ପୁରୀ: ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଜୁଭେନାଇଲ ଜଷ୍ଟିସ ବୋର୍ଡ଼ର କାର୍ଯ୍ୟଳୟ ପବିତ୍ର ଶ୍ରୀପଞ୍ଚମୀରେ ଉଦଘାଟିତ ହୋଇଛି । ଏହି କାର୍ଯ୍ୟାଳୟରେ ପୁରୀ ସହର ସମେତ ଜିଲ୍ଲାର ୧୧ଟି ବ୍ଲକର ଜୁଭେନାଇଲ ସମସ୍ୟା ଏଠାରେ ସମାଧାନ କରାଯିବ ବୋଲି ଜଣାପଡିଛି ।
ବିଶେଷ କରି ବିଭିନ୍ନ ଥାନାକୁ ବିଭିନ୍ନ ସମୟରେ ଆସୁଥିବା ୧୮ବର୍ଷରୁ କମ ଅପରାଧିକ କାର୍ଯ୍ୟକଳାପ ସମ୍ପୃକ୍ତ ନାବାଳକ ଓ ନାବାଳିକାଙ୍କୁ ଏହି କାର୍ଯ୍ୟାଳୟରେ ଉପସ୍ଥିତ କରାଯିବ। ଏଥିସହ ସେମାନଙ୍କୁ ସାମାଜିକ ମୁଖସ୍ରୋତରେ ସାମିଲ କରିବା ପାଇଁ ଉଦ୍ୟମ କରାଯିବ। ସେହିପରି ବିଭିନ୍ନ ସମୟରେ ଆସୁଥିବା ନାବାଳକ ଓ ନାବାଳିକା ଶୋଷଣ ଓ ନିର୍ଯାତନା ମାମଲା କିଭଳି ନହେବ ଓ ଏଭଳି ଅଭିଯୋଗ ଆସିଲେ କ'ଣ କାର୍ଯ୍ୟାନୁଷ୍ଠାନ ନିଆଯାଇପାରିବ ସେ ନେଇ ଏହି ଶିଶୁ ସୁଲଭ ଜିଲ୍ଲା କାର୍ଯ୍ୟାଳୟ କାର୍ଯ୍ୟ କରିବ।
ଏଥିପାଇଁ ନିୟମିତ ବ୍ୟବଧାନରେ ପୋଲିସ କର୍ମଚାରୀ ଓ ଅଧିକାରୀଙ୍କୁ ପ୍ରଶିକ୍ଷଣ ଦିଆଯିବା ସହ ସଚେତନ ମଧ୍ୟ କରାଯିବ। ଏହି କାର୍ଯ୍ୟାଳୟକୁ ଜିଲ୍ଲା ଦୌରାଜଜ୍ ବିଦ୍ୟୁତ କୁମାର ମିଶ୍ର,ଏସପି କେ.ଵିଶାଲ ସିଂ, ଅତିରିକ୍ତ ଜିଲ୍ଲାପାଳ ପ୍ରଦୀପ କୁମାର ସାହୁ ଯୋଗ ଦେଇ ଉଦଘାଟନ କରିଥିଲେ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
