ରାୟଗଡ଼ା: ଆଇନ ଶୃଙ୍ଖଳାକୁ ସଜାଡ଼ିବାକୁ ଅଣ୍ଟା ଭିଡ଼ିଲା ଜିଲ୍ଲା ପୋଲିସ । ଜିଲ୍ଲାରେ ଗୁଟକା ସାଙ୍ଗକୁ ବିଦେଶୀ ମଦ ଚୋରା ଚାଲାଣ ସହିତ ବେଆଇନ ଦେଶି ମଦଭାଟି ଉପରେ ଚଢ଼ାଉ ଆରମ୍ଭ କରିଦେଇଛି । ବିଶାକ୍ତ ମଦ ପିଇ ଦିନକୁ ଦିନ ମୃତ୍ୟୁ ସଂଖ୍ୟା ବଢୁଥିବାରୁ ଏହାଉପରେ ରୋକ ଲଗାଇବାକୁ ଏପରି ପଦକ୍ଷେପ ନିଆଯାଇଥିବା କହିଛନ୍ତି ଜଣେ ପୋଲିସ ଅଧିକାରୀ । ସବୁଠାରୁ ବଡ଼ କଥା ହେଲା ମଦୁଆଙ୍କୁ ସାବାଡ଼ କରିବା ପାଇଁ ଅଣ୍ଟା ଭିଡ଼ିଛନ୍ତି ଜଣେ ମହିଳା ଥାନାଅଧିକାରୀ ବିଜୟଲକ୍ଷ୍ମୀ ହିକ୍କା ।
ତେବେ ରାୟଗଡା ଜିଲ୍ଲାର ଭୌଗଳିକ ସୀମା ଆନ୍ଧ୍ର ସହିତ ଲାଗି ରହିଥିବାରୁ ଅନେକ ସମୟରେ ଦୁର୍ଗମ ଅଞ୍ଚଳରେ ଲୋକେ ମଦ ପିଇବା ସହ, ଅନ୍ଧ ବିଶ୍ୱାସର ଶିକାର ହୋଇ ହତ୍ୟା ଭଳି ଅପରାଧ ଘଟାଉଛନ୍ତି । ଆଉ କିଛି ଜଣ ନିଶାସକ୍ତ ହୋଇ ଅକାଳରେ ମୃତ୍ୟୁ ମୁଖରେ ପଡୁଛନ୍ତି । ସେଥିପାଇଁ ଏହା ଉପରେ ରୋକ ଲଗାଇବାକୁ ପ୍ରଥମଥର ଏହି ଅଞ୍ଚଳରୁ ନିଶା ନିବାରଣ ପାଇଁ ସେ ପ୍ରତିଦିନ ଦୁର୍ଗମ ଅଞ୍ଚଳ ବୁଲି ବେଆଇନ ମଦଭାଟି ଭଙ୍ଗା ଅଭିଯାନ ଆରମ୍ଭ କରିଛନ୍ତି।
ଶନିବାର ଶେଷଖାଲ ଥାନାର ପୁଲିସ କର୍ମଚାରୀଙ୍କ ସହାୟତାରେ ପିପଲଗୁଡ଼ା ପଞ୍ଚାୟତ ଅନ୍ତର୍ଗତ ରେଙ୍ଗେଲପାଡୁ ଏବଂ ଜୁମ୍ବୁକାଟି ଗାଁ ଉପରେ ଚଢ଼ାଉକରି ୩୦୦୦ ଲିଟର ମହୁଲ ପୋଚ ସହିତ ୨୦୦ ଲିଟର ପ୍ରସ୍ତୁତ ଦେଶି ମଦକୁ ନଷ୍ଟ କରିଛି ପୋଲିସ । ଏହାସହିତ ମଦ ରନ୍ଧାଭାଟି ଭାଙ୍ଗିବା ସହିତ ସମସ୍ତ ଉପକରଣ ମଧ୍ୟ ନଷ୍ଟ କରି ଦିଆଯାଇଛି।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
