ବଲାଙ୍ଗୀର: ଜିଲ୍ଲାରେ ଥମୁନି ଦାଦନ ଯନ୍ତ୍ରଣା । ପେଟ ପାଟଣା ପାଇଁ ବାହାର ରାଜ୍ୟକୁ ଯାଇଥିବା ଦାଦନ ଶ୍ରମିକ ଅକଥନୀୟ ନିର୍ଯାତନାର ଶିକାର ହୋଇଥିବା ଅଭିଯୋଗ ଆସିଛି । ସୋସିଆଲ ମିଡିଆରେ ଅଭିଯୋଗ ଆସିବା ପରେ ସ୍ଥାନୀୟ ପ୍ରଶାସନ ସାହାଯ୍ୟରେ ଉଦ୍ଧାର ହୋଇଛନ୍ତି ଶତାଧିକ ଦାଦନ ଶ୍ରମିକ ।
ବଲାଙ୍ଗୀରରେ ଥମୁନି ଦାଦନ ଯନ୍ତ୍ରଣା:
ଅନେକ ସରକାରୀ ପ୍ରଚେଷ୍ଟା ପରେ ବଲାଙ୍ଗୀରରେ ଥମୁନି ଦାଦନ ଯନ୍ତ୍ରଣା । ପେଟ ପାଟଣା ପାଇଁ ଲକ୍ଷାଧିକ ଗରିବ ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି ଏବଂ ସେଠି ଅକଥନୀୟ ନିର୍ଯାତନା ପାଉଥିବାର ଅଭିଯୋଗ ଆସୁଛି । ମଙ୍ଗଳବାର ତେଲେଙ୍ଗାନା ରାଜ୍ୟରୁ ଶତାଧିକ ଦାଦନ ଶ୍ରମିକ ସ୍ଥାନୀୟ ପ୍ରଶାସନ ଦ୍ୱାରା ଉଦ୍ଧାର ହୋଇଛନ୍ତି । ବଲାଙ୍ଗୀର ଜିଲ୍ଲାର ପାଟଣାଗଡ଼, ବେଳପଡା ଓ ଖପ୍ରାଖୋଲା ବ୍ଲକର ବିଭିନ୍ନ ଗ୍ରାମରୁ ଶତାଧିକ ଗରିବ ପେଟ ପାଟଣା ପାଇଁ ସ୍ଥାନୀୟ ଦାଦନ ସରଦାରମାନଙ୍କ ଠାରୁ ଅଗ୍ରୀମ ଟଙ୍କା ନେଇ ଦାଦନ ଖଟିବାକୁ ତେଲେଙ୍ଗାନାର ୟାଦରି ଜିଲ୍ଲାର ଏକ ଇଟା ଭାଟିକୁ ଯାଇଥିଲେ ।
ଶତାଧିକ ଦାଦନ ଶ୍ରମିକ ଉଦ୍ଧାର:
ହେଲେ ସେଠି ସେମାନଙ୍କୁ ଖାଇବା ନ ଦେବା ସହ ଇଟାଭାଟି ମାଲିକ ମାନସିକ ଓ ଶାରୀରିକ ନିର୍ଯାତନା ଦେଇ ଆସୁଥିଲେ । ଏପରିକି ବୃଦ୍ଧ ଓ ଶିଶୁମାନଙ୍କୁ ମଧ୍ୟ ନିର୍ଯାତନା ଦିଆଯାଇଥିବା ଅଭିଯୋଗ ଆସିଛି । ପୀଡିତମାନେ ଉଦ୍ଧାର ପାଇଁ ଦାବି କରିଥିବା ବେଳେ କେବିକେ ସଂଗଠନ ଓ ସମତା ସଂଗଠନ ଏହାକୁ ନେଇ ସାମାଜିକ ଗଣ ମାଧ୍ୟମରେ ସରକାରଙ୍କ ନିକଟରେ ଅପିଲ କରିଥିଲେ । ସେପଟେ ସ୍ଥାନୀୟ ପ୍ରଶାସନ ଏହାକୁ ଭିତ୍ତି କରି ସମସ୍ତ ଦାଦନ ଶ୍ରମିକଙ୍କୁ ସମ୍ପୃକ୍ତ ଇଟାଭାଟିରୁ ଉଦ୍ଧାର କରିଛି ଓ ସେମାନଙ୍କୁ ଟ୍ରେନ ଯୋଗେ ବଲାଙ୍ଗୀର ପଠାଇଥିଲା ସ୍ଥାନୀୟ ପ୍ରଶାସନ । ଏଥିରେ 15 ଜଣ ଶିଶୁ ଥିବା ବେଳେ 55 ଜଣ ପୁରୁଷ ଓ 45 ଜଣ ମହିଳା ଅଛନ୍ତି ।
ଆରପିଏଫ ବଢାଇଲା ସାହାଯ୍ୟର ହାତ:
ସମସ୍ତେ ବଲାଙ୍ଗୀର ରେଳ ଷ୍ଟେସନରେ ଆସି ପହଞ୍ଚିବା ପରେ ପ୍ରାଥମିକ ତଦନ୍ତ ପରେ ବଲାଙ୍ଗୀର ଆରପିଏଫ ଏମାନଙ୍କୁ ସାହାଯ୍ୟରେ ହାତ ବଢ଼ାଇଛି । ବଲାଙ୍ଗୀର ପ୍ରଶାସନକୁ ଏହାର ଖବର ଦେବା ସହ ସମସ୍ତଙ୍କୁ ନିଜ ନିଜ ଗାଁକୁ ପଠାଇବାକୁ ବ୍ୟବସ୍ଥା କରିଛି । ଉଦ୍ଧାର ହୋଇଥିବା ଶ୍ରମିକ ବିଶ୍ୱମୋହନ ମାଝି କହିଛନ୍ତି,"ପେଟ ପାଟଣା ପାଇଁ ଏଠିକାର ଦାଦନ ସରଦାରଠାରୁ କିଛି ଟଙ୍କା ନେଇଥିଲୁ । ସେ ଆମକୁ ଗତ ଦଶହରା ମାସରେ ତେଲେଙ୍ଗାନା ରାଜ୍ୟର ଏକ ଇଟା ଭାଟିକୁ ପଠାଇ ଥିଲା । ଯେଉଁଠି ଆମେ ସପରିବାର ଥିବା ବେଳେ ଇଟା ଭାଟି ମାଲିକ ଆମକୁ ବିଭିନ୍ନ ପ୍ରକାର ନିର୍ଯାତନା ଦେଇ ଆସୁଥିଲା । ଖାଇବା ନ ଦେବା ସହ ରାତି ଦୁଇଟାରୁ ଆମକୁ କାମ କରିବାକୁ ବାଧ୍ୟ କରୁଥିଲା । ସେହିପରି କାମ ନ କଲେ ଆମକୁ ସେ ମାଡ ପିଟ କରୁଥିଲା । ଯାହାପରେ ଆମେ ଜୀବନ ଭୟରେ ସାହାଯ୍ୟ ଲୋଡି଼ିଥିଲୁ । ସେଠିକାର ପ୍ରଶାସନ ଆମକୁ ଉଦ୍ଧାର କରି ଟ୍ରେନ ଯୋଗେ ବଲାଙ୍ଗୀର ପଠାଇଛି । ଅନ୍ୟପଟେ ଏଠି ଆମକୁ ଦାଦନ ସରଦାର ଧମକ ଚମକ ଦେଉଛି । ତେଣୁ ଆମର ସୁରକ୍ଷା ଓ ଥଇଥାନ ପାଇଁ ଆମେ ସରକାରଠାରେ ନିବେଦନ କରୁଛୁ ।"
ସେପଟେ ବଲାଙ୍ଗୀରରେ ରେଳ ଷ୍ଟେସନରେ ପହଞ୍ଚିବା ପରେ ଶ୍ରମିକମାନଙ୍କୁ ସାହାଯ୍ୟର ହାତ ବଢାଇଥିଲା ଆରପିଏଫ ପୋଲିସ । ସମସ୍ତଙ୍କୁ ଖାଇବାକୁ ଦେବା ସହ ଗାଁକୁ ପଠାଇବାର ବ୍ୟବସ୍ଥା କରିଥିଲା । ଏନେଇ ଆରପିଏଫ ଅଧିକାରୀ ଆର ସିଂ କହିଛନ୍ତି,"ଏହି ଉଦ୍ଧାର ସମସ୍ତ ଶ୍ରମିକ ଷ୍ଟେସନରେ ଆସି ପହଞ୍ଚି ଥିଲେ । ସେମାନଙ୍କୁ ତେଲେଙ୍ଗାନାର ସ୍ଥାନୀୟ ପ୍ରଶାସନ ଏମାନଙ୍କୁ ଉଦ୍ଧାର କରି ବଲାଙ୍ଗୀର ପଠାଇଛନ୍ତି । ଆମେ ବଲାଙ୍ଗୀର ପ୍ରଶାସନକୁ ଯୋଗାଯୋଗ କରିବାକୁ ଚେଷ୍ଟା କରିଛୁ । ସମସ୍ତଙ୍କ ପାଇଁ କିଛି ଖାଇବା ବ୍ୟବସ୍ଥା କରିବା ସହ ବସ ଯୋଗେ ତାଙ୍କୁ ତାଙ୍କ ଗାଁକୁ ପଠାଇବା ବ୍ୟବସ୍ଥା କରିଛୁ । "
ବଲାଙ୍ଗୀର, ଇଟିଭି ଭାରତ
