ସୁବର୍ଣ୍ଣପୁର: ପ୍ରେମୀଯୁଗଳଙ୍କୁ ବିବାହ ବନ୍ଧନରେ ବାନ୍ଧିଲା ପୋଲିସ । ସୁବର୍ଣ୍ଣପୁର ଜିଲ୍ଲା ଲଛିପୁର ପୋଲିସର ଏଭଳି କାର୍ଯ୍ୟ ଏବେ ଚର୍ଚ୍ଚାର ବିଷୟ ପାଲଟିଛି । ଘରଲୋକଙ୍କ ସହମତି ନ ମିଳିବାରୁ ଏକ ପ୍ରେମୀଯୁଗଳ ପୋଲିସର ଶରଣ ପଶିଥିଲେ । ଯାହାପରେ ପୋଲିସ ଉଭୟଙ୍କ ପରିବାରକୁ ବୁଝାସୁଝା କରାଇ ମନ୍ଦିରରେ ଉକ୍ତ ଯୁବକ ଯୁବତୀଙ୍କ ବିବାହ କରାଇଛନ୍ତି ।
ସୂଚନାଯୋଗ୍ୟ, ତମାମୁରା ଗାଁର ଆଷାଢୁ ବଗର୍ତ୍ତିଙ୍କ 22ବର୍ଷୀୟ ପୁଅ ଶିବା ଶଙ୍କର ବାଦିପଡିଆ ଗାଁର ରମେଶ ଭୋଇଙ୍କ 20 ବର୍ଷୀୟ ଝିଅ ପଦ୍ମିନୀକୁ ଭଲ ପାଉଥିଲେ । ପ୍ରାୟ ଦୁଇ ବର୍ଷ ଧରି ତାଙ୍କ ଭିତରେ ପ୍ରେମ ସମ୍ପର୍କ ରହିଥିଲା ଏବଂ ଉଭୟ ପରସ୍ପରକୁ ବିବାହ କରିବାକୁ ମନସ୍ଥ କରିଥିଲେ । ମାତ୍ର ଏହାକୁ ସେମାନଙ୍କ ପରିବାର ଲୋକ ବିରୋଧ କରିବାରୁ ଉଭୟ ପୋଲିସ ପାଖରେ ପହଞ୍ଚି ଅଭିଯୋଗ କରିଥିଲେ । ତେବେ ସେମାନେ ସାବାଳକ ଥିବାରୁ ପୋଲିସ ସେମାନଙ୍କ ପରିବାର ଲୋକଙ୍କୁ ବୁଝାଇ ସୁଝାଇ ଉଭୟଙ୍କ ପରିବାରର ଉପସ୍ଥିତିରେ ଆଜି ସ୍ଥାନୀୟ ଶିବ ମନ୍ଦିରରେ ବିବାହ କରାଇଛନ୍ତି ।
ପୋଲିସର ପରାମର୍ଶ କ୍ରମେ ଆସନ୍ତା ସୋମବାର ନବବିବାହିତ ପ୍ରେମୀଯୁଗଳ ରାମପୁର ବିବାହ ଅଧିକାରୀଙ୍କ ପାଖରେ ରେଜିଷ୍ଟ୍ରି ମ୍ୟାରେଜ ପାଇଁ ଆବେଦନ କରିବେ । ପୋଲିସର ଏହି ସାମାଜିକ କାର୍ଯ୍ୟକୁ ବିଭିନ୍ନ ମହଲରେ ପ୍ରଶଂସା କରାଯାଉଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
