ସୁବର୍ଣ୍ଣପୁର: ପ୍ରତିଟି ଗାଁକୁ ପାଣି ଯୋଗାଇବା ପାଇଁ ସରକାରଙ୍କ ମାଳମାଳ ଯୋଜନା । ପ୍ରତ୍ୟେକଟି ଗାଁରେ ତିଆରି ହେଇଛି ବିଶାଳ ବିଶାଳ ପାଣିଟାଙ୍କି । ହେଲେ ପାଣି ଟାଙ୍କିରେ ନାହିଁ ପାଣି । କେତେବେଳେ ଯାନ୍ତ୍ରିକ ତୃଟି ତ କେତେବେଳେ ରକ୍ଷଣ ବେକ୍ଷଣର ଅଭାବ । ଫଳରେ ଶତାଧିକ ଲୋକ ପାଣି ଟୋପାଏ ପାଇବାରୁ ବଞ୍ଚିତ । ସେହିପରି ପାଣି ଟାଙ୍କି ଥାଇ ମଧ୍ୟ ରକସା ପଞ୍ଚାୟତର ହିଙ୍ଗମା ଗାଁରେ ପାନୀୟ ଜଳର ସଙ୍କଟ ଦେଖିବାକୁ ମିଳିଛି । ଗାଁରେ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ ପାନୀୟ ଜଳ ପ୍ରକଳ୍ପ ତିଆରି କରାଯାଇଛି । ହେଲେ ପ୍ରକଳ୍ପର ଅନେକ ଯନ୍ତ୍ରାଂଶ ଏବେ କାର୍ଯ୍ୟ କରୁ ନଥିବାରୁ ଅଧିକାଂଶ ସମୟରେ ପ୍ରକଳ୍ପରୁ ଲୋକେ ପାଣି ପାଉ ନାହାଁନ୍ତି ।
ଗାଁ ଲୋକଙ୍କୁ ପାଣି ଯୋଗାଇ ଦେବାକୁ ଗାଁରେ ନୂତନ ପାଇପ୍ ଲାଇନ୍ ବିଛା ହୋଇ ଷ୍ଟାଣ୍ଡ୍ ପୋଷ୍ଟ୍ ମଧ୍ୟ ତିଆରି କରାଯାଇଛି । ଦୀର୍ଘ ଦିନ ହେଲା ନୂତନ ପାଇପ ଲାଇନ କାର୍ଯ୍ଯ ଶେଷ ହୋଇ ଥିଲେ ହେଁ ସେହି ପାଇପ ଲାଇନକୁ କାର୍ଯ୍ୟକ୍ଷମ କରିବା ପାଇଁ ବିଭାଗୀୟ ଯନ୍ତ୍ରୀ ତତ୍ପରତା ପ୍ରକାଶ କରୁ ନଥିବା ଅଭିଯୋଗ ହୋଇଛି । ନୂତନ ପାଇପ ଲାଇନର ମଧ୍ୟମରେ ପ୍ରତ୍ୟେକ ଘରକୁ ପାଣି ସଂଯୋଗ ବି ଦିଆଯାଉ ନାହିଁ । ପୁରୁଣା ପାଇପ ଲାଇନ ଯୋଗେ ପାଣି ଦେଉ ଥିବାରୁ ପ୍ରାୟ 90 ପ୍ରତିଶତ ପ୍ରକଳ୍ପ ପାଣି ନଷ୍ଟ ହେଉଥିବା ଗାଁ ଲୋକେ ଅଭିଯୋଗ କରିଛନ୍ତି ।
ରକସା ପଞ୍ଚାୟତର ଅଭିମନ୍ୟୁ ଡାଙ୍ଗ କହିଛନ୍ତି, "ପ୍ରାୟ ଦେଢ ବର୍ଷ ହେଲା ପ୍ରକଳ୍ପ ପାଇଁ ଏକ ନୂତନ ପମ୍ପ ଘର ତିଆରି କରାଯାଉଛି ଯେ ତାହା ସଂପୂର୍ଣ୍ଣ ହେବାର ନାଁ ଧରୁନାହିଁ । ଏହି ନୂତନ ପମ୍ପ ଘର ନିର୍ମାଣରେ ନିମ୍ନମାନର ସାମଗ୍ରୀ ବ୍ୟବହାର କରାଯାଉଛି । ତେବେ ଦିନକୁ ଦିନ ଖରା ତାତି ବଢ଼ିବାରେ ଲାଗିଥିବା ବେଳେ ଏହି ପ୍ରଚଣ୍ଡ ଗ୍ରୀଷ୍ମ କାଳରେ ଗାଁ ଲୋକେ ପାଣି ମୁନ୍ଦାଏ ପାଇଁ ଡହଳ ବିକଳ ହେଉଛନ୍ତି । ଗାଁ ପୋଖରୀ ଅବା ଏକମାତ୍ର ନଳକୂଅ ଏକମାତ୍ର ସାହାରା । ହେଲେ ଅଧିକ ଗରମ କାରଣରୁ ପୋଖରୀରୁ ପାଣି ଶୁଖିଗଲାଣି, କଳରେ ବହୁବାର ମାରିବା ପରେ ପାଣି ବାହାରୁଛି । ଗାଁର ମହିଳାମାନେ ସକାଳୁ ସକାଳୁ ନିକଟରେ ଲମ୍ବାଧାଡି କରୁଛନ୍ତି । ଗାଁରେ ପ୍ରକଳ୍ପ ଥାଇ ମଧ୍ୟ ଲୋକେ ପାନୀୟ ଜଳ କଷ୍ଟ ଭୋଗ କରୁଛନ୍ତି । ବିଭାଗୀୟ ଯନ୍ତ୍ରୀଙ୍କୁ ବାରମ୍ବାର ଅନୁରୋଧ କଲେ ବି ଦାବି ଶୁଣୁ ନାହିଁନ୍ତି ଯନ୍ତ୍ରୀ । ପାନୀୟ ଜଳ ସମସ୍ୟା ସମାଧାନ କରିବା ପାଇଁ ଆଜି ବିଭାଗୀୟ କର୍ତ୍ତୃପକ୍ଷଙ୍କୁ ଲିଖିତ ଭାବେ ଜଣାଇଛୁ।" ତେବେ ତୁରନ୍ତ ଏହାର ପ୍ରତିକାର ନକଲେ ଆଗକୁ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।
ଇଟିଭି ଭାରତ, ସୁବର୍ଣ୍ଣପୁର
