ପୁରୀ: ଜଗନ୍ନାଥ ମନ୍ଦିର ଉପରେ ବିବାଦୀୟ ଟିପ୍ପଣୀ ଦେଇଥିବା ହାଇଦ୍ରାବାଦର ସାଂସଦ ଅସଦୁଦ୍ଦିନ ଓବେସୀଙ୍କ ବିରୋଧରେ ବିକ୍ଷୋଭ କରାଯିବା ସହ ଗିରଫ ଦାବି ହୋଇଛି । ପୁରୀରେ ଯୁବ ଅଧିବକ୍ତା ସଙ୍ଘ, ଶ୍ରୀଜଗନ୍ନାଥ ସେନା ପକ୍ଷରୁ ଆଜି (ସୋମବାର) ସିଂହଦ୍ବାର ଥାନା ଆଗରେ ଓବେସୀଙ୍କୁ ବିରୋଧ କରାଯିବା ସହ ତାଙ୍କୁ ତୁରନ୍ତ ପୋଲିସ ଗିରଫ କରିବା ଦାବିରେ ଥାନାରେ ଏତଲା ଦିଆଯାଇଛି ।
ହାଇଦ୍ରାବାଦର ସଂସଦ ଓବେସୀଙ୍କ ଏକ ଭିଡ଼ିଓ ସୋସିଆଲ ମିଡିଆରେ ଭାଇରଲ ହେଉଛି । ଯେଉଁ ଭିଡ଼ିଓରେ ଓବେସି କହିଛନ୍ତି, ପୁରୀର ଜଗନ୍ନାଥ ମନ୍ଦିର ଏକ ବୌଦ୍ଧ ଧର୍ମର ସ୍ତୁପ ଉପରେ ନିର୍ମିତ ହୋଇଛି । ଏହି ବିବାଦୀୟ ମନ୍ତବ୍ୟକୁ ପୁରୀର ବିଭିନ୍ନ ସଂଗଠନ ବିରୋଧ କରିଛନ୍ତି । ଶ୍ରୀଜଗନ୍ନାଥ ମନ୍ଦିର ଉପରେ କୌଣସି ଜ୍ଞାନ ନଥିବା ତଥା ଉପଯୁକ୍ତ ତଥ୍ୟ ନଦେଇ ଯେଭଳି ଓବେସୀ ଜଗନ୍ନାଥ ମନ୍ଦିର ନିର୍ମାଣ ଉପରେ ବିବାଦୀୟ ଟିପ୍ପଣୀ ରଖିଛନ୍ତି, ତାହା କୋଟି କୋଟି ଜଗନ୍ନାଥପ୍ରେମୀଙ୍କୁ ଆଘାତ ଦେଇଛି ।
ଓବେସିଙ୍କ ଦାୟିତ୍ବହୀନ ମନ୍ତବ୍ୟ ଦେଶରେ ବିଭିନ୍ନ ଧର୍ମ ଭିତରେ ଉତ୍ତେଜନା ସୃଷ୍ଟି କରିବ । ଜଣେ ସାଂସଦ ହୋଇ ଉପଯୁକ୍ତ ତଥ୍ୟ ନଦେଇ ଯେଭଳି ସାମ୍ପ୍ରଦାୟିକ ଦଙ୍ଗା ସୃଷ୍ଟି କରିବା ପାଇଁ ଉଦ୍ୟମ କରିଛନ୍ତି, ତାହା ଅତ୍ୟନ୍ତ ବିପଦଜନକ । ତୁରନ୍ତ ଓଡିଶା ପୋଲିସ ହାଇଦ୍ରାବାଦ ସାଂସଦ ଅସଦୁଦ୍ଦିନ ଓବେସୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେଇ ଗିରଫ ନକଲେ ଅଗାମୀ ଦିନ ଜଗନ୍ନାଥ ପ୍ରେମୀ ରାଜରାସ୍ତାକୁ ଆସି ବିରାଟ ଆନ୍ଦୋଳନ କରିବେ ବୋଲି ଚେତାବନୀ ଦେଇଛି ସଂଗଠନ ।
ଇଟିଭି ଭାରତ, ପୁରୀ
