ସମ୍ବଲପୁର: କ୍ଷେତରାଜପୁର ରେଲଓ୍ବେ କ୍ରସିଂଠାରେ ମାଲବାହୀ ଟ୍ରେନ ଧକ୍କାରେ ଜଣେ ବ୍ୟକ୍ତି ଗୁରୁତର ଆହତ ହୋଇଛନ୍ତି । ଟ୍ରେନ ଆସୁଥିବା ସମୟରେ ହଠାତ ଟ୍ରେନ ସମ୍ମୁଖକୁ ଜଣେ ମାନସିକ ବିକଳାଙ୍ଗ ଲୋକ ଆସିଯିବାରୁ ଏମିତି ଦୁର୍ଘଟଣା ଘଟିଥିବା ସ୍ଥାନୀୟ ଲୋକେ କହିଛନ୍ତି ।
ଆହତ ବ୍ୟକ୍ତି ଜଣକ କ୍ଷେତରାଜପୁର ଅଞ୍ଚଳର ଦଳଦଳିପଡାର ଡାକ୍ତର ସୁନା ବୋଲି ଜଣାପଡିଛି । ସ୍ଥାନୀୟ ଲୋକଙ୍କ କହିବା ଅନୁସାରେ ଟ୍ରେନ ଆସୁଥିବା ସମୟରେ ଏହି ବ୍ୟକ୍ତି ଜଣକ ଟ୍ରେନ ସମ୍ମୁଖକୁ ହଠାତ ଚାଲି ଆସିଥିଲେ । ଫଳରେ ଯୁବକଙ୍କ ଦୁଇଟି ହାତରେ ଗୁରୁତର ଆଘାତ ଲାଗିବା ସହ ଓ ଗୋଟିଏ ଗୋଡ ସମ୍ପୂର୍ଣ୍ଣ କଟିଯାଇଛି । ଘଟଣାସ୍ଥଳରେ କ୍ଷେତରାଜପୁର ପୋଲିସ ପହଁଚି ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲା । ପରେ ତାଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି ।
ଏହି ଦୁର୍ଘଟଣା ପରେ ରେଳ ବିଭାଗର ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏହି ଗେଟ ସମ୍ମୁଖରେ ସୁରକ୍ଷାକର୍ମୀ ନିୟୋଜିତ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି । ଦୀର୍ଘ ଦିନ ହେଲା ଏହି ସ୍ଥାନରେ ଏକ ଫ୍ଲାଇ ଓଭର ବ୍ରିଜ ଦାବି ହୋଇ ଆସୁଥିଲେ ମଧ୍ୟ ସରକାର ଏଥି ପ୍ରତି କୌଣସି ପଦକ୍ଷେପ ନେଇ ନାହାନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
