ସମ୍ବଲପୁର: ପ୍ରାକୃତିକ ପରିବେଶରେ ଭରା ସମ୍ବଲପୁର । ଜିଲ୍ଲାର ଅନେକ ପର୍ଯ୍ୟଟନ ସ୍ଥଳୀ ମଧ୍ୟରୁ ହୀରାକୁଦ ଜଳ ଭଣ୍ଡାର ତଟରେ ଥିବା ଡେବ୍ରିଗଡ଼ ଅଭୟାରଣ୍ୟ ଅନ୍ୟତମ ଅଟେ । ଦିନ ଥିଲା ଏହା ଘଞ୍ଚ ଜଙ୍ଗଲ ମଧ୍ୟରେ ଅବହେଳିତ ହୋଇ ରହିଥିଲା । ପୂର୍ବରୁ ଏଠାକୁ ପର୍ଯ୍ୟଟକ ଆସୁଥିଲେ ସୁଦ୍ଧା ପ୍ରଚାର ପ୍ରସାରର ଅଭାବ ଯୋଗୁଁ ପର୍ଯ୍ୟଟକଙ୍କ ସଂଖ୍ୟା ଏତେ ଅଧିକ ନଥିଲା । କିନ୍ତୁ ସ୍ଥାନୀୟ ଲୋକଙ୍କ ସହାୟତାରେ ଅଭୟାରଣ୍ୟର ରୂପରେଖ ବଦଳିଛି। କମ୍ୟୁନିଟି ଇକୋ ଟ୍ୟୁରିଜିମ ଫଳରେ ଡେବ୍ରିଗଡ଼ରେ ଅନେକ ଉନ୍ନୟନ ମୂଳକ କାର୍ଯ୍ୟ ଜାରିରହିଛି । ଫଳରେ ପର୍ଯ୍ୟଟକଙ୍କ ସଂଖ୍ୟା ଗତ ବର୍ଷ ଠାରୁ 2 ଗୁଣା ବୃଦ୍ଧି ପାଇଛି ଏବଂ ରେକର୍ଡ ପରିମାଣର ରାଜସ୍ୱ ଆଦାୟ ହୋଇଥିବା ବନ ବିଭାଗ ପକ୍ଷରୁ ସୂଚନା ଦିଆଯାଇଛି।
ସମ୍ବଲପୁର ଜିଲ୍ଲାର ପର୍ଯ୍ୟଟନ ସ୍ଥଳୀ ମଧ୍ୟରେ ଡେବ୍ରଗଡ଼ ଅଭୟାରଣ୍ୟ ଅନ୍ୟତମ । ଅଭୟାରଣ୍ୟକୁ ଚାରିପଟୁ ଘେରି ରହିଛି ପ୍ରାକୃତିକ ପରିବେଶ । ହୀରାକୁଦ ଜଳଭଣ୍ଡାର ତଟରେ ପ୍ରକୃତି ରାଣୀର ଅପରୂପ ସୌନ୍ଦର୍ଯ୍ୟରେ ଭରି ରହିଛି ଏହି ପର୍ଯ୍ୟଟନ ସ୍ଥଳୀ । ଭିତ୍ତିଭୂମିର ବିକାଶ ପରେ ବର୍ଷ ତମାମ ପର୍ଯ୍ୟଟକଙ୍କ ସୁଅ ଛୁଟୁଛି । ପୂର୍ବରୁ କେବଳ ଶୀତ ଋତୁରେ ଅଧିକ ସଂଖ୍ୟକ ପର୍ଯ୍ୟଟକ ଏଠାକୁ ଆସୁଥିବା ବେଳେ ବର୍ତ୍ତମାନ ପ୍ରତ୍ୟେକ ଦିନ ହଜାର ହଜାର ସଂଖ୍ୟକ ପର୍ଯ୍ୟଟକ ଆସୁଛନ୍ତି । ଏଠାରେ ହୀରାକୁଦ ଜଳଭଣ୍ଡାରରେ ବୋଟିଂ ସୁବିଧା,ଜଙ୍ଗଲ ସଫାରୀର ସହ ପ୍ରକୃତିକ କଟେଜ ବ୍ୟବସ୍ଥା ପର୍ଯ୍ୟଟକଙ୍କୁ ଆକୃଷ୍ଟ କରୁଛି।
ଏଥିପାଇଁ ସମ୍ବଲପୁର ହୀରାକୁଦ ବନ ବିଭାଗର ବଡ଼ ଭୂମିକା ରହିଛି । ସ୍ଥାନୀୟ ଲୋକଙ୍କୁ ନେଇ ବନ ବିଭାଗ ଯେଉଁ ଦିନଠୁ କମ୍ୟୁନିଟି ଇକୋ ଟ୍ୟୁରିଜିମ ଆରମ୍ଭ କରିଛି ପର୍ଯ୍ୟଟକଙ୍କ ସଂଖ୍ୟା ବଢିବା ସହ ସ୍ଥାନୀୟ ଯୁବକ ଏଠାରେ ନିଜର ଯୋଗ୍ୟତା ମୁତାବକ ନିଯୁକ୍ତି ମଧ୍ୟ ପାଇଛନ୍ତି । ଏହାଦ୍ୱାରା ଜଙ୍ଗଲ ସୁରକ୍ଷା ହେବା ସହ ଜୀବଜନ୍ତୁ ମଧ୍ୟ ବେଶ ସୁରକ୍ଷିତ ରହୁଛନ୍ତି ।
ସମ୍ବଲପୁର ହୀରାକୁଦ ବନ୍ୟପ୍ରାଣୀ ଡିଭିଜନର ଡିଏଫଓ ଅଂଶୁପ୍ରଜ୍ଞା ଦାସଙ୍କ ସୂଚନା ଅନୁସାରେ, 2020-21ରେ ଏଠାକୁ 7000 ପର୍ଯ୍ୟଟକ ଆସିଥିବା ବେଳେ 85ଲକ୍ଷ ରାଜସ୍ୱ ଆଦାୟ ହୋଇଥିଲା । ତେବେ କମ୍ୟୁନିଟି ଇକୋ ଟ୍ୟୁରିଜିମ ଆରମ୍ଭ ହେବା ପରେ 2021-22ରେ ଏଠାକୁ 17ହଜାର ପର୍ଯ୍ୟଟକ ଆସିଛନ୍ତି । ଏହାସହ ଚଳିତ ବର୍ଷ 1କୋଟି 57 ଲକ୍ଷ ରାଜସ୍ୱ ଆଦାୟ ହୋଇଛି । ଆଦାୟ ରାଜସ୍ୱର 90 ପ୍ରତିଶତ ନିଯୁକ୍ତି ପାଇଥିବା ସ୍ଥାନୀୟ ଲୋକଙ୍କୁ ଦରମା ଏବଂ ଅଭୟାରଣ୍ୟ ପରିଚାଳନାରେ ଖର୍ଚ୍ଚ ହୋଇଥାଏ ବୋଲି ସୂଚନା ଦେଇଛନ୍ତି । ବର୍ତ୍ତମାନ ଦେଶର 20ଟି ରାଜ୍ୟରୁ ପର୍ଯ୍ୟଟକ ଡେବ୍ରିଗଡ ଅଭୟାରଣ୍ୟକୁ ଆସୁଥିବା ବେଳେ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଆଗକୁ ଆହୁରି ପଦକ୍ଷେପ ନିଆଯିବ ବୋଲି ସେ କହିଛନ୍ତି ।
ଇଟିଭି ଭାରତ, ସମ୍ବଲପୁର
