଲର ଟ୍ରେନିଂ।
- ଆଦିବାସୀ ଯୁବତୀଙ୍କୁ ସ୍ବାବଲମ୍ବୀ କରିବା ଲକ୍ଷ:
ସମ୍ବଲପୁର ଓ ଆଖପାଖ ଜିଲ୍ଲାର ଆଦିବାସୀ ଅଧ୍ୟୁଷିତ ଅଞ୍ଚଳର ଗରିବ ଆଦିବାସୀ ଯୁବତୀମାନେ ପେଟ ପାଟଣା ଓ ପରିବାର ପ୍ରତିପୋଷଣ ପାଇଁ ରାଜ୍ୟ ବାହାରକୁ ଦାଦନ ଖଟିବାକୁ ଯାଉଥିବା ବେଳେ କେତେକ ସ୍ଥଳରେ ଚାକିରୀ ଆଳରେ ନିର୍ଯାତନାର ଶୀକାର ହେଉଛନ୍ତି । ଏହାକୁ ରୋକିବା ପାଇଁ ସମ୍ବଲପୁରର ପୁଷ୍ପାଞ୍ଜଳି ମହାକୁଡ଼ ନାମକ ଜଣେ ସ୍ୱାବଲମ୍ବୀ ମହିଳା "ସ୍ବର୍ଣ୍ଣ ନାରୀ କଲ୍ୟାଣ ପରିଷଦ ଓ ଆଦିବାସୀ ମହିଳା ଯୁବା ସେବା ସଂଘ"ର ସହାୟତାରେ ଏକ ୩ ଦିନିଆ ବିୟୁଟି ପାର୍ଲର ମାଗଣା ତାଲିମ ୱାର୍କସପ ଆୟୋଜନ କରିଛନ୍ତି । ଏହି ତାଲିମ ଶିବିରରେ ୩୫ ଜଣ ଆଦିବାସୀ ଯୁବତୀଙ୍କୁ ମାଗଣାରେ ତାଲିମ ଦିଆଯାଉଛି । ଏମାନଙ୍କ ପାଇଁ ରାଜ୍ୟର ବିଭିନ୍ନ ଜିଲ୍ଲାରୁ ବିୟୁଟି ଟ୍ରେନର (ପ୍ରଶିକ୍ଷିକା) ଆସିଥିବା ବେଳେ ବଲିଉଡ ମେକଅଫ ଆର୍ଟିଷ୍ଟ ଧୀରା କପୁର ଓ ଅହମ୍ମଦାବାଦର ଏଚଡ଼ି ମେକଅଫ ଥିଓରୀ ମାଷ୍ଟର ରାଜେଶ ପାରେଖଙ୍କ ପରି ପ୍ରତିଷ୍ଠିତ ବିୟୁଟିସିଆନ ମଧ୍ୟ ତାଲିମ୍ ଦେଇଛନ୍ତି । ଏପରିକି ଏହି ଆଦିବାସୀ ଯୁବତୀମାନେ ତାଲିମ ନେବା ପରେ ତାଙ୍କୁ ପ୍ଲେସମେଣ୍ଟ ଦେବା ଅଥବା ନିଜେ ବିୟୁଟି ପାର୍ଲର ପ୍ରତିଷ୍ଠା କରିବାରେ ସହାୟତା କରାଯିବ ବୋଲି ସଂଘ ପକ୍ଷରୁ କୁହାଯାଇଛି ।
- ବିୟୁଟିସିଆନ ହେବେ ଆଦିବାସୀ ଯୁବତୀ :
ତେବେ ଝାରସୁଗୁଡା ଜିଲ୍ଲାର ନୁଆଁଡ଼ିହି ଗାଁର ୨୧ ବର୍ଷୀୟା ଆଦିବାସୀ ଯୁବତୀ ପ୍ରତିଭା ପଟ୍ଟା । ସମ୍ବଲପୁର ଜିଲ୍ଲାର କୁଚିଣ୍ଡା ନିକଟସ୍ଥ କେଶାଇବାହାଲର ବାସୁଦେବ ଗୋଦାବରୀ ଡିଗ୍ରୀ କଲେଜରେ ଏଜୁକେସନ ଅନର୍ସରେ ଗ୍ରାଜୁଏସନ୍ ପାସ କରି ସାରିଛନ୍ତି । ଚାକିରୀ ନ ମିଳିବାରୁ ଘରେ ଛେଳି ଚରାଉଥିଲେ । ଆଗକୁ ସେ ଏକ ବିୟୁଟି ପାର୍ଲର କରି ସ୍ୱାବଲମ୍ବୀ ହେବାର ସ୍ବପ୍ନ ଦେଖୁଛନ୍ତି । କେବଳ ଏତିକି ନୁହେଁ ଆଖ ପାଖର ବେରୋଜଗାର ଆଦିବାସୀ ଯୁବକ ଯୁବତୀମାନଙ୍କୁ ତାଲିମ୍ ଦେଇ ସେମାନଙ୍କୁ ମଧ୍ୟ ରୋଜଗାରକ୍ଷମ କରିବାକୁ ସ୍ବପ୍ନ ଦେଖୁଛନ୍ତି ପ୍ରତିଭା ପଟ୍ଟା । କାରଣ ତାଙ୍କୁ ସମ୍ବଲପୁରରେ ପୁଷ୍ପାଞ୍ଜଳି ମହାକୁଡ଼ ଓ ଆଦିବାସୀ ମହିଳା ଯୁବ ସେବା ସଂଗଠନର ଉଦ୍ୟମରେ ଅନୁଷ୍ଠିତ ବିୟୁଟି ପାର୍ଲର ମେକ ଅଫ ଟ୍ରେନିଂ ୱାର୍କ ସଫରେ ତାଲିମ୍ ମିଳିଛି । ଏଠାରେ ତାଙ୍କୁ ମେକଅପ ଓ ହେୟାର କଟିଂର ତାଲିମ୍ ଦିଆଯାଇଛି । ବଲିଉଡ଼ ମେକଅଫ ଆର୍ଟିଷ୍ଟ ଧୀରା କପୁର ଓ ଅହମ୍ମଦାବାଦର ମେକଅପ ଥିଓରୀ ମାଷ୍ଟର ରାଜେଶ ପାରେଖ ତାଲିମ ଦେଇଛନ୍ତି । ଯେଉଁ ତାଲିମ କୋର୍ସ ଫି ୫୦ ହଜାର ତାକୁ ଏଠାରେ ମାଗଣାରେ ଦିଆଯାଉଛି ବୋଲି ସେମାନେ କହୁଛନ୍ତି ।
- କ'ଣ କହୁଛନ୍ତି ତାଲିମ ନେଇଥିବା ଯୁବତୀ:
ତାଲିମପ୍ରାପ୍ତ ଯୁବତୀ ପ୍ରତିଭା ପଟ୍ଟା କହିଛନ୍ତି," ମୁଁ ଗ୍ରାଜୁଏସନ କରି ସାରିଛି । ଘରେ ଦରକାର ପଡିଲେ ମୁଁ ଛେଳି ବି ଚାରାଏ । (ଆଦିବାସୀ ମହିଳା ଯୁବ ସେବା ସଂଗଠନର) ସଞ୍ଜୁଲତା ନାୟକ ସମ୍ବଲପୁରରେ ଏକ ବିୟୁଟିସିଆନ ୱାର୍କସପ କରୁଥିବା ଜାଣିବା ପରେ ମୁଁ ଏଠାକୁ ଆସିଲି । ଏଠାରେ ହେୟାର କଟିଂ ଓ ବିୟୁଟି ପ୍ରଡକ୍ଟର ଶିକ୍ଷା ଦେଉଛନ୍ତି । ଏଠାକୁ ଆସି ମୋତେ ବହୁତ ଖୁସି ଲାଗୁଛି । ମୁଁ କିଛି ଶିଖି ପାରିଲି । ଆହୁରି ବହୁତ କିଛି ଶିଖିବି । ଏହା ଦ୍ୱାରା ମୁଁ ଆଗକୁ ଭଲ ରୋଜଗାର କରିବି । ଆଉ ଅନ୍ୟମାନଙ୍କୁ ବି ଶିଖେଇ ପାରିବି । କିଛି ଟଙ୍କା ମଧ୍ୟ ରୋଜଗାର କରିବି ଯାହାଦ୍ୱାରା ଘରକୁ ମଧ୍ୟ ସହାୟତା ହୋଇପାରିବ ।"
- ବିନା ଖର୍ଚ୍ଚରେ ଟ୍ରେନିଂ:
ମେକପ ତାଲିମ ଦେବାକୁ ଆସିଥିବା ଅହମ୍ମଦାବାଦର ଏଚଡି ମେକଅପ ଥିଓରୀ ମାଷ୍ଟର ରାଜେଶ ପାରେଖ କହିଛନ୍ତି, ଆମକୁ ଯେତେବେଳେ ସଞ୍ଜୁ ନାୟକ କହିଥିଲେ ଯେ, ଆମେ ଆଦିବାସୀ ଯୁବତୀଙ୍କ ପାଇଁ କିଛି କରିବାକୁ ଚାହୁଁଛୁ, ମୁଁ ତାଙ୍କ ସହ ସହାଭାଗୀ ହୋଇଗଲି । ଝିଅମାନଙ୍କୁ ବିନା ଦେୟରେ ପଢ଼େଇବୁ ଓ ସହଯୋଗ କରିବୁ ଆମେ କହିଥିଲୁ । ଆପଣ ଯେକୌଣସି ସହରରେ କାର୍ଯ୍ୟକ୍ରମ ଆୟୋଜନ କରନ୍ତୁ କେଵଳ ମୋର ଆସିବା ଯିବାର ଖର୍ଚ୍ଚ ଦେଇ ଦେଲେ ମୁଁ ୩ରୁ ୪ ଦିନ ରହି ସେମାନଙ୍କୁ ତାଲିମ ଦେଇକି ଯିବି । ଏହାଦ୍ୱାରା ସେମାନଙ୍କ ମଧ୍ୟରେ ମେକଅପ ଓ ଫ୍ୟାସନକୁ ନେଇ ଅଭିଜ୍ଞତା ବୃଦ୍ଧି ପାଇବ । ଏହାଦ୍ୱାରା ସେମାନଙ୍କ ମଧ୍ୟରେ ବିୟୁଟି ପାର୍ଲର କରିବାକୁ ଆଗ୍ରହ ବଢିବ । ଆମ ପାଖରେ ୩୦ରୁ ୪୦ଟି ଉଚ୍ଚକୋଟିର ପାର୍ଲର ଅଛନ୍ତି ଯେଉଁମାନେ ଏହିଭଳି ଆଦିବାସୀ ଝିଅଙ୍କୁ ତାଲିମ ଦେବାକୁ ଆଗ୍ରହୀ ଅଛନ୍ତି । ଆମେ ଏହି ଝିଅମାନଙ୍କୁ ସେଠାରେ ୪୦ରୁ ୫୦ ହଜାର ଟଙ୍କାର କୋର୍ସ ମାଗଣାରେ ଶିଖେଇବୁ । ଏହା ଦ୍ୱାରା ସେମାନେ ସ୍ୱାବଲମ୍ବୀ ହୋଇ ପାରିବେ ।"
- ବଲିଉଡର ମେକଅପ ଆର୍ଟିଷ୍ଟ ଦେଉଛନ୍ତି ତାଲିମ:
ଅନ୍ୟପଟେ ତାଲିମ ଦେବାକୁ ଆସିଥିବା ବଲିଉଡର ମେକଅପ ଆର୍ଟିଷ୍ଟ ଧୀରା କପୁର କହିଛନ୍ତି, ଆମେ ଏହି ଝିଅମାନଙ୍କୁ ପ୍ରପର କଲର ସହିତ କାମ କରିବାକୁ ଶିଖାଉଛୁ । ମୁହଁ ହିସାବରେ କାମ କରିବାକୁ ଶିଖାଇବୁ । ଆଜିର ସମୟରେ କାହାରିକୁ ଅଲଗା ପ୍ରକାରର ମେକଅପ ଦରକାର ନାହିଁ । ନିଜ ନିଜ ଫେସ ହିସାବରେ ମେକଅପ ଦରକାର । ଯାହା କୌଣସି ବ୍ୟକ୍ତିର ଚେହରାକୁ ଆବଶ୍ୟକ ସେହି ହିସାବରେ ଆମେ ମେକଅପ ଦେବାକୁ ଶିଖେଇବୁ । ଯାହା ନ୍ୟାଚୁରାଲ ଅଟେ ଆମେ ତାହା ଶିଖାଉଛୁ, ସେମାନଙ୍କୁ ଆମେ ଆମ ନିଜସ୍ୱ ଶୈଳୀରେ ଶିଖେଇବାକୁ ଚେଷ୍ଟା କରୁଛୁ । ସେମାନଙ୍କ ପାଖରେ ବହୁତ ଇଚ୍ଛା ଶକ୍ତି ଅଛି, ବହୁତ ଶିଖିବାର ଇଚ୍ଛା ଅଛି । କିନ୍ତୁ ୩ ଦିନରେ ଏତେ କିଛି ଶିଖିବା ସମ୍ଭବ ନୁହେଁ l ତେଣୁ ଆଗକୁ ୧୫ ଦିନିଆ ତାଲିମ ଦେବାକୁ ଚେଷ୍ଟା କରିବୁ ।"
- ରୋଜଗାରକ୍ଷମ ହେବେ ଆଦିବାସୀ ଯୁବତୀ :
ତେବେ ଏହି ତାଲିମ ଶିବିରର ଆୟୋଜନରେ ମୁଖ୍ୟ ସହଯୋଗୀ ଥିବା ସ୍ବର୍ଣ୍ଣ ନାରୀ କଲ୍ୟାଣ ପରିଷଦ ଓ ଆଦିବାସୀ ମହିଳା ଯୁବ ସେବା ସଂଘର ପ୍ରମୁଖ ସଞ୍ଜୁଲତା ନାୟକ କହିଛନ୍ତି, "ଆମେ ଆଦିବାସୀମାନଙ୍କ ପାଇଁ ୫ ଶହ ଗ୍ରାମରେ କାମ କରୁଛୁ । ଆମର ଯୁବପିଢୀ ଦାଦନ ଖଟିବାକୁ କୋଲକାତା, ଦିଲ୍ଲୀ, ମୁମ୍ବାଇ ଯାଉଛନ୍ତି । ଝିଅମାନଙ୍କୁ ଚାକିରୀ ଦେବା ନାଁରେ ସେମାନଙ୍କୁ ଠକି ଦିଲ୍ଲୀ, ମୁମ୍ବାଇରେ ବିକ୍ରି କରାଯାଉଛି । ତେଣୁ ଆମେ କିଛି ଜଣ ଏନେଇ ଆଲୋଚନା କରି ଏହି ବିୟୁଟିସିଆନ କୋର୍ସ ତାଲିମ ଶିବିର ଆୟୋଜନ କଲୁ । ଏଠାରେ ଆମେ ୩୫ ଜଣ ଆଦିବାସୀ ଯୁବତୀଙ୍କୁ ମାଗଣାରେ ତାଲିମ ଦେଉଛୁ । ତାଲିମ ପାଇଁ ରାଜ୍ୟର ବିଭିନ୍ନ ଜିଲ୍ଲାର ସଫଳ ବିୟୁଟିସିଆନଙ୍କୁ ନିମନ୍ତ୍ରଣ କରାଯାଇଛି । ସେମାନଙ୍କ ସଫଳତାକୁ ଏହି ଆଦିବାସୀ ଯୁବତୀମାନଙ୍କୁ ଦେଖାଉଛୁ । ସେମାନେ ଘରେ ରହି କିପରି ରୋଜଗାର କରିକି ସଫଳତା ପାଇବେ ଏବଂ ସେମାନେ ବାହାର ରାଜ୍ୟକୁ ଦାଦନ ଖଟିବାକୁ ନ ଯିବେ ସେନେଇ ତାଲିମ ଦେଉଛୁ ।"
ଏହା ମଧ୍ୟ ପଢ଼ନ୍ତୁ...ସବାଇଘାସରୁ ଘରକରଣା ସାମଗ୍ରୀ: ମହିଳାଙ୍କୁ କରୁଛନ୍ତି ସ୍ବାବଲମ୍ବୀ, ରୋଜଗାର ବାଟ ଦେଖାଉଛନ୍ତି ଏହା ମଧ୍ୟ ପଢ଼ନ୍ତୁ...ମାଓ ମୁକାବିଲା ଟ୍ରେନିଂକୁ ସ୍ବାଗତ, ଶିକ୍ଷା ଭିତ୍ତିଭୂମିକୁ ସୁଦୃଢ କରିବାକୁ ଦାବି |
- ଯୁବତୀମାନଙ୍କୁ ମାଗଣା ଟ୍ରେନିଂ:
ତେବେ ଏହି କାର୍ଯ୍ୟକ୍ରମର ମୁଖ୍ୟ ଆୟୋଜିକା ପୁଷ୍ପାଞ୍ଜଳି ମହାକୁଡ଼ କହିଛନ୍ତି, "ଏଠାରେ ମେକଅପ୍ ଉପରେ ମାଷ୍ଟର କ୍ଲାସ ଦିଆଯାଉଛି । ଅଲଗା ସ୍ଥାନ ଅପେକ୍ଷା ଆମ ସମ୍ବଲପୁର ବହୁ ପଛରେ ଅଛି । ଆମ ଅଞ୍ଚଳରେ ଥିବା ଆଦିବାସୀ ପରିବାରଗୁଡିକ ପରିବାରର ଭରଣପୋଷଣରେ ବହୁତ ଅସୁବିଧାର ସମ୍ମୁଖୀନ ହେଉଛନ୍ତି । ଆଦିବାସୀ ଝିଅମାନେ ଦାଦନ ଖଟିବାକୁ ଅଲଗା ଅଲଗା ଜାଗା ଯାଇ ବହୁତ ସମସ୍ୟାର ସମ୍ମୁଖୀନ ହେଉଛନ୍ତି । ସେମାନଙ୍କ ସହ ଏଭଳି ଅସୁବିଧା ଯେମିତି ଆଗକୁ ନହେବ ସେଥିପାଇଁ ଏହି ମାଷ୍ଟର କ୍ଲାସ ତାଲିମର ବ୍ୟବସ୍ଥା କରାଯାଇଛି । ଆଦିବାସୀ ଯୁବତୀମାନଙ୍କୁ ପାର୍ଲର ତାଲିମ ଦିଆଯାଉଛି ।"
ଇଟିଭି ଭାରତ, ସମ୍ବଲପୁର
