ନୂଆଦିଲ୍ଲୀ: ଆଜିଠୁ ଦିଲ୍ଲୀରେ ଆରମ୍ଭ ହେଲା ଆତିଶୀ ଯୁଗ । ଦେଶର ସର୍ବକନିଷ୍ଠ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଆତିଶୀ ମର୍ଲେନା । ରାଜଭବନରେ ଉପରାଜ୍ୟପାଳ ଭିକେ ସକ୍ସେନା ତାଙ୍କୁ ପଦ ଗୋପନୀୟତାର ଶପଥପାଠ କରାଇଛନ୍ତି । ଆତିଶୀଙ୍କ ସହ କ୍ୟାବିନେଟର 5 ମନ୍ତ୍ରୀ ମଧ୍ୟ ତାଙ୍କ ସହ ଶପଥ ନେଇଛନ୍ତି । ସେମାନେ ହେଲେ ଗୋପାଳ ରାୟ, କୈଳାଶ ଗେହଲୋଟ, ସୌରଭ ଭରଦ୍ବାଜ, ଇମରାନ ହୁସେନ ଓ ମୁକେଶ ଅହଲାବତ । ନିରାଡମ୍ବର ଭାବେ ଶପଥ ଗ୍ରହଣ ସମାରୋହ ଅନୁଷ୍ଠିତ ହୋଇଥିବା ବେଳେ ଏଥିରେ କେବଳ ସଚିବ ସ୍ତରୀୟ ଅଧିକାରୀ ଉପସ୍ଥିତ ଥିଲେ । ଅରବିନ୍ଦ କେଜ୍ରିୱାଲ ଇସ୍ତଫା ଦେବା ପରେ ଖାଲି ପଡିଥିଲା ମୁଖ୍ୟମନ୍ତ୍ରୀ ଆସନ ।
ମାତ୍ର ଦେଢ ବର୍ଷରେ ମନ୍ତ୍ରୀରୁ ମୁଖ୍ୟମନ୍ତ୍ରୀର ଯାତ୍ରା:
ମନ୍ତ୍ରୀ ହେବାର ମାତ୍ର ଦେଢ ବର୍ଷ ମଧ୍ୟରେ ମୁଖ୍ୟମନ୍ତ୍ରୀ ଆସନ ଅଳଙ୍କୃତ କରିଛନ୍ତି ଆତିଶୀ । ଦିଲ୍ଲୀ ମଦ ଦୁର୍ନୀତି ମାମଲାରେ ଓ ଆର୍ଥିକ ଅନିୟମିତତା ମାମଲାରେ ଫସିଥିବା କ୍ରେଜିୱାଲଙ୍କ ଦୁଇ ମନ୍ତ୍ରୀ ମନିଷ ସିସୋଦିଆ ଓ ସତେନ୍ଦ୍ର ଜୈନ ଇସ୍ତଫା ଦେଇଥିଲେ । ଏହାପରେ ମନ୍ତ୍ରୀମଣ୍ଡଳରେ ଆତିଶୀ ଓ ସୌରଭ ଭରଦ୍ବାଜଙ୍କୁ ସାମିଲ କରିଥିଲେ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ଗତବର୍ଷ ମାର୍ଚ୍ଚ 23ରେ କେଜ୍ରିୱାଲଙ୍କ ମନ୍ତ୍ରୀମଣ୍ଡଳରେ ସାମିଲ ହୋଇଥିଲେ ଆତିଶୀ ।
#WATCH | AAP leader Atishi takes oath as Chief Minister of Delhi pic.twitter.com/R1iomGAaS9
— ANI (@ANI) September 21, 2024
ସେଲିବ୍ରେସନଙ୍କୁ ଆତିଶୀଙ୍କ ନା:
ଯେଉଁ ଦିନ ବିଧାୟକ ଦଳ ନେତା ଭାବେ ଆତିଶୀଙ୍କୁ ଚୟନ କରାଯାଇଥିଲା ସେହିଦିନ ସେଲିବ୍ରେସନ ନକରିବାକୁ ସମର୍ଥକଙ୍କୁ ଅପିଲ କରିଥିଲେ ଆତିଶୀ । କହିଥିଲେ, ମୁଁ ସମସ୍ତଙ୍କୁ ନିବେଦନ କରୁଛି ମୋତେ ଅଭିନନ୍ଦନ ଜଣାନ୍ତୁ ନାହିଁ କିମ୍ବା ଫୁଲମାଳ ପିନ୍ଧାନ୍ତୁ ନାହିଁ । କେଜ୍ରିୱାଲଙ୍କୁ ଇସ୍ତଫା ଦେଇଥିବାରୁ ମୁଁ ଦୁଃଖିତ ।
ଦିଲ୍ଲୀ ପାଇଲା ତୃତୀୟ ମହିଳା ମୁଖ୍ୟମନ୍ତ୍ରୀ:
#WATCH | AAP leader Kailash Gahlot takes oath as Minister in CM Atishi led Delhi govt. pic.twitter.com/oCgGg03gHc
— ANI (@ANI) September 21, 2024
ତେବେ ନିର୍ଦ୍ଧାରିତ ସମୟ 4.30 ବେଳେ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ଆତିଶୀ । ତେବେ ଦିଲ୍ଲୀରେ 3 ମହିଳା ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ଆତିଶୀ । ତାଙ୍କ ପୂର୍ବରୁ କଂଗ୍ରେସ ନେତ୍ରୀ ସିଲା ଦିକ୍ଷୀତ 15 ବର୍ଷ ଧରି ଦିଲ୍ଲୀର ମୁଖ୍ୟମନ୍ତ୍ରୀ ରହିଥିଲେ । ତାଙ୍କ ପୂର୍ବରୁ ଦିବଙ୍ଗତ ବିଜେପି ନେତ୍ରୀ ସୁଷମା ସ୍ବରାଜ ମୁଖ୍ୟମନ୍ତ୍ରୀ ହୋଇସାରିଛନ୍ତି ।
ସବୁଠୁ ଅଧିକ ବିଭାଗ ଆତିଶୀଙ୍କ ହାତରେ:
ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବା ପୂର୍ବରୁ ଅରିବିନ୍ଦ କେଜ୍ରିୱାଲଙ୍କ ସରକାରରେ ସବୁଠୁ ଅଧିକ ବିଭାଗ ଆତିଶୀଙ୍କ ହାତରେ ଥିଲା । ଅର୍ଥ, ରାଜସ୍ବ, ଯୋଜନା, ମହିଳା ବିକାଶ, ଶିକ୍ଷା, ଉଚ୍ଚ ଶିକ୍ଷା, ପର୍ଯ୍ୟଟନ, କଳା ଓ ସଂସ୍କୃତି ଓ ଭାଷା, ଲୋକ ନିର୍ମାଣ ବିଭାଗ, ବିଦ୍ୟୁତ, ସୂଚନା ଓ ଜନସମ୍ପର୍କ ଓ ସେବା ସତର୍କତା ଭଳି ବିଭାଗର ମନ୍ତ୍ରୀ ଥିଲେ ଆତିଶୀ ।
କ୍ୟାବିନେଟରେ ନୂଆ ଚେହେରା ମୁକେଶ ଅହଲାବତ:
ଆତିଶୀଙ୍କ ସହ 5 ଜଣ କ୍ୟାବିନେଟ ମନ୍ତ୍ରୀ ଶପଥ ନେଇଛନ୍ତି । ସେଥିରୁ ସମସ୍ତେ ପୁରୁଣା ଚେହେରା ହୋଇଥିବା ବେଳେ କେବଳ ନୂଆ ଚେହେରା ଭାବେ ମୁକେଶ ଅହଲାବତ ଶପଥ ନେଇଛନ୍ତି । ଦଳିତ କୋଟାରୁ ବିଧାୟକ ଥିବା ମୁକେଶଙ୍କୁ ମନ୍ତ୍ରୀମଣ୍ଡଳରେ ସାମିଲ କରି ଆଗାମୀ ବିଧାନସଭା ନିର୍ବାଚନରେ ଭୋଟ ବ୍ୟାଙ୍କ ଉପରେ ଆପ୍ର ଆଖି ଥିବା ଚର୍ଚ୍ଚା ହେଉଛି ।
କିଏ କିଏ ନେଲେ ଶପଥ
- ଆତିଶୀ ମର୍ଲେନା - ମୁଖ୍ୟମନ୍ତ୍ରୀ
- ଗୋପାଳ ରାୟ- କ୍ୟାବିନେଟ ମନ୍ତ୍ରୀ
- କୈଳାଶ ଗେହେଲୋଟ- କ୍ୟାବିନେଟ ମନ୍ତ୍ରୀ
- ଇମରାନ ହୁସେନ - କ୍ୟାବିନେଟ ମନ୍ତ୍ରୀ
- ସୌରଭ ଭରଦ୍ବାଜ- କ୍ୟାବିନେଟ ମନ୍ତ୍ରୀ
- ମୁକେଶ ଅହଲାବତ-କ୍ୟାବିନେଟ ମନ୍ତ୍ରୀ
ବ୍ୟୁରୋ ରିପୋର୍ଟ, ଇଟିଭି ଭାରତ
