ରାଉରକେଲା: ଇଏସଆଇସି ମଡେଲ ହସ୍ପିଟାଲ ସମ୍ମୁଖରେ ବିକ୍ଷୋଭ ପ୍ରଦର୍ଶନ । କେନ୍ଦ୍ର ସରକାରଙ୍କ ଶ୍ରମିକ ବିରୋଧୀ ନୀତି ବିରୋଧରେ ବିକ୍ଷୋଭ ପ୍ରଦର୍ଶନ କରିଛନ୍ତି ଶ୍ରମିକ ଏବଂ ସିଆଇଟିୟୁର ସଦସ୍ୟ । ଇଏସଆଇସି ହସ୍ପିଟାଲରୁ ଶ୍ରମିକଙ୍କୁ ଅନ୍ୟତ୍ର ସେକେଣ୍ଡାରୀ ହସ୍ପିଟାଲକୁ ରେଫର ବନ୍ଦ କରିବା ନିର୍ଦ୍ଦେଶକୁ ନେଇ ବିରୋଧ ପ୍ରଦର୍ଶନ କରାଯାଇଛି ।
ମିଳିଥିବା ସୂଚନା ଅନୁଯାୟୀ, ଗତ ଏପ୍ରିଲ ୨୮ ତାରିଖରେ ଇଏସଆଇ କର୍ପୋରେସନର ଉପ ଚିକିତ୍ସକ ଆୟୁକ୍ତ ଡ.ରେଶମା ଶର୍ମା ଏକ ସର୍କୁଲାର ଜାରି କରିଥିଲେ । ଯେଉଁଥିରେ ପ୍ରାୟ ୨୪ ଲକ୍ଷରୁ ଊର୍ଦ୍ଧ୍ବ ଇଏସଆଇ ବୀମାଧାରୀ ଶ୍ରମିକ, କର୍ମଚାରୀ ଓ ସେମାନଙ୍କ ପରିବାରକୁ ଇଏସଆଇ ପକ୍ଷରୁ ଯୋଗାଇ ଦିଆଯାଉଥିବା ସେକେଣ୍ଡାରୀ ଓ ସୁପର ସ୍ପେସାଲିଟି ଚିକିତ୍ସା ସୁବିଧା ଆଗକୁ ଯୋଗାଇ ଦିଆଯିବ ନାହିଁ ବୋଲି ବୋର୍ଡର ନିଷ୍ପତ୍ତି ହୋଇଥିବା ପତ୍ର ଜରିଆରେ ଜଣାଇଥିଲେ ରେଶମା ଶର୍ମା । ଇଏସଆଇ କର୍ପୋରେସନ ଏଥିପାଇଁ ବିପୁଳ ଖର୍ଚ୍ଚାନ୍ତ ହେଉଥିବାରୁ ସେ ଏହି ସୁବିଧା ପ୍ରତ୍ୟାହାର କରିଥିବା ଏହି ପତ୍ରରେ ଉଲ୍ଲେଖ କରାଯାଇଥିଲା ।
ଏହି ନୂତନ ବ୍ୟବସ୍ଥା ଅନୁଯାୟୀ କେବଳ ଏମ୍ସ କିମ୍ବା ପିଜିଏ ହସ୍ପିଟାଲକୁ ରେଫର କରିବାକୁ ସର୍କୁଲାରରେ ନିର୍ଦ୍ଦେଶ ଦିଆଯାଇଛି । ଇଏସଆଇସିର ଏହି ଶ୍ରମିକ ବିରୋଧୀ ନୀତି ବିରୁଦ୍ଧରେ ଗୁରୁବାର ସିଆଇଟିୟୁ ଦଳ ପକ୍ଷରୁ ସୁନ୍ଦରଗଡ଼ ଜିଲ୍ଲା କମିଟି ଆହ୍ୱାନରେ ସ୍ଥାନୀୟ ଇ ଏସ ଆଇ ମଡେଲ ହସ୍ପିଟାଲ ଆଗରେ ବିକ୍ଷୋଭ ପ୍ରଦର୍ଶନ କରାଯାଇଛି । ବିକ୍ଷୋଭ ପ୍ରଦର୍ଶନ କରାଯିବା ସହ ହସ୍ପିଟାଲ ସୁପରିଟେଣ୍ଡଣ୍ଟଙ୍କ ଜରିଆରେ ଏକ ଦାବି ପତ୍ର କେନ୍ଦ୍ର ଶ୍ରମ ଓ ଇଏସଆଇସି ବିଭାଗର ମନ୍ତ୍ରୀ ଓ ବୋର୍ଡକୁ ପ୍ରଦାନ କରାଯାଇଛି। ତୁରନ୍ତ ଏହି ଶ୍ରମିକ ବିରୋଧୀ ସର୍କୁଲାରକୁ ପ୍ରତ୍ୟାହାର କରିବାକୁ ଦାବି ମଧ୍ୟ କରାଯାଇଛି । ଓଡ଼ିଶାରେ ଇଏସଆଇ ବୀମାଧାରୀ ପ୍ରାୟ ୮ ଲକ୍ଷରୁ ଊର୍ଦ୍ଧ୍ବ ଥିଲା ବେଳେ ଏଠାରେ ଏପର୍ଯ୍ୟନ୍ତ ଏକ ସୁପର ସ୍ପେସାଲିଟି ହସ୍ପିଟାଲ ନାହିଁ। କେବଳ ରାଉରକେଲାରେ ୧୦୦ ଶଯ୍ୟା ବିଶିଷ୍ଟ ଏକ ମଡେଲ ହସ୍ପିଟାଲ ରହିଛି । ଯାହା ଉପରେ ପଶ୍ଚିମ ଓଡ଼ିଶାର ପ୍ରାୟ ଲକ୍ଷାଧିକ ବୀମାଧାରୀ ଓ ତାଙ୍କ ପରିବାର ସଦସ୍ୟ ନିର୍ଭର କରିଥାଆନ୍ତି । ଅନ୍ୟାନ୍ୟ କେତେକ ସ୍ଥାନରେ ଡିସପେନସାରୀ ରହିଛି ।
ଇଏସଆଇସି ଗତ ବର୍ଷ ମାର୍ଚ୍ଚ ୧୬ ତାରିଖରେ ରାଉରକେଲାରେ ୨ଶହ ଶଯ୍ୟା ବିଶିଷ୍ଟ ସୁପର ସ୍ପେସାଲିଟି ହସ୍ପିଟାଲ ପ୍ରତିଷ୍ଠା ପାଇଁ ନିଷ୍ପତ୍ତି ଗ୍ରହଣ କରିଥିଲେ ମଧ୍ୟ ତାହା ଅଦ୍ୟାବଧି କାର୍ଯ୍ୟକାରୀ ହୋଇପାରି ନାହିଁ । ଏହା ଉପରେ ରେଫର ବନ୍ଦ କରିବା ଶ୍ରମିକ ମାନଙ୍କ ପାଇଁ ଏକ ବଡ ଝଟକା ପାଲଟିଛି । କେନ୍ଦ୍ର ସରକାରଙ୍କ ଶ୍ରମିକମାନଙ୍କ ପ୍ରତି ଥିବା ବୈମାତୃକ ମନୋଭାବ ଯୋଗୁଁ କେନ୍ଦ୍ର ଶ୍ରମ ମନ୍ତ୍ରଣାଳୟ ଓ ଇଏସଆଇସି ଏପରି ଶ୍ରମିକ ବିରୋଧୀ ସର୍କୁଲାର ଜାରି କରିଛି ବୋଲି ଅଭିଯୋଗ କରିଛି ସିଆଇଟିୟୁ । ବୀମାଧାରୀ ଶ୍ରମିକଙ୍କ ଝାଳ ବୁହା ଟଙ୍କାରେ ଇଏସଆଇସି ଗଠିତ ହୋଇଥିବା ବେଳେ ସେହି ଶ୍ରମିକ ଓ ତାର ପରିବାର ସଦସ୍ୟଙ୍କୁ ସେକେଣ୍ଡାରୀ ଏବଂ ସୁପର ସ୍ପେସାଲିଟି ଚିକିତ୍ସା ଯୋଗାଇ ଦେବାକୁ ଇଏସଆଇସି ଖର୍ଚ୍ଚାନ୍ତ ହେଉଥିବା କଥା କହିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିଛି ସିଆଇଟିୟୁ ।
ଇଟିଭି ଭାରତ, ସୁନ୍ଦରଗଡ
