ରାୟଗଡ଼ା: ଶିକ୍ଷକ ନିଯୁକ୍ତିରେ ଅନିୟମିତତା ଅଭିଯୋଗ । ରାୟଗଡ଼ା ଜିଲ୍ଲାର ମଙ୍ଗଳ ବିଭାଗରେ ଶିକ୍ଷକ ନିଯୁକ୍ତିରେ ଅନିୟମତିତା ଅଭିଯୋଗ ଆଣିଛନ୍ତି ପ୍ରାର୍ଥୀ । ପ୍ରକାଶିତ ଶିକ୍ଷକ ନିଯୁକ୍ତ ତାଲିକାରେ ବ୍ୟାପକ ତ୍ରୃଟି ରହିଥିବା ଦର୍ଶାଇ ସେମାନେ ଏହାର ପୁନର୍ବିଚାର କରିବା ପାଇଁ ଜିଲ୍ଲା ମଙ୍ଗଳ ଅଧିକାରୀଙ୍କୁ ଭେଟି ଦାବୀପତ୍ର ଦେଇଛନ୍ତି ।
ନିୟମ ଅନୁଯାୟୀ, ଓଏସଏସଟିଇଟି ପାସ କରିଥିବା ନିଜସ୍ବ ଜିଲ୍ଲା ପ୍ରାର୍ଥୀଙ୍କୁ ପ୍ରାଥମିକତା ଦେବାକୁ ନିୟମ ଥିବାବେଳେ ଏହାକୁ ଉଲଂଙ୍ଘନ କରାଯାଇ ପାସ କରି ନଥିବା ପ୍ରାର୍ଥୀଙ୍କ ନାଁ ତାଲିକାରେ ରହିଛି ।
ଏପରିକି ପୂର୍ବ ପ୍ରକାଶିତ ୧୭୦ ଜଣିଆ ଡ଼୍ରାଫ୍ଟ ଲିଷ୍ଟରେ ନାମ ନଥିବା ପ୍ରାର୍ଥୀଙ୍କ ନାମ ମଧ୍ୟ ନିଯୁକ୍ତି ତାଲିକାରେ ରହିଛି । ଏଭଳି ଗୁରୁତର ତ୍ରୃଟି ଥିବା ତାଲିକା କିଭଳି ପ୍ରକାଶ ପାଇଲା ବୋଲି ଅଭିଯୋଗ କରିବା ସହ ନିଯୁକ୍ତିରେ ବ୍ୟାପକ ଅନିୟମିତତା ଅଭିଯୋଗ କରିଛନ୍ତି ଆଶାୟୀ ପ୍ରାର୍ଥୀ ।
ଅନ୍ୟପକ୍ଷେ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ଜିଲ୍ଲା ମଙ୍ଗଳ ଅଧିକାରୀ । ତାଙ୍କ କହିବା କଥା ସରକାରଙ୍କ ସମସ୍ତ ନିର୍ଦ୍ଦେଶ ଏବଂ ନିଯୁକ୍ତି ପ୍ରକ୍ରିୟା ନିୟମ ମୁତାବକ ହୋଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
