ସମ୍ବଲପୁର: କୃଷକଙ୍କ ସମସ୍ୟାକୁ ନେଇ ବିଜେପି ବାରମ୍ବାର ବିଭିନ୍ନ ଆନ୍ଦୋଳନ କରୁଛି । ଗତକାଲି (ଗୁରୁବାର) କୃଷକଙ୍କ ସମସ୍ୟା ନେଇ 2 ଘଣ୍ଟିଆ ରାଜରାସ୍ତା ଅବରୋଧ କରିଥିବା ବେଳେ ଆଜି ପୁଣି ଜିଲ୍ଲା ଯୋଗାଣ ବିଭାଗର ଅଫିସ ସମ୍ମୁଖରେ ବିଜେପି ଧାରଣା ପ୍ରଦର୍ଶନ କରିଛି ।
ମୁଖ୍ୟତଃ ଟୋକନ ଅବ୍ୟବସ୍ଥା, ଟୋକନର ଅବଧି ବୃଦ୍ଧି, ମଣ୍ଡି ଅବ୍ୟବସ୍ଥା, କଟନୀ ଛଟନୀ, ମିଲର ରାଜ ଆଦି କୃଷକ ସମସ୍ୟାକୁ ନେଇ ବିଜେପି ଜିଲ୍ଲା ଯୋଗାଣ ବିଭାଗ ଅଫିସ ସମ୍ମୁଖରେ ଧାରଣା ଦେବା ସହ ରାଜ୍ୟ ସରକାରଙ୍କ କୃଷିନୀତିକୁ ବିରୋଧ କରାଯାଇଛି । ଏବିସବୁ କୃଷକ ସମସ୍ୟାର ସମାଧାନ ଦାବି ନେଇ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଛି ବିଜେପି ।
ଏହି ଆନ୍ଦୋଳନରେ ସମ୍ବଲପୁର ଜିଲ୍ଲା ବିଜେପି ସଭାପତି ଗିରିଷ ପଟେଲ, ରେଙ୍ଗାଲି ବିଧାୟକ ନାଉରୀ ନାଏକ, କୁଚିଣ୍ଡାର ପୂର୍ବତନ ବିଧାୟକ ରବି ନାଏକ, ଜିଲ୍ଲା କୃଷକ ମୋର୍ଚ୍ଚା ସଭାପତି ସମୀର ରଞ୍ଜନ ବାବୁ ପ୍ରମୁଖ ସାମିଲ ହୋଇଥିଲେ । ତେବେ କୃଷକଙ୍କ ସମସ୍ୟା ନେଇ ବେଜେପି ଯେଉଁ ଆନ୍ଦୋଳନ କରୁଛି ସେଥିରେ ଜିଲ୍ଲା କୃଷକ ସଙ୍ଗଠନ ତାର ଆଭିମୁଖ୍ୟ ସ୍ପଷ୍ଟ କରୁନାହିଁ ।
ଅନ୍ୟପଟେ କେନ୍ଦ୍ର ସରକାରଙ୍କ 3 କୃଷି ଆଇନକୁ ସମ୍ବଲପୁର ଜିଲ୍ଲା କୃଷକ ସଂଗଠନ ବିରୋଧ କରୁଥିବାରୁ ରାଜ୍ୟ ସରକାରଙ୍କ କୃଷିନୀତି ବିରୁଦ୍ଧରେ ବିଜେପି ବାରମ୍ବାର ଆନ୍ଦୋଳନ କରୁଥିଲେ ମଧ୍ୟ ବିଜେପିକୁ କୃଷକ ସଙ୍ଗଠନ ସମର୍ଥନ କରୁନଥିବା ଚର୍ଚ୍ଚା ହେଉଛି । ତେବେ ବିଜେପିର ଏହି ଆନ୍ଦୋଳନ ଦ୍ୱାରା ରାଜ୍ୟ ସରକାରଙ୍କ ଉପରେ କେତେ ଚାପ ସୃଷ୍ଟି କରିପାରୁଛି ଅଥବା ଏହି ପ୍ରସଙ୍ଗ ନେଇ ଲୋକଙ୍କ ସମର୍ଥନ କେତେ ପାଇ ପାରିବ ତାହା ଦେଖିବାକୁ ବାକି ରହିଲା ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
