ପୁରୀ : ବେଳାଭୂମିରୁ ଅଜଣା ଯୁବତୀଙ୍କ ମୃତଦେହ ଉଦ୍ଧାର। ପୁରୀ-କୋଣାର୍କ ମେରାଇନ୍ ଡ୍ରାଇଭ ରୋଡ ସ୍ଥିତ ବାଲିଗୁଆଳି ବେଳାଭୂମିରୁ ସନ୍ଦେହଜନକ ଅବସ୍ଥାରେ ଜଣେ ଅଜଣା ଯୁବତୀଙ୍କ ମୃତଦେହକୁ ଉଦ୍ଧାର କରାଯାଇଛି। ଖବରପାଇ ମେରାଇନ୍ ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା। ସେଠାରେ ପାରିପାର୍ଶ୍ବିକ ସ୍ଥିତି ତଦନ୍ତ କରିବାସହ ଉପସ୍ଥିତ ଲୋକଙ୍କୁ ପଚରାଉଚୁରା କରିଛି । ହେଲେ ଏପର୍ଯ୍ୟନ୍ତ ମୃତ ଯୁବତୀଙ୍କ ପରିଚୟ ମିଳିପାରି ନାହିଁ ।
ମୃତ ଯୁବତୀ ଜଣକ ମୁହଁ ମାଡି ବେଳାଭୂମି କୂଳରେ ପଡିଥିବା ଦେଖିବାକୁ ମିଳୁଛି। ତେବେ ଯୁବତୀ ଜଣକ ସମୁଦ୍ରରେ ଭାସିଯାଇ ମୃତ୍ୟୁବରଣ କରିଛନ୍ତି ନା ତାଙ୍କୁ କେହି ହତ୍ୟା କରି ଫିଙ୍ଗି ଦେଇଛି ସେନେଇ ସନ୍ଦେହ ସୃଷ୍ଟି ହୋଇଛି। ସେପଟେ ଗତ ୨୪ ତାରିଖରେ ପୁରୀ ଚକ୍ରତୀର୍ଥ ରୋଡ ସ୍ଥିତ ହୋଟେଲ ଶାନ୍ତି ପ୍ୟାଲେସରୁ ମଧ୍ୟପ୍ରଦେଶ ସାଗର ଗ୍ରାମର ଜଣେ ୧୮ ବର୍ଷୀୟା ଅଣ ଓଡିଆ ଯୁବତୀ ନିଖୋଜ ହୋଇଥିଲେ।
ଏନେଇ ସମୁଦ୍ରକୂଳ ଥାନାରେ ନିଖୋଜ ଯୁବତୀଙ୍କ ପରିବାର ଲୋକେ ଅଭିଯୋଗ କରିଥିଲେ । ଅଭିଯୋଗକୁ ଆଧାର କରି ପୋଲିସ ପକ୍ଷରୁ ତଦନ୍ତ ଚାଲିଥିବା ବେଳେ ଏପର୍ଯ୍ୟନ୍ତ ଯୁବତୀର କୌଣସି ପତ୍ତା ମିଳିନାହିଁ । ଗତ ୨୩ ତାରିଖ ସକାଳ ୫ଟା ୪୨ ମିନିଟରେ ଯୁବତୀ ଜଣକ ପରିବାର ଲୋକଙ୍କୁ କିଛି ନକହି ହୋଟେଲ ରୁମରୁ ବାହାରୁଥିବା ସମୟର ଭିଡିଓ ସିସିଟିଭିରେ କଏଦ ହୋଇଥିଲା ।
ଏହାପରେ ଯୁବତୀ ଜଣକ ନିଖୋଜ ହୋଇଯାଇଥିଲେ। ତେବେ ଇଏ ସେହି ଯୁବତୀ କି ଅନ୍ୟକାହାର ମୃତଦେହ ତାହା ତଦନ୍ତ ପରେ ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ ସୂଚନା ମିଳିଛି ।
ଇଟିଭି ଭାରତ, ପୁରୀ
