ରାୟଗଡା: ଆସନ୍ତା 28 ତାରିଖ ଓଡିଶା ଓ ପୂର୍ବ ଛତିଶଗଡ ବନ୍ଦ ନେଇ ଅଡିଓ ଟେପ ଜାରି କରିଛି ମାଓ ସଙ୍ଗଠନ । କିଲା ଏବଂ ଶୁକଦେବ ଏନକାଉଣ୍ଟର ପ୍ରତିବାଦରେ ଏହି ବନ୍ଦ ଡାକରା ଦେଇଛନ୍ତି ମାଓବାଦୀ । ଏହି ଟେପରେ କିଛି ଯୁବକଙ୍କ ସହାୟତାରେ ପୋଲିସ ନକ୍ସଲ ଦମନ ପାଇଁ ଯୋଜନା କରୁଥିବା ମାଓ ସଙ୍ଗଠନ କହିଛି ।
ଏନେଇ ସିପିଆଇ(ମାଓବାଦୀ)ଓଡିଶା ରାଜ୍ୟ କମିଟି ପକ୍ଷରୁ ଏକ ଅଡିଓ ଟେପ୍ ଜାରି କରାଯାଇଛି । ଓଡିଶା ସମେତ ଆସନ୍ତା 28 ତାରିଖ ଦିନ ପୂର୍ବ ଛତିଶଗଡ ବନ୍ଦ ରଖିବାକୁ ମାଓବାଦୀଙ୍କ ପକ୍ଷରୁ ଆହ୍ବାନ ଦିଆଯାଇଛି । ପୋଲିସ ଦମନରେ ବିଚଳିତ ହୋଇ ମାଓ ସଙ୍ଗଠନ ଏପରି ଆହ୍ବାନ ଦେଇଥିବା କୁହାଯାଉଛି ।
ନକ୍ସଲଙ୍କ ହତ୍ୟାର ଜବାବ ଦିଆଯିବ ବୋଲି ଅଡିଓରେ କୁହାଯାଇଛି । କିଛିଦିନ ତଳେ ପୋଲିସ ଗୁଳିରେ 13 ଜଣ ନକ୍ସଲଙ୍କ ମୃତ୍ୟୁ ହୋଇଥିଲା । ଯାହାର ଜବାବ ଦିଆଯିବ ବୋଲି ମାଓ ସଙ୍ଗଠନ ପକ୍ଷରୁ ଅଡିଓ ଜାରି କରାଯାଇଛି । ସେପଟେ ଏହି ଅଡିଓ ଟେପ୍ ଜାରି ହେବା ପରେ ରାୟଗଡା ଜିଲ୍ଲାରେ ସୁରକ୍ଷା ବ୍ୟବସ୍ଥାକୁ ଅଧିକ କଡାକଡି କରାଯିବ ବୋଲି ଏସପି ଶର୍ବଣା ବିବେକ୍ ଏମ୍ କହିଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
