ସମ୍ବଲପୁର: ବିସ୍ଥାପନ ଭୟରେ ଜିଲ୍ଲା ପ୍ରଶାସନର ଦ୍ବାରସ୍ଥ ହେଲେ ବସ୍ତି ବାସିନ୍ଦା । ଏପରି ଘଟଣା ଦେଖିବାକୁ ମିଳିଛି ସମ୍ବଲପୁର ସହରରେ । ସହର ଉପକଣ୍ଠରେ ଥିବା ପରାଧିଆପାଲି ସୌରବ ନଗରର ବସ୍ତିବାସିନ୍ଦା ଆଜି ସମ୍ବଲପୁର ଜିଲ୍ଲା ପ୍ରଶାସନର ଦ୍ବାରସ୍ଥ ହୋଇ ଏକ ଲିଖିତ ଦାବିପତ୍ର ପ୍ରଦାନ କରିଛନ୍ତି। 18 ବର୍ଷ ହେଲା ଏହି ଅଞ୍ଚଳରେ ପ୍ରାୟ 100 ଟି ଗରିବ ପରିବାର ରହି ଆସୁଥିବାବେଳେ ଜିଲ୍ଲା ପ୍ରଶାସନ ଉଚ୍ଛେଦ ପ୍ରକ୍ରିୟା ଆରମ୍ଭ ନିର୍ଦ୍ଦେଶ ପରେ ପ୍ରଶାସନକୁ ଭେଟିଛନ୍ତି ବସ୍ତି ବାସିନ୍ଦା । ପ୍ରଥମେ ସେମାନଙ୍କୁ ଥଇଥାନ କରାଯିବା ପରେ ଉଛେଦ ପ୍ରକ୍ରିୟା ଆରମ୍ଭ କରାଯାଉ ବୋଲି ପ୍ରଶାସନ ନିକଟରେ ଦାବି କରିଛନ୍ତି ସ୍ଥାନୀୟ ଲୋକ।
ସୂଚନା ଅନୁସାରେ ସମ୍ବଲପୁର ସହରରୁ ଝାରସୁଗୁଡା ରାସ୍ତାରେ ଅଳ୍ପ ଦୂରରେ ଥିବା ପରାଧିଆପାଲି ସୌରବ ନଗରରେ ପ୍ରାୟ 100 ପରିବାର 18 ବର୍ଷ ହେଲା ରହି ଆସୁଛନ୍ତି । ଏମାନେ ମହାନଗର ନିଗମକୁ ସବୁ ପ୍ରକାରର କର ମଧ୍ୟ ଦେଇଥାନ୍ତି । କିନ୍ତୁ ଗତ 27 ଜୁଲାଇରେ ସମ୍ବଲପୁର ସଦର ତହସିଲଦାର ଏହି ଅଞ୍ଚଳରେ ଥିବା ସବୁ ଜବର ଦଖଲକୁ ଉଛେଦ କରିବାକୁ OPLE Act 1972 ଅନୁସାରେ ଏକ ନୋଟିସ ଜାରି କରିଛନ୍ତି।
