ସମ୍ବଲପୁର: ଏବେ ବି ବଞ୍ଚିଛି ସାମାଜିକ କୁସଂସ୍କାର । ଏମିତି କୁପ୍ରଥା ଏବେବି ସମ୍ବଲପୁର ଜିଲ୍ଲାରେ ଦେଖିବାକୁ ମିଳୁଛି । ଅନ୍ୟ ଜାତିର ମହିଳା ବିବାହ କରିବା ପରେ ପ୍ରଥମେ ନିଜ ଜାତିରୁ ବାସନ୍ଦ ଆଉ ତା ପରେ ଏବେ ଝିଅର ବାହାଘର ହୋଇପାରୁନି । ଆଉ ଗୋଟିଏ ଘଟଣାରେ ବିବାହ ପୂର୍ବରୁ ଜଣେ ବ୍ୟକ୍ତି ଅନ୍ୟ ଜାତିର ମହିଳା ସହ ସମ୍ପର୍କ ରଖିଥିବାରୁ ବିବାହର 10 ବର୍ଷ ପରେ ଜାତିରୁ ବାସନ୍ଦ କରାଯାଇଛି । ଏମିତି ଅଭିଯୋଗ ଆସିଛି ସମ୍ବଲପୁର ଜିଲ୍ଲାପାଳଙ୍କ ଅଭିଯୋଗ ଶୁଣାଣି କାର୍ଯ୍ୟକ୍ରମରେ । ଉଭୟ ଅଭିଯୋଗ ଆସିଛି ସମ୍ବଲପୁରର କୁଚିଣ୍ଡା ଉପଖଣ୍ଡ ମହୁଳପାଲି ଥାନା ଅଞ୍ଚଳରୁ ।
ବଇଲି ମାଝୀ । ବୟସ ପ୍ରାୟ 55 । ଘର କୁଚିଣ୍ଡା ଉପଖଣ୍ଡ ମହୁଲପାଲି ଥାନା ଅନ୍ତର୍ଗତ କେସେଇବାହାଲ ଗାଁ । ହେଲେ ଆଜି ଏକ ଅଭିଯୋଗ ଆଣି ପହଞ୍ଚିଥିଲେ ଜିଲ୍ଲାପାଳଙ୍କ ନିକଟରେ । ତାଙ୍କ ସହିତ ଥିଲେ ତାଙ୍କର 22 ବର୍ଷୀୟ ଝିଅ । 25 ବର୍ଷ ପୂର୍ବେ ବଇଲି ଅନ୍ୟ ଜାତିରେ ବିବାହ କରିଥିବାରୁ ବହୁ ବର୍ଷ ପରେ ତାଙ୍କୁ ଗଣ୍ଡ ଜାତିରୁ 'ଉପର ବାମଣ୍ଡ ଷଡ଼ ବଂଶୀୟ ଗଣ୍ଡ ସମାଜ ପରିଷଦର ଷ୍ଟେଟ କମିଟି' ଜାତିରୁ ବାସନ୍ଦ କରିଥିବା ଅଭିଯୋଗ ହୋଇଛି। ଫଳରେ ବଡ଼ ଝିଅର ବାହାଘର ଭାଙ୍ଗିଯାଇଥିବା ସହ ଆଉ ବିବାହ ଠିକ ହୋଇପାରୁନାହିଁ ବୋଲି ଅଭିଯୋଗ ହୋଇଛି।
ସମାନ ଘଟଣା ଘଟିଛି ବାମରା ବ୍ଲକ ମହୁଲପାଲି ଥାନା ଅନ୍ତର୍ଗତ ସୋଲବଗା ଗାଁର ଦେବକରଣ ନାଏକଙ୍କ କ୍ଷେତ୍ରରେ । ତାଙ୍କର ଭୁଲ ଏତିକି ଯେ, ବିବାହ ପୂର୍ବରୁ ସେ ଅନ୍ୟ ଜାତିର ମହିଳାଙ୍କ ସହ କେବଳ ସମ୍ପର୍କରେ ଥିଲେ , ଏପରିକି ବିବାହ ମଧ୍ୟ କରିନଥିଲେ । ପରେ ସେ ନିଜ ଜାତିର ମହିଳାଙ୍କୁ ବିବାହ କରିବା ପରେ 10 ବର୍ଷ ପରେ ତାଙ୍କୁ ଏବେ ଗଣ୍ଡ ସମାଜରୁ ବାସନ୍ଦ କରାଯାଇଛି । ଏନେଇ ଦୁହେଁ ଭୁକ୍ତଭୋଗୀ ଜିଲ୍ଳାପାଳଙ୍କ ଦ୍ବାରସ୍ଥ ହୋଇଛନ୍ତି।
ଘଟଣା ସମ୍ପର୍କରେ ଜାଣିବା ପରେ ସମ୍ବଲପୁର ଜିଲ୍ଲାପାଳ ଏହାକୁ ଗମ୍ଭୀରତାର ନେବା ସହ ଘଟଣାର ତଦନ୍ତ ପାଇଁ କୁଚିଣ୍ଡା ଉପଜିଲ୍ଲାପାଳ ଓ ଏସଡିପିଓଙ୍କୁ ନିର୍ଦ୍ଦେଶ ଦେଇଛନ୍ତି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
