ସୁବର୍ଣ୍ଣପୁର: ଆସନ୍ତାକାଲି (ଶନିବାର) ପୌର ନିର୍ବାଚନ ଫଳାଫଳ ଘୋଷଣା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ନିର୍ବାଚନ ଅଧିକାରୀ ତଥା ଉପ ଜିଲ୍ଲାପାଳ ନିହାର ରଞ୍ଜନ କଁଅରଙ୍କ ପ୍ରତ୍ୟକ୍ଷ ତତ୍ବାବଧାନରେ ସହରର ପୁରୁଣା ଟାଉନ ହଲ ଠାରେ ଭୋଟ ଗଣତି କରାଯିବ । ଭୋଟ ଗଣତି ପାଇଁ 10 ଗୋଟି ଟେବୁଲ କରାଯାଇଥିବା ବେଳେ ପାଞ୍ଚ ଗୋଟି ଟେବୁଲରେ ଅଧ୍ୟକ୍ଷ ପଦର ଭୋଟ ଗଣତି କରାଯିବ ।
ଏହାସହ ଆଉ ୫ଟିରେ କାଉନସିଲର ଭୋଟ ଗଣତି କରାଯିବ । ସକାଳ ୮ଟାରୁ ଭୋଟ ଗଣତି କାର୍ଯ୍ୟ ଆରମ୍ଭ ହେବାକୁ ଥିବା ବେଳେ ଭୋଟ ଗଣତିରେ ନିୟୋଜିତ କର୍ମଚାରୀମାନେ ସକାଳ 6 ଟାରେ ରିପୋଟିଂ କରିବେ । ଭୋଟ ଗଣତି ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ସେହିପରି ବିନିକା ଓ ତରଭା ବିଜ୍ଞାପିତ ଅଞ୍ଚଳ ପରିଷଦର ଭୋଟ ଗଣତି ପାଇଁ ବି ସ୍ଥାନୀୟ ପ୍ରଶାସନ ସବୁ ପ୍ରକାର ବ୍ୟବସ୍ଥା କରିଛି । ତେବେ ଫଳାଫଳ ଘୋଷଣା ହେବା ପୂର୍ବରୁ ଜନସାଧାରଣଙ୍କ ଭିତରେ ସେତେଟା ରାଜନୈତିକ ଫଳାଫଳର ଅଙ୍କକଷା ଚାଲି ନାହିଁ ବୋଲି ରାଜନନୈତିକ ସମୀକ୍ଷକ ମତ ଦେଇଛନ୍ତି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
