ସମ୍ବଲପୁର: ସମ୍ବଲପୁର ବିଶ୍ବବିଦ୍ୟାଳୟରେ ଦେଖା ଦେଇଛି ଛାତ୍ର ଅଶାନ୍ତି । ବିଶ୍ବ ବିଦ୍ୟାଳୟର ‘ସ୍କୁଲ ଅଫ ଫିଜିକ୍ସ’ ଅଧୀନରେ ଦିଆ ଯାଉଥିବା ଏମଏସସି ମେଡିକାଲ ଫିଜିକ୍ସ ପାଠ୍ୟକ୍ରମ ପାଇଁ 2ଏଟୋମିକ ଏନର୍ଜୀ ରେଗୁଲେଟୋରି ବୋର୍ଡ’ ର ମାନ୍ୟତା ବାଧ୍ୟତାମୂଳକ । ତେବେ 2017 ରେ ଆରମ୍ଭ ହୋଇଥିବା ଏହି କୋର୍ସରେ ବର୍ତମାନ ସୁଦ୍ଧା 2ଟି ବ୍ୟାଚ ଆଡମିଶନ କରିଥିଲେ ମଧ୍ୟ ଏହାର ଏଫିଲେସନ ନଥିବାରୁ ଏବେ 37 ଜଣ ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧାରରେ ।
ଏନେଇ ଛାତ୍ରଛାତ୍ରୀ ଆଡମିଶନ କରିବାର ବର୍ଷେ ପରେ ସବୁ ଜାଣିବା ସହ କର୍ତ୍ତୃପକ୍ଷଙ୍କୁ ବାରମ୍ବାର ଏନେଇ କହିଲା ପରେ ମଧ୍ୟ କିଛି ଫଳ ନମିଳିବାରୁ ଏବେ ବିଶ୍ବବିଦ୍ୟାଳୟ ମୁଖ୍ୟ ଗେଟ ସମ୍ମୁଖରେ ଧାରଣାରେ ବସିଛନ୍ତି ଏମଏସସି ମେଡିକାଲ ଫିଜିକ୍ସର 37 ଜଣ ଛାତ୍ରଛାତ୍ରୀ ।
ଛାତ୍ରଛାତ୍ରୀଙ୍କ କହିବା କଥା ହେଲା ଏହି ପାଠ୍ୟକ୍ରମ ପାଇଁ AERB ର ମାନ୍ୟତା ଆବଶ୍ୟକତା ଥିବା ବେଳେ ଆଡମିଶନ ସମୟରେ ଏନେଇ ତାଙ୍କୁ କିଛି କୁହାଯାଇନଥିଲା। ତେବେ ଆଡମିଶନ କରିବାର ଗୋଟିଏ ବର୍ଷ ପରେ ଚେନ୍ନାଇରେ ହେଉଥିବା ଏକ କର୍ମଶାଳାରେ ଯୋଗ ଦେବା ଅବସରରେ ସେମାନେ ଏହି AERB ମାନ୍ୟତାର ଗୁରୁତ୍ବ ଓ ଏହା ନଥିଲେ ପାଠ୍ୟକ୍ରମର କୌଣସି ମୂଲ୍ୟ ନାହିଁ ବୋଲି ଜାଣିଥିଲେ । ଏହା ପରେ ସେମାନେ ବିଭାଗୀୟ ମୂଖ୍ୟଙ୍କୁ ଏହି ସମସ୍ୟାର ସମାଧାନ ପାଇଁ ବାରମ୍ବାର କହିଲା ପରେ ମଧ୍ୟ କୌଣସି ଫଳ ମିଳିବାରୁ ଏବେ ଆନ୍ଦୋଳନରେ ବସିବାକୁ ବାଧ୍ୟ ହୋଇଛନ୍ତି ।
ସୂଚନା ଯୋଗ୍ୟ ଯେ ଓଡିଶାର ଏକ ମାତ୍ର ବିଶ୍ବବିଦ୍ୟାଳୟ ଭାବେ ସମ୍ବଲପୁର ବିଶ୍ବବିଦ୍ୟାଳୟରେ ହିଁ ଏହି କୋର୍ସ ଚାଲିଛି । 2017 ମସିହାରେ ଏହା ଆରମ୍ଭ ହୋଇଥିଲା । ମୁଖ୍ୟତଃ କ୍ୟାନସର ଚିକିତ୍ସା ପାଇଁ ଏହି ପାଠ୍ୟକ୍ରମର ବହୁତ ଚାହିଦା ରହିଛି । ଏଥିପାଇଁ ଏହି ଛାତ୍ରଛାତ୍ରୀ ମାନେ 3ବର୍ଷିଆ କୋର୍ସ ପାଇଁ ଦେଢ ଲକ୍ଷ ଟଙ୍କା ଫିସ ଦେଇ ଆଡମିଶନ କରିଥିଲେ ।
ଅନ୍ୟପଟେ ପିଜି କାଉନସିଲର ଅଧ୍ୟକ୍ଷ କହିଛନ୍ତି ଯେ ପୂର୍ବରୁ ଏନେଇ ବିଶ୍ବ ବିଦ୍ୟାଳୟ କର୍ତ୍ତୃପକ୍ଷଙ୍କୁ ଜଣା ନଥିଲା । କିନ୍ତୁ ବର୍ତ୍ତମାନ ଏଫିଲେସନ ପାଇଁ AERB କର୍ତ୍ତୃପକ୍ଷଙ୍କୁ ଚିଠି କରାଯାଇଛି । ଗୋଟିଏ ସପ୍ତାହ ଭିତରେ ସେହି ଟିମ ସମ୍ବଲପୁର ବିଶ୍ବବିଦ୍ୟାଳୟ ପରିଦର୍ଶନରେ ଆସିବେ ଏବଂ ଏଫିଲେସନ ହୋଇଯିବ ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
