ହାଇଦ୍ରାବାଦ: ବର୍ଷାରେ ମଶା ଦ୍ବାରା ହେଉଥିବା ରୋଗ ହେବାର ଆଶଙ୍କା ଯଥେଷ୍ଟ ବୃଦ୍ଧି ପାଇଥାଏ । ପ୍ରବଳ ବର୍ଷା, ପାଣି ଜମିବା ଏବଂ ବନ୍ୟା ପରି ପରିସ୍ଥିତିରେ ମଶାଙ୍କ ସଂଖ୍ୟା ବୃଦ୍ଧି ହୋଇଥାଏ । ମୌସୁମୀ ଏବଂ ପରବର୍ତ୍ତୀ ମାସରେ ଡେଙ୍ଗୁ, ମ୍ୟାଲେରିଆ ଏବଂ ଚିକେନଗୁନିଆ ଭଳି ରୋଗରେ ବହୁ ସଂଖ୍ୟାରେ ରୋଗୀମାନେ ଆକ୍ରାନ୍ତ ହେଉଥିବା ଦେଖିବାକୁ ମିଳେ । ବିଶେଷଜ୍ଞଙ୍କ କହିବାନୁସାରେ, ଡେଙ୍ଗୁ-ମ୍ୟାଲେରିଆ ବା ଚିକେଗୁନିଆ ଅତ୍ୟନ୍ତ ବିପଦଜ୍ଜନକ ଏବଂ ପ୍ରତିବର୍ଷ ଅନେକ ଲୋକ ସେମାନଙ୍କ ଯୋଗୁଁ ମୃତ୍ୟୁବରଣ କରନ୍ତି । ସେଥିପାଇଁ ଏହି ରୋଗରେ ଆକ୍ରାନ୍ତ ନ ହେବା ପାଇଁ ବିଶେଷ ଧ୍ୟାନ ଦେବା ଉଚିତ୍ । ତେବେ ଜାଣନ୍ତୁ ଏହି 3 ରୋଗ ବିଷୟରେ ।
ଡେଙ୍ଗୁ:
ଡେଙ୍ଗୁ ଏକ ମଶା ଜନିତ ରୋଗ । ସାଧାରଣତଃ ବର୍ଷା ଦିନେ ଏହା ଅଧିକ ବ୍ୟାପିଥାଏ । ଠିକ ସମୟରେ ଚିକିତ୍ସା କରାନଗଲେ ମୃତ୍ୟୁ ହେବା ମଧ୍ୟ ସମ୍ଭାବନା ଥାଏ । ଏହାର ପ୍ରାରମ୍ଭିକ ଲକ୍ଷଣ ସାଧାରଣ ଫ୍ଲୁ କିମ୍ବା ଭାଇରାଲ୍ ଜ୍ୱର ସହିତ ସମାନ, ଯେଉଁ କାରଣରୁ ଲୋକମାନେ ଏହାକୁ ଅଣଦେଖା କରନ୍ତି । ଫଳରେ ଗୁରୁତର ଅବସ୍ଥାରେ ରକ୍ତସ୍ରାବ, ନିମ୍ନ ରକ୍ତଚାପ ଏବଂ ମୃତ୍ୟୁ ମଧ୍ୟ ହୋଇପାରେ । ଡେଙ୍ଗୁ ଜ୍ୱର ଯୋଗୁଁ ରକ୍ତରେ ପ୍ଲେଟଲେଟର ଦ୍ରୁତ ହ୍ରାସ ଘଟିଥାଏ । ସବୁଠାରୁ ବଡ କଥା ହେଉଛି ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସିବା ଦ୍ୱାରା ଡେଙ୍ଗୁ ଜ୍ୱର ହୁଏ ନାହିଁ । ତେବେ ଏହି ରୋଗ ବର୍ତ୍ତିବା ପାଇଁ ମଶାମାନଙ୍କୁ ଏଡାଇବା ଉଚିତ୍ ଏବଂ ସତର୍କତା ଅବଲମ୍ବନ କରିବା ଉଚିତ ।
ଲକ୍ଷଣ:
- ମାଂସପେଶୀ ଏବଂ ଗଣ୍ଠିରେ ଯନ୍ତ୍ରଣା
- ମୁଣ୍ଡବିନ୍ଧା
- ଜ୍ୱର
- ଆଖି ଯନ୍ତ୍ରଣା, ମୁଣ୍ଡ ବୁଲାଇବା
- ବାନ୍ତି ଲାଗିବା
ମ୍ୟାଲେରିଆ:
ମ୍ୟାଲେରିଆ ମଧ୍ୟ ଡେଙ୍ଗୁ ଭଳି ବିପଦଜ୍ଜନକ ରୋଗ । ମାଇ ଏନୋଫିଲିସ ମଶା କାମୁଡିବା ଦ୍ବାରା ଏହା ହୋଇଥାଏ । ପ୍ଲାଜାମୋଡିୟମ୍ ବଂଶର ପ୍ରୋଟୋଜୋଆ ନାମକ ଜୀବାଣୁ ଏହି ମାଈ ମଶାଙ୍କ ପାଖରେ ରହିଥାଏ । ଯାହା ମଶା କାମୁଡ଼ିବା ମାତ୍ରେ ବ୍ୟକ୍ତିଙ୍କ ଶରୀରରେ ପ୍ରବେଶ କରିଥାଏ । ଏହି ଜୀବାଣୁ ଯକୃତ ଏବଂ ରକ୍ତ କଣିକାକୁ ସଂକ୍ରମିତ କରି ଜଣେ ବ୍ୟକ୍ତିଙ୍କୁ ଅସୁସ୍ଥ କରିଦିଏ । ଯଦି ଠିକ୍ ସମୟରେ ଚିକିତ୍ସା କରା ନଯାଏ, ତେବେ ଏହି ରୋଗର ବହୁତ ଗମ୍ଭୀର ପ୍ରଭାବ ପଡିପାରେ ଏବଂ ବେଳେବେଳେ ସାଂଘାତିକ ହୋଇପାରେ ।
ଲକ୍ଷଣ:
- ଜ୍ୱର ହେବା, ମୁଣ୍ଡ ବିନ୍ଧା ସହ କମ୍ପନ
- ଦିନେ ବା ଦୁଇ ଦିନ ବ୍ୟବଧାନରେ ଜ୍ବର ଲାଗିରହିବା
- ଦେହ, ହାତ, ଗୋଡ ବିନ୍ଧା
- ରୋଗ ଗମ୍ଭୀର ହେଲେ ମସ୍ତିଷ୍କ, କିଡନୀ ତଥା ଅନ୍ୟାନ୍ୟ ଅଙ୍ଗକୁ ଆକ୍ରାନ୍ତ କରିବା ସହ ଅକାମୀ କରିଦିଏ
- ପରିସ୍ରା ନ ହେବା
- ପରିସ୍ରାର ରଙ୍ଗ ନାଲି କିମ୍ବା କଳା ଦେଖାଯିବା
- ଅତ୍ୟଧିକ ବାନ୍ତି ହେବା ସହ ଔଷଧ ଖାଇଲେ ବି ବାନ୍ତି ହେବା ଇତ୍ୟାଦି
ଏହା ମଧ୍ୟ ପଢନ୍ତୁ: ଡେଙ୍ଗୁ, ମ୍ୟାଲେରିଆ ଏବଂ ଚିକେନଗୁନିଆ ସମୟରେ ଖାଆନ୍ତୁ ନାହିଁ ଏହି ମେଡିସିନ୍ !
ଚିକେନଗୁନିଆ:
ଚିକେନଗୁନିଆ ମଧ୍ୟ ମଶା ଦ୍ବାରା ହେଉଥିବା ଏକ ରୋଗ । ଏହା ଚିକେନଗୁନିଆ ଜୀବାଣୁ (CHIKV) ଦ୍ବାରା ବିସ୍ତାର ହୁଏ । ଏହାର ପ୍ରଥମ ଲକ୍ଷଣ ହେଉଛି ଜ୍ୱର ଏବଂ ଚର୍ମରେ ଦାଗ । ଜ୍ୱର ହଠାତ୍ ଆସେ ଏବଂ ଅଧିକା ଦେହ ଖରାପ ହୁଏ । ଏହା ସହିତ ଗଣ୍ଠି ଯନ୍ତ୍ରଣା, ମୁଣ୍ଡବିନ୍ଧା, ବାନ୍ତି ଏବଂ ବାନ୍ତି ଭଳି ସମସ୍ୟା ମଧ୍ୟ ହୋଇପାରେ । ଚିକେନଗୁନିଆ ପାଇଁ କୌଣସି ନିର୍ଦ୍ଦିଷ୍ଟ ଆଣ୍ଟିଭାଇରାଲ୍ ଔଷଧ ନାହିଁ । ମଶା ଦ୍ବାରା ହେଉଥିବା ଅନ୍ୟ ରୋଗ ପରି ଏହାକୁ ଚିକିତ୍ସା କରାଯାଏ । ଚିକେନଗୁନିଆର ଶିକାର ହୋଇଥିବା ରୋଗୀଙ୍କୁ ପ୍ରଚୁର ଜଳ ଏବଂ ତରଳ ପଦାର୍ଥ ପିଇବାକୁ ପରାମର୍ଶ ଦିଆଯାଏ ।
ମଶା ଜନିତ ରୋଗରୁ ରକ୍ଷା ପାଇବା ପାଇଁ ଉପାୟ:
- ମଶା ନ କାମୁଡ଼ିବା ପାଇଁ ସମସ୍ତ ପଦ୍ଧତି ଗ୍ରହଣ କରନ୍ତୁ
- ଶରୀରକୁ ଆଚ୍ଛାଦିତ କଲା ଭଳି ପୁରା ପୋଷାକ ପିନ୍ଧନ୍ତୁ
- ରାତିରେ ଶୋଇବା ସମୟରେ ଝରକା ଏବଂ କବାଟ ବନ୍ଦ ରଖନ୍ତୁ
- ମଶା ନେଟ୍ ବ୍ୟବହାର କରନ୍ତୁ
- ମଶା ଘଉଡାଇବା କଏଲ ବ୍ୟବହାର କରନ୍ତୁ, କିନ୍ତୁ ତାର ଧୂଆଁରୁ ନିଜକୁ ଦୂରେଇ ରଖନ୍ତୁ
(Disclaimer: ଉପରିସ୍ଥ ସମସ୍ତ ବିବରଣୀ କେବଳ ସାଧାରଣ ସୂଚନା ଉପରେ ଆଧାରିତ । କୌଣସି ସ୍ବାସ୍ଥ୍ୟ ସମସ୍ୟା ପାଇଁ ଡାକ୍ତରଙ୍କ ପରାମର୍ଶ ଅତ୍ୟନ୍ତ ଆବଶ୍ୟକ)
