ରାୟଗଡା: ଟିକିଏ କଟକଣା କୋହଳ ହେଲେ ନୀତି ନିୟମ କି ଶୃଙ୍ଖଳାକୁ ମାନୁ ନାହାନ୍ତି ଅମାନିଆ । ନିୟମିତ ମାସ୍କ ପିନ୍ଧିବା, ସମଦୂରତା ରକ୍ଷା କରିବା ପାଇଁ ବାରମ୍ବାର ପ୍ରଶାସନ ପକ୍ଷରୁ ସଚେତନତା ସାଙ୍ଗକୁ ତାଗିଦ କରାଯାଉଥିଲେ ବି ପ୍ରଶାସନ ନିର୍ଦ୍ଦେଶକୁ ଫୁ କରିଛନ୍ତି କିଛି ଅମାନିଆ । ହେଲେ ପ୍ରଶାସନର ପରାମର୍ଶ, ନୀତି ଓ ନିୟମକୁ ମାନୁ ନାହାନ୍ତି ଅମାନିଆ । ବାରମ୍ବାର ତାଗିଦ ପରେ ବି ଲୋକେ ବିନା ମାସ୍କରେ ବଜାରକୁ ଆସିବା ସହ ଗୋଟିଏ ସ୍ଥାନରେ ଜମା ହେଉଥିବାରୁ ରାସ୍ତାକୁ ଓହ୍ଲାଇଛନ୍ତି ରାୟଗଡ଼ା ଜିଲ୍ଲାପାଳ ପ୍ରମୋଦ କୁମାର ବେହେରା ।
ଲୋକଙ୍କୁ ନୀତି, ନିୟମକୁ ମାନିବାକୁ ଜିଲ୍ଲାପାଳ ନିବେଦନ କରିବା ସହ ମାସ୍କ ପିନ୍ଧି ନଥିବା ଲୋକଙ୍କୁ ମାସ୍କ ବାଣ୍ଟିଛନ୍ତି । ଶୁକ୍ରବାର ସାବିତ୍ରୀ ବ୍ରତ ଅବସରରେ ପ୍ରଶାସନ କଟକଣାକୁ ସାମାନ୍ୟ କୋହଳ ମଧ୍ୟ କରିଥିଲା । କିନ୍ତୁ କଟକଣା କୋହଳ ହେବା ମାତ୍ରେ ଲୋକ ସବୁ ନୀତି ନିୟମକୁ ଉଲ୍ଲଂଘନ କରି ମାର୍କେଟରେ ଦଳ ଦଳ ଯୁବକ ଘୂରି ବୁଲୁଥିବା ଦେଖିଥିଲେ ଜିଲ୍ଲାପାଳ । ଗଜପତି ଜଙ୍କସନ୍ ଓ କପିଳାସ ଛକ ଅଞ୍ଚଳରେ ଲୋକେ ସାମାଜିକ ଦୂରତାକୁ ନ ମାନି ମନଇଚ୍ଛା ଏକାଠି ଠିଆ ହୋଇ ଜଳଖିଆ ଖାଇବା ସହ ମାର୍କେଟିଂ କରୁଥିବାରୁ ଜିଲ୍ଲାପାଳ ଅସନ୍ତୋଷ ପ୍ରକାଶ କରିଥିଲେ।
ନିଜେ ଜିଲ୍ଲାପାଳ ଏହି ସବୁ ଅଞ୍ଚଳରେ ପହଞ୍ଚି ଲୋକଙ୍କୁ ସଚେତନ କରିବା ସହ ମାସ୍କ ବଣ୍ଟନ କରିଥିଲେ । ସେହିପରି ଦୈନିକ ବଜାର ମଧ୍ୟ ଜିଲ୍ଲାପାଳ ପରିଦର୍ଶନ କରି ବ୍ୟବସାୟୀ ଓ ଲୋକଙ୍କୁ ସାମାଜିକ ଦୂରତା ରକ୍ଷା କରିବା ଓ ମାସ୍କ ପିନ୍ଧିବା ନେଇ ସଚେତନ କରିଥିଲେ । କୋରୋନା ମୁକାବିଲାରେ ଏବେ ସୁଦ୍ଧା ରାୟଗଡ଼ା ଜିଲ୍ଲା ଗ୍ରୀନ ଜୋନରେ ରହିଛି । ହେଲେ ଏପରି ଅମାନିଆଙ୍କ ପାଇଁ ଚିନ୍ତାରେ ଜିଲ୍ଲାପାଳ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
