ପୁରୀ: ଦୃଷ୍ଟିହୀନ ବାପାମାଆଙ୍କୁ କାନ୍ଧରେ ବୋହି ପୁଅ ଶ୍ରବଣ କୁମାରଙ୍କ ତୀର୍ଥ ଦର୍ଶନ ସମ୍ପର୍କରେ ଆପଣ ଜାଣନ୍ତି । ତେବେ ଆଜିର ଆଧୁନିକ ଯୁଗରେ ମଧ୍ୟ ଏପରି ଶ୍ରବଣ କୁମାର ରହିଛନ୍ତି । ଏପରି ଏକ ଘଟଣା ବଡଦାଣ୍ଡରେ ଦେଖିବାକୁ ମିଳିଛି । ମା'ର ଶେଷ ଇଚ୍ଛା ପୂରଣ କରିବା ଲାଗି ବୋଝରେ ବୋହି ଜଗା ଦ୍ବାରରେ ପହଞ୍ଚିଛନ୍ତି । ଏବେର ଯୁଗର କିଛି ପୁଅ ନିଜ ପିତାମାତାଙ୍କୁ ପଚାରୁନଥିବା ବେଳେ ଏପଟେ ଏପରି ପୁଅକୁ ଦେଖି ସମସ୍ତେ କରିଛନ୍ତି ବାଃ ବାଃ ।
ଶ୍ରୀମନ୍ଦିର ସିଂହଦ୍ଵାର ନିକଟରେ ରବିବାର ଦେଖିବାକୁ ମିଳିଛି ଏଭଳି କିଛି ଭାବବିହ୍ବଳ ଦୃଶ୍ୟ । କଟକ ପାଟସୁନ୍ଦରପୁର ଅଞ୍ଚଳର ବୃଦ୍ଧା ସାରଦା ବେହେରାଙ୍କୁ ତାଙ୍କ ପୁଅ ବୋଝରେ ବୋହି ଆଣି ଆଜି ମହାପ୍ରଭୁଙ୍କ ଦର୍ଶନ କରାଇଛନ୍ତି । ମା'ର ଶେଷ ଇଛା ପୂରଣ କରି ସେ ନିଜକୁ ବେଶ ଭାଗ୍ୟବାନ ମନେ କରିଛନ୍ତି । ବୟସର ଅପରାହ୍ନରେ ପହଞ୍ଚିଥିବା ସାରଦା ମହାପ୍ରଭୁଙ୍କ ଟିକେ ଦର୍ଶନ ପାଇଁ ନିଜ ପୁଅକୁ କହିଥିଲେ । ତେବେ କାଳିଆର ଡୋରି ଆଜି ତାଙ୍କୁ ପୁରୀ ଟାଣି ଆଣିଥିଲା । ସବୁ କଷ୍ଟ ଭୁଲି ମା'ଙ୍କୁ ବୋଝରେ ବୋହି ସିଂହଦ୍ଵାର ପାଖକୁ ଆଣିଥିଲେ ପୁଅ ।
ଏହା ବି ପଢନ୍ତୁ- ସତ୍ୟବାଦୀରେ ଆବାସ ଯୋଜନାରେ କେଳେଙ୍କାରୀ ! ତଦନ୍ତ ପାଇଁ ଜିଲ୍ଲାପାଳଙ୍କୁ ଦାବିପତ୍ର
ସେଠାରେ ଥିବା ଶ୍ରୀମନ୍ଦିର ସୁବେଦାର ମଧ୍ୟ ତାଙ୍କୁ ସାହାଯ୍ୟ କରିଥିଲେ । ଶ୍ରୀମନ୍ଦିର ସୁବେଦାର ଯୋଗେଶ ସ୍ବାଇଁ ନିଜେ କାନ୍ଧ ଲଗାଇ ବୋଝ ସାହାଯ୍ୟରେ ବୃଦ୍ଧା ମା'ଙ୍କୁ ସିଂହଦ୍ଵାର ପାଖକୁ ନେଇ ଯାଇଥିଲେ । ସେଠାରେ ଉପସ୍ଥିତ ଥିବା ଶ୍ରୀମନ୍ଦିର କର୍ମଚାରୀମାନେ ବୃଦ୍ଧା ମା'ଙ୍କୁ ମହାପ୍ରଭୁଙ୍କ ଦର୍ଶନ ପାଇଁ ଶ୍ରୀମନ୍ଦିର ଭିତରକୁ ନେଇଥିଲେ । ଜଗା ଦର୍ଶନ କରି ଜୀବନର ସବୁ ଅଭିଳାଷ ପୂର୍ଣ୍ଣ ହୋଇଗଲା ବୋଲି ସାରଦା କହିଛନ୍ତି । ତେବେ ବୃଦ୍ଧା ସାରଦାଙ୍କୁ ତାଙ୍କ ପୁଅ ଏଭଳି ବୋଝରେ ବୋହି ଆଣୁଥିବା ବେଳେ ଶ୍ରୀମନ୍ଦିର ଦର୍ଶନରେ ଆସୁଥିବା ଭକ୍ତମାନେ ଶ୍ରବଣ କୁମାରଙ୍କ କଥା ମନେ ପକାଇଥିଲେ ।
ଇଟିଭି ଭାରତ, ପୁରୀ
