ରାଉରକେଲା: ପରିବର୍ଦ୍ଧିତ ପୋଲିସ ବ୍ୟବସ୍ଥା ପାଇଁ ପ୍ରାଥମିକତାକୁ ଉନ୍ମୋଚନ କରିଛନ୍ତି ରାଉରକେଲା ଏସପି ମିତ୍ରଭାନୁ ମହାପାତ୍ର । ରାଉରକେଲାରେ ଏସପି ଭାବରେ ଯୋଗଦେବା ପରେ ପ୍ରଥମ ଥର ପାଇଁ ମିଡିଆ ସାମ୍ନାକୁ ଆସି ଏକ ସ୍ୱତନ୍ତ୍ର ସାମ୍ବାଦିକ ସମ୍ମିଳନୀ କରିଛନ୍ତି । ପୋଲିସକୁ ଅଧିକ ଲୋକାଭିମୁଖୀ କରିବା, ଅପରାଧର ପ୍ରଭାବଶାଳୀ ମୁକାବିଲା କରିବା ଏବଂ ବାସିନ୍ଦାଙ୍କ ସାମଗ୍ରିକ ଜୀବନଧାରଣର ମାନରେ ଉନ୍ନତି ଆଣିବା ପାଇଁ ଏକ ପରିକଳ୍ପନା ଉପସ୍ଥାପନ କରି ନିଜର ପ୍ରାଥମିକତା ସମ୍ପର୍କରେ ସୂଚନା ଦେଇଥିଲେ ।
ତେବେ ଏହି ସାମ୍ବାଦିକ ସମ୍ମିଳନୀର ପ୍ରମୁଖ ଲକ୍ଷ୍ୟ ହେଉଛି ରାଉରକେଲାବାସୀଙ୍କ ନିକଟରେ ସହଜରେ ପହଞ୍ଚି ପାରୁଥିବା ଏକ ଲୋକାଭିମୁଖୀ ପୋଲିସ ବାହିନୀ ପ୍ରତିଷ୍ଠା କରିବା । ଏହା ଦ୍ବାରା ସ୍ଥାନୀୟ ବାସିନ୍ଦାଙ୍କୁ ସହଜରେ ପୋଲିସ ନିକଟରେ ପହଞ୍ଚିବା ପାଇଁ ସଶକ୍ତ କରିବ । ଫଳରେ ଆଇନର ପ୍ରଭାବଶାଳୀ ପ୍ରୟୋଗ ଏବଂ ସମସ୍ୟାର ତ୍ୱରିତ ସମାଧାନ ହୋଇପାରିବ । ଏଥିସହ ବଢୁଥିବା ଅପରାଧର ମୁକାବିଲା ପାଇଁ ଚୋରି, ଲୁଟ୍, ନିଶା କାରବାର ବିରୋଧରେ ଲଢ଼େଇକୁ ଅଧିକ ମଜଭୁତ କରିବା ପାଇଁ ଏସ୍ପି ମହାପାତ୍ର ସଙ୍କଳ୍ପ ନେଇଛନ୍ତି ।
ସେହିପରି ଅପରାଧିକ ନେଟଓ୍ବାର୍କକୁ ଟାର୍ଗେଟ୍ କରିବା ପାଇଁ ସ୍ୱତନ୍ତ୍ର ୟୁନିଟ୍ ଗଠନ କରାଯିବା ନେଇ ସୂଚନା ଦେଇଛନ୍ତି । ଏଥିସହ ଗୁଇନ୍ଦା ସଂସ୍ଥା ଗୁଡ଼ିକ ସହ ସହଯୋଗ କରି ନେଟଓ୍ବାର୍କ ଗୁଡ଼ିକୁ ନଷ୍ଟ କରିବା ଏବଂ ଅପରାଧୀଙ୍କୁ ଦଣ୍ଡ ଦେବା ପାଇଁ ସକ୍ରିୟ ପଦକ୍ଷେପ ନିଆଯିବ । ତେବେ ରାଉରକେଲାକୁ ଏସପି ମହାପାତ୍ର ଶାନ୍ତି ଫେରାଇ ଆଣିବା ସହ ସମସ୍ତଙ୍କ ମଧ୍ୟରେ ସୁରକ୍ଷାର ଭାବନା ସୃଷ୍ଟି କରିବାକୁ ଲକ୍ଷ୍ୟ ରଖିଛନ୍ତି ।
ସହରର ବର୍ଦ୍ଧିତ ଜନସଂଖ୍ୟା ଏବଂ ଯାନବାହନର ଘନତା ବୃଦ୍ଧି ପାଉଥିବାରୁ ଏକ ସୁପରିକଳ୍ପିତ ଟ୍ରାଫିକ୍ ବ୍ୟବସ୍ଥା ଅତ୍ୟନ୍ତ ଗୁରୁତ୍ୱ ବହନ କରୁଛି । ସଡ଼କ ବ୍ୟବସ୍ଥାର ଦକ୍ଷ ପରିଚାଳନାର ଆବଶ୍ୟକତାକୁ ହୃଦୟଙ୍ଗମ କରି ସେ ବ୍ୟାପକ ଟ୍ରାଫିକ ପରିଚାଳନା ରଣନୀତି ପ୍ରଚଳନ କରିବାକୁ ଯୋଜନା କରିଛନ୍ତି । ଏଥିରେ ସଡ଼କ ଭିତ୍ତିଭୂମିରେ ଉନ୍ନତି, ବୁଦ୍ଧିମାନ ଟ୍ରାଫିକ ପରିଚାଳନା ବ୍ୟବସ୍ଥା କାର୍ଯ୍ୟକାରୀ କରିବା, ଟ୍ରାଫିକ ପୋଲିସ କର୍ମଚାରୀଙ୍କ ତାଲିମ ଓ ନିୟୋଜନ ବୃଦ୍ଧି ଆଦି ସାମିଲ ରହିଛି । ଏହି ପ୍ରୟାସ ମାଧ୍ୟମରେ ଏସ୍ପି ମହାପାତ୍ର ସହର ମଧ୍ୟରେ ଟ୍ରାଫିକ୍ ବ୍ୟବସ୍ଥାକୁ ସୁବ୍ୟବସ୍ଥିତ କରିବା, ଭିଡ଼ କମାଇବା, ସଡ଼କ ସୁରକ୍ଷା ବୃଦ୍ଧି କରିବା ପାଇଁ ଲକ୍ଷ୍ୟ ରଖିଛନ୍ତି ।
ତେବେ ଏହିସବୁ ପଦକ୍ଷେପ ଦ୍ୱାରା ରାଉରକେଲାରେ ପୋଲିସର ଭୂମିକାକୁ ପୁନର୍ବାର ପରିଭାଷିତ କରିବା ସହ ସେମାନଙ୍କୁ କେବଳ ଆଇନ୍ ଶୃଙ୍ଖଳାରେ ପରିଣତ କରିବା ନୁହେଁ ବରଂ ସମ୍ପ୍ରଦାୟର ବିଶ୍ବସ୍ତ ସହଯୋଗୀରେ ପରିଣତ କରିବା ପାଇଁ ଏସ୍ପି ମହାପାତ୍ର ଲକ୍ଷ୍ୟ ରଖିଛନ୍ତି। ତାଙ୍କର ଏହି ଯୋଜନାକୁ ଦେଖି ରାଉରକେଲାବାସୀ ଆଗାମୀ ଦିନରେ ହେବାକୁ ଥିବା ସକରାତ୍ମକ ପରିବର୍ତ୍ତନକୁ ଉତ୍ସୁକତାର ସହ ଅପେକ୍ଷା କରି ରହିଛନ୍ତି । ଅନ୍ୟପଟେ ଏପରି ଏକ ସହର ନିର୍ମାଣ କରିବା ଯାହା ସମସ୍ତ ବାସିନ୍ଦାଙ୍କ ପାଇଁ ସୁରକ୍ଷିତ, ସମୃଦ୍ଧ ହେବ ବୋଲି କହିଛନ୍ତି ରାଉରକେଲା ଏସପି ।
ଇଟିଭି ଭାରତ, ରାଉରକେଲା
