ଭୁବନେଶ୍ୱର: କମ୍ୟୁନିଟି ସପୋର୍ଟ ଷ୍ଟାଫଙ୍କ ପାଇଁ ଖୁସି ଖବର । ମିଳିବ ବକେୟା ଦରମା । ଆଜି ବିଧାନସଭା ବଜେଟ ଅଧିବେଶନରେ ଏନେଇ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଓଡ଼ିଶା ଜୀବିକା ମିଶନ ଅଧିନରେ କାର୍ଯ୍ୟରତ ଏମବିକେ, ସିଆରପି, ବ୍ୟାଙ୍କମିତ୍ର, ପ୍ରାଣୀମିତ୍ରଙ୍କୁ ଖୁସି ଖବର ଦେଇଛନ୍ତି ମୋହନ ସରକାର ।
କମ୍ୟୁନିଟି ସପୋର୍ଟ ଷ୍ଟାଫଙ୍କ ମିଳିବ ବକେୟା ଦରମା:
କମ୍ୟୁନିଟି ସପୋର୍ଟ ଷ୍ଟାଫଙ୍କ ପାଇଁ ବଡ଼ ଘୋଷଣା କରିଛନ୍ତି ରାଜ୍ୟ ସରକାର । ଗତ ୧୦ ମାସର ବକେୟା ଦରମା ପାଇବେ କମ୍ୟୁନିଟି ସପୋର୍ଟ ଷ୍ଟାଫ । ବକେୟା ଦରମା ନେଇ ବିଧାନସଭାରେ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଏହାଦ୍ୱାରା ୬୨ ହଜାରରୁ ଊର୍ଦ୍ଧ୍ବ ଏମବିକେ, ସିଆରପି, ବ୍ୟାଙ୍କମିତ୍ର, ପ୍ରାଣୀମିତ୍ର ଉପକୃତ ହେବେ ।
ଉପକୃତ ହେବେ ୬୨ ହଜାର ୩୪୧ ଜଣ କମ୍ୟୁନିଟି ସପୋର୍ଟ ଷ୍ଟାଫ:
ରାଜ୍ୟରେ ୬୨ ହଜାର ୩୪୧ ଜଣ କମ୍ୟୁନିଟି ସପୋର୍ଟ ଷ୍ଟାଫ କାର୍ଯ୍ୟରତ ଅଛନ୍ତି । ୨୦୨୪ ଏପ୍ରିଲ ମାସରେ ସାଧାରଣ ନିର୍ବାଚନ ପ୍ରକ୍ରିୟା ଆରମ୍ଭ ହୋଇଥିଲା । ସେବେ ଠାରୁ ଏମବିକେ, ସିଆରପି, ବ୍ୟାଙ୍କମିତ୍ର, ଏମବିକେ ଓ ପ୍ରାଣୀମିତ୍ରଙ୍କ ଦରମା ଅଟକି ଯାଇଥିଲା । ଜୁନ ପ୍ରଥମ ସପ୍ତାହରେ ସାଧାରଣ ନିର୍ବାଚନ ଫଳ ଆସିଲା, କିନ୍ତୁ ରାଜ୍ୟରେ ସରକାର ବଦଳିଥିଲା । ଫଳରେ ଏମବିକେ, ସିଆରପି, ବ୍ୟାଙ୍କମିତ୍ର ଓ ପ୍ରାଣୀମିତ୍ରମାନେ ସଂକଟରେ ପଡ଼ିଯାଇଥିଲେ ।
୧୦ ମାସର ବକେୟା ଦରମା ପାଇବେ କମ୍ୟୁନିଟି ଷ୍ଟାଫ:
କମ୍ୟୁନିଟି ସପୋର୍ଟ ଷ୍ଟାଫ ବିଭିନ୍ନ ସମୟରେ ଭୁବନେଶ୍ବରର ଲୋୟର ପିଏମଜିରେ ଧାରଣ ମଧ୍ୟ ଦେଇଥିଲେ । ସେମାନଙ୍କ ସମସ୍ୟାର ସମାଧାନ କରିବା ପାଇଁ ରାଜ୍ୟ ସରକାର ପ୍ରତିଶ୍ରୁତି ଦେଇଥିଲେ । ପ୍ରତିଶ୍ରୁତି ଅନୁଯାୟୀ ରାଜ୍ୟ ସରକାର କମ୍ୟୁନିଟି ସପୋର୍ଟ ଷ୍ଟାଫଙ୍କ ସମସ୍ୟାର ସମାଧାନ କରିବା ନେଇ ଘୋଷଣା କରିଛନ୍ତି । ୧୦ ମାସର ବକେୟା ଦରମା ଦେବେ ବୋଲି ନୂଆ ସରକାର ଆଜି ବିଧାନସଭାରେ ଘୋଷଣା କରିଛନ୍ତି ।
ଲକ୍ଷପତି ଦିଦି ସହାୟିକା ହେଲେ କମ୍ୟୁନିଟି ଷ୍ଟାଫ:
ଅନ୍ୟପଟେ 'ଲକ୍ଷପତି ଦିଦି ସହାୟିକା' ଯୋଜନା ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ବିଧାନସଭାରେ କହିଛନ୍ତି, "ଆମ ସରକାର ମା’ମାନଙ୍କର ସମସ୍ୟା ପ୍ରତି ସମ୍ବେଦନଶୀଳ ଅଛନ୍ତି । ସ୍ଵୟଂ ସହାୟକ ଗୋଷ୍ଠୀର ମହିଳାଙ୍କର ଆର୍ଥିକ ଅଭିବୃଦ୍ଧି କରାଇବା ପାଇଁ 'ଲକ୍ଷପତି ଦିଦି ଯୋଜନା' କାର୍ଯ୍ୟକାରୀ ହେଉଛି । ଏହି ଯୋଜନାରେ ଅଧିକରୁ ଅଧିକ ସ୍ଵୟଂ ସହାୟକ ଗୋଷ୍ଠୀର ମହିଳା ସଦସ୍ୟାଙ୍କୁ ବାର୍ଷିକ ଏକ ଲକ୍ଷ ଟଙ୍କାର ରୋଜଗାରକ୍ଷମ କରାଇବା ପାଇଁ ପ୍ରୟାସ କରାଯାଉଛି । ରାଜ୍ୟ ସରକାର ୨୦୨୭ ମସିହା ସୁଦ୍ଧା ୨୫ ଲକ୍ଷ 'ଲକ୍ଷପତି ଦିଦି' ସୃଷ୍ଟି କରିବା ପାଇଁ ଲକ୍ଷ୍ୟ ରହିଛି । ଏହି ଯୋଜନା ମାଧ୍ୟମରେ କମ୍ୟୁନିଟି ସପୋର୍ଟ ଷ୍ଟାଫମାନଙ୍କର ପାରିଶ୍ରମିକ ବାବଦ ଅର୍ଥ ବର୍ତ୍ତମାନ ପାଇଁ ସରକାର ବହନ କରିବେ । ଏଥିପାଇଁ GPLF ମାନଙ୍କୁ ଅନୁଦାନ ପ୍ରଦାନ କରିବେ । ଏହି ନିଷ୍ପତ୍ତି ଦ୍ଵାରା ୬୨ ହଜାରରୁ ଉର୍ଦ୍ଧ୍ଵ କମ୍ୟୁନିଟି ସପୋର୍ଟ ଷ୍ଟାଫ ଲାଭବାନ ହେବେ । ଏପ୍ରିଲ ୨୦୨୪ରୁ ସେମାନେ ସେମାନଙ୍କର ପାରିଶ୍ରମିକ ପାଇବେ ।
ଏନେଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା କହିଛନ୍ତି, "ସ୍ୱୟଂ ସହାୟିକା ଗୋଷ୍ଠୀ ସମୂହଙ୍କ ଆର୍ଥିକ ଅଭିବୃଦ୍ଧି ଓ ସଶକ୍ତିକରଣ ପାଇଁ ଆମ ସରକାର ପ୍ରତିଶ୍ରୁତିବଦ୍ଧ । ମୁଖ୍ୟମନ୍ତ୍ରୀ ଆଜି ଲକ୍ଷପତି ଦିଦି ସହାୟିକା ଯୋଜନା ଘୋଷଣା କରିଛନ୍ତି । ଏହି ଯୋଜନା ହେତୁ ଓଡ଼ିଶାର କାର୍ଯ୍ୟରତ ୬୨ ହଜାର ୩୪୧ ଜଣ କମ୍ୟୁନିଟି ସପୋର୍ଟ ଷ୍ଟାଫ ଲାଭାନ୍ବିତ ହେବେ । ଗତ ଏପ୍ରିଲ ୨୦୨୪ରୁ ବକେୟା ଥିବା ସମସ୍ତ ଦରମା ଯୋଗାଇ ଦିଆଯିବ । ଜୀବିକା ମିଶନରେ କାର୍ଯ୍ୟ କରୁଥିବା କମ୍ୟୁନିଟି ସପୋର୍ଟ ଷ୍ଟାଫମାନେ ଲକ୍ଷପତି ଦିଦି ସହାୟିକା ନାଁରେ ଜଣାଯିବେ ।" ଚାକିରି ସ୍ଥାୟିତ୍ୱକୁ ନେଇ ପ୍ରଶ୍ନର ଉତ୍ତରରେ ଉପମୁଖ୍ୟମନ୍ତ୍ରୀ କହିଛନ୍ତି, "ତାଙ୍କର ସ୍ଥାୟୀତ୍ୱ ଆମ ଦାୟିତ୍ୱ ।"
ସ୍ଥାୟିତ୍ୱ ନେଇ ଦାବି:
ଅନ୍ୟପଟେ ବିଜେଡି ବିଧାୟିକା ସୁଜାତା ସାହୁ କହିଛନ୍ତି, "ସେମାନେ କାମ କରିଥିଲେ ସେଥିପାଇଁ ତାଙ୍କର ବକେୟା ଦରମା ପାଇବେ । ଏଥିରେ କୌଣସି ନୂଆ କଥା ନାହିଁ । ପୂର୍ବ ସରକାର ଏହି ଯୋଜନା କରିଥିଲେ ଓ ଦରମା ଦେଉଥିଲେ । ତେବେ ସେମାନଙ୍କୁ ସ୍ଥାୟୀ କରିବେ ନକରିବେ ଏବେକାର ସରକାରଙ୍କ ଉପରେ ନିର୍ଭର କରୁଛି । କିନ୍ତୁ ଆମେ ସେମାନଙ୍କ ସ୍ଥାୟୀତ୍ୱ ନେଇ ଦାବି କରିଛୁ ।
ଇଟିଭି ଭାରତ, ଭୁବନେଶ୍ୱର
