ଭୁବନେଶ୍ବର: ବହୁଚର୍ଚ୍ଚିତ ବ୍ରହ୍ମଗିରି ସାନବନ୍ଧକେରାର ଚିତ୍ତରଞ୍ଜନ ପଲେଇ (Chittaranjan Palei Murder) ମୃତ୍ୟୁ ଘଟଣାରେ ତୁରନ୍ତ ନ୍ୟାୟ ପ୍ରଦାନ ପାଇଁ ଜାତୀୟ ମାନବାଧିକାର କମିଶନ (NHRC)ରେ ଏକ ମାମଲା ରୁଜୁ ହୋଇଛି । ତୁରନ୍ତ ପରିବାରକୁ ନ୍ୟାୟ ପ୍ରଦାନ ପାଇଁ ନିବେଦନ କରାଯାଇଛି । ଜଗତସିଂହପୁର ଜିଲ୍ଲା ଭାରତୀୟ ବିକାଶ ପରିଷଦର ସଭାପତି ସୁବ୍ରତ ଦାସ ଏହି ନିବେଦନ କରିଛନ୍ତି ।
ସୂଚନା ଅନୁଯାୟୀ, ପୁରୀଜିଲ୍ଲା ବ୍ରହ୍ମଗିରି ସାନବନ୍ଧକେରା ଗ୍ରାମର ଚିତ୍ତରଞ୍ଜନ ପଳେଇ ଭୋଜି କରିବାକୁ ଯାଇ ନିଖୋଜ ହୋଇଯାଇଥିଲେ। ଏହାପରେ ଗତ ୧୧ ତାରିଖ ଦିନ ଚିତ୍ତରଞ୍ଜନଙ୍କର ସନ୍ଦେହ ଜନକ ଭାବରେ ମୃତଦେହ ମିଳିଥିଲା । ଚିତ୍ତରଞ୍ଜନ ପଲେଇ ବରିଷ୍ଠ ବିଜେଡି ନେତା ଓ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ତଥା ବ୍ରହ୍ମଗିରିର ପୂର୍ବତନ ବିଧାୟକ ସଞ୍ଜୟ ଦାଶବର୍ମାଙ୍କ ପିଏ ଭାବେ କାମ କରି ଆସୁଥିଲେ ।
ଏହାମଧ୍ୟ ପଢନ୍ତୁ: Chittaranjan Murder Case: ମୃତଦେହ ମିଳିଥିବା ସ୍ଥାନ ପରିଦର୍ଶନ କଲେ କ୍ରାଇମବ୍ରାଞ୍ଚ ADG
ଚିତ୍ତରଞ୍ଜନଙ୍କ ମୋବାଇଲ, ଗାଡି, ଚପଲ ପୁରୀ ସଦର ଥାନା ଗଡ଼ ମୃଗଶିରା ବ୍ରିଜ ନିକଟରୁ ମିଳିଥିଲା । କିଛି ଦୂରରେ ପୁରୀ ଭାର୍ଗବୀ ନଦୀ କୂଳରେ ଚିତ୍ତରଞ୍ଜନଙ୍କ ମୃତଦେହ ମିଳିଥିଲା । ଏ ବାବଦରେ ଚିତ୍ତରଞ୍ଜନଙ୍କ ପରିବାର ପୁରୀ ସଦର ଥାନାରେ ଏତଲା ଦେଇଥିଲେ। ତେବେ ଏହି ଘଟଣାର କମିଶନ ତୁରନ୍ତ ହସ୍ତକ୍ଷେପ କରି ଚିତ୍ତରଞ୍ଜନ ପଲେଇଙ୍କ ହତ୍ୟାକାଣ୍ଡରେ ନ୍ୟାୟ ପ୍ରଦାନ କରିବାକୁ ଅନୁରୋଧ କରାଯାଇଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
