ସୁବର୍ଣ୍ଣପୁର: ଜିଲ୍ଲାରେ ଆଜି ସାପ୍ତାହିକ ସଟଡାଉନ ପ୍ରକ୍ରିୟା ଆରମ୍ଭ ହୋଇଯାଇଛି । ଶନିବାର ଓ ରବିବାର ଦୁଇ ଦିନ ସାପ୍ତାହିକ ସଟଡାଉନ ହୋଇଥିବା ବେଳେ ରାତ୍ରିକାଳୀନ କର୍ଫ୍ୟୁ ବଳବତ୍ତର ରହିଛି । କୋରୋନା ସଂକ୍ରମଣ ଦିନକୁ ଦିନ ବଢୁଥିବା ବେଳେ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଆଜି ଜିଲ୍ଳା ପ୍ରଶାସନ ଓ ଜିଲ୍ଲା ପୋଲିସ ପ୍ରଶାସନ ପକ୍ଷରୁ ସଟଡାଉନ ପାଳନ କରାଯାଉଛି । ଶନିବାର ସକାଳ ସମୟରୁ ସହରର ଦୋକାନ ବଜାର ବନ୍ଦ ରହିଛି ।
ସାରା ସହର ଜନଶୂନ୍ୟ ହୋଇ ପଡ଼ିଛି । ଗତକାଲି ଜିଲ୍ଲାରେ ସଂକ୍ରମିତ ବ୍ୟକ୍ତି 65 ଚିହ୍ନଟ ହୋଇଥିଲେ। ଜିଲ୍ଲାରେ ଏବେ ଅନେକ ଲୋକ ସଚେତନ ହୋଇଛନ୍ତି । ତେବେ ଆଜି ସ୍ବତଃ ସହରବାସୀ ସଟଡାଉନ ପାଳନ କରିଛନ୍ତି ।
କାଁ ଭାଁ ଗାଡି ମୋଟର ଚଳାଚଳ ଓ ଜରୁରୀ କାଳୀନ ସେବାକୁ ବାଦ ଦେଲେ ପରେ ସାରା ସହର ସମ୍ପୂର୍ଣ୍ଣ ବନ୍ଦ ହୋଇଛି । ତେବେ କୋରୋନାର ଦ୍ଵିତୀୟ ଲହର ଜିଲ୍ଲାବାସୀଙ୍କୁ ଭୟଭୀତ କରିଥିବା ଅନୁମାନ କରାଯାଉଛି । ସହରର ବିଭିନ୍ନ ଛକରେ ପୋଲିସ ପକ୍ଷରୁ ଚେକିଂ କରାଯାଉଛି । ନିଜେ ଜିଲ୍ଲା ଆରକ୍ଷୀ ଅଧିକ୍ଷକ ସୀତାରାମ ଶତପଥୀ ପୋଲିସ ବ୍ୟବସ୍ଥାର ତଦାରଖ କରୁଛନ୍ତି। ସହରରେ ଜରୁରୀ ସେବାକୁ ଛାଡିଦେଲେ ସବୁ ବନ୍ଦ ରହିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
