ପୁରୀ: ମହାପ୍ରଭୁଙ୍କୁ ଦର୍ଶନ ପାଇଁ ପୁରୀରେ ପହଞ୍ଚିଲେ ବିଶିଷ୍ଟ ଶିଳ୍ପପତି ମୁକେଶ ଅମ୍ବାନୀଙ୍କ ପୁଅ ଅନନ୍ତ ଅମ୍ବାନୀ । ନିଜ ବାହାଘର ପୂର୍ବରୁ ମହାପ୍ରଭୁଙ୍କ ଆଶୀର୍ବାଦ ନେବା ପାଇଁ ସେ ପୁରୀ ପହଞ୍ଚିଛନ୍ତି। ପ୍ରଥମେ ଅନନ୍ତ ବଡ଼ଦାଣ୍ଡରେ ପହଞ୍ଚିବା ପରେ ଶ୍ରୀମନ୍ଦିର ପରିଚାଳନା କମଟି ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ତାଙ୍କୁ ସ୍ଵାଗତ କରାଯାଇଛି । ଏହା ପରେ ଅନନ୍ତ ଶ୍ରୀମନ୍ଦିର ଭିତରକୁ ଯାଇ ମହାପ୍ରଭୁଙ୍କୁ ଦର୍ଶନ କରିଛନ୍ତି ।
ଅନନ୍ତ ଶ୍ରୀମନ୍ଦିର ଭିତରକୁ ଯାଇଥିଲେ । ପୂର୍ବରୁ ଅରୁଣ ସ୍ତମ୍ଭ, ପ୍ରଭୁ ପତିତପାବନଙ୍କୁ ପ୍ରଣାମ କରି ବାଇଶି ପାହାଚ ଦେଇ ଶ୍ରୀମନ୍ଦିର ପ୍ରବେଶ କରିଥିଲେ । ପରେ ଶ୍ରୀମନ୍ଦିର ଭିତରେ ବିଭିନ୍ନ ଦେବାଦେବୀ ମନ୍ଦିର ଯାଇ ପୂଜାର୍ଚ୍ଚନା କରିଛନ୍ତି । ସେପଟେ ଅନନ୍ତ ଅମ୍ବାନୀଙ୍କ ଗସ୍ତ ପାଇଁ ପୁରୀ ପୋଲିସ ପକ୍ଷରୁ କଡ଼ା ନିରାପତ୍ତା ବ୍ୟବସ୍ଥା ଗ୍ରହଣ ହୋଇଛି । ଅନନ୍ତଙ୍କୁ ଦେଖିବା ପାଇଁ ପୁରୀବାସୀ ଓ ଏଠାରେ ଥିବା ପର୍ଯ୍ୟଟକଙ୍କ ଭିତରେ ବେଶ ଉତ୍ସାହ ଦେଖିବାକୁ ମିଳିଥିଲା ।
ଅନନ୍ତଙ୍କ ଗସ୍ତକୁ ନେଇ ଶ୍ରୀମନ୍ଦିର ପରିଚାଳନା କମିଟିର ସଦସ୍ୟ ଜଗନ୍ନାଥ କର କହିଛନ୍ତି, "ଗର୍ଭଗୃହରେ ମହାପ୍ରଭୁଙ୍କ ଦର୍ଶନ ସାରି ଅନନ୍ତ ସିଧାସଳଖ ମୁକ୍ତିମଣ୍ଡପ ଯାଇ ମୁକ୍ତିମଣ୍ଡପ ବ୍ରାହ୍ମଣଙ୍କ ଆଶୀର୍ବାଦ ନେଇଥିଲେ। ପରେ ଦେବୀ ବିମଳା, ମା' ଲକ୍ଷ୍ମୀ ଓ କାନପତା ହନୁମାନ ଏବଂ ଅନ୍ୟାନ୍ୟ ପାର୍ଶ୍ଵ ଦେବଦେବୀଙ୍କ ମନ୍ଦିର ବୁଲି ଦର୍ଶନ ସହ ପୂଜାର୍ଚ୍ଚନା କରିଥିଲେ । ଏହି ଅବସରରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଅନନ୍ତ ଅମ୍ବାନୀଙ୍କୁ ଉପହାର ସ୍ବରୂପ ଖଣ୍ଡୁଆ ପାଟ, ଶ୍ରୀମନ୍ଦିର କ୍ୟାଲେଣ୍ଡର, ମହାପ୍ରଭୁଙ୍କ ମାହାର୍ଦ ସହ ରଥ କାଠ ତାଙ୍କୁ ବାଇଶି ପାହାଚରେ ଭେଟି ଦିଆଯାଇଥିଲା । ଏହାକୁ ଗ୍ରହଣ କରିବା ସମୟରେ ଖୁସିରେ ଭାବବିହ୍ବଳ ହୋଇଯାଇଥିଲେ ଅନନ୍ତ ।"
ଅନନ୍ତ ଅମ୍ବାନୀ ମଧ୍ୟ ସେବକ ଓ ମହାପ୍ରଭୁଙ୍କ ଉଦ୍ଦେଶ୍ୟରେ ଅର୍ଥ ଦାନ କରିଥିଲେ । ଏହାପରେ ସେ ସିଧାସଳଖ ପୁରୀରୁ ପ୍ରତ୍ୟାବର୍ତ୍ତନ କରିଥିଲେ। ଅନନ୍ତ ଅମ୍ବାନୀଙ୍କ ଗସ୍ତକୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ସୂଚନା ଥାଉ କି ଗତ ୧୯ ତାରିଖରେ ଅନନ୍ତଙ୍କ ନିର୍ବନ୍ଧ ଶେଷ ହୋଇଛି । ବିବାହ ପୂର୍ବରୁ ସେ ଜଗା ଦର୍ଶନ ପାଇଁ ଓଡ଼ିଶା ଗସ୍ତ କରିଛନ୍ତି। ମଙ୍ଗଳବାର ଅପରାହ୍ନ ୨ଟାରୁ ୨.୩୦ଟା ମଧ୍ୟରେ ଭୁବନେଶ୍ଵର ବିମାନ ବିନ୍ଦରରେ ପହଞ୍ଚିଥିଲେ ଅନନ୍ତ । ଏଥିଲାଗି ବିମାନବନ୍ଦରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା । ଭୁବନେଶ୍ଵର ପହଞ୍ଚିଥିବା ପରେ ପୁରୀ ଆସି ମହାପ୍ରଭୁ ଜଗନ୍ନାଥଙ୍କ ଦର୍ଶନ କରିଛନ୍ତି । ଦର୍ଶନ ଶେଷ ହେବା ପରେ ସେ ଏଠାରୁ ଭୁବନେଶ୍ଵର ଫେରି ମୁମ୍ବାଇ ଫେରିଯିବେ ବୋଲି ସୂଚନା ମିଳିଛି ।
ବିବାହ ପୂର୍ବରୁ ମହାପ୍ରଭୁ ଜଗନ୍ନାଥଙ୍କ ଆଶିଷ ନେବାକୁ ଅନନ୍ତ ଓଡ଼ିଶା ଆସିଥିବା କୁହାଯାଉଛି । ଗତକାଲି ଗୁୱାହାଟୀର କାମାକ୍ଷା ପୀଠ ଯାଇ ଦର୍ଶନ କରିଥିଲେ ଅନନ୍ତ । ଗତ ୧୯ ତାରିଖରେ ଅନ୍ୟତମ ବିଶିଷ୍ଟ ଶିଳ୍ପପତି ବିରେନ ମର୍ଚ୍ଚାଣ୍ଟ ଓ ଶୈଲଙ୍କ ଝିଅ ରାଧିକା ମର୍ଚ୍ଚାଣ୍ଟଙ୍କ ସହିତ ନିର୍ବନ୍ଧ କରିଥିଲେ ଅନନ୍ତ । ଏଥିରେ ବହୁ ବଲିଉଡ କଳାକାରଙ୍କ ସମେତ ଉଭୟ ପରିବାରର ଘନିଷ୍ଠ ବନ୍ଧୁ ଓ ସମ୍ପର୍କୀୟ ସାମିଲ ହୋଇଥିଲେ । ଏହି ଭବ୍ୟ ଉତ୍ସବ ମୁକେଶ ଅମ୍ବାନୀଙ୍କ ମୁମ୍ବାଇ ସ୍ଥିତ ଆଣ୍ଟିଲା ବାସଭବନରେ ଆୟୋଜିତ ହୋଇଥିଲା । ଏହି ଉତ୍ସବରେ ନୀତା ଅମ୍ବାନୀଙ୍କ ନେତୃତ୍ବରେ ପୁରା ପରିବାର ବଲିଉଡ଼ ଗୀତରେ ଡ୍ୟାନ୍ସ କରି ବୋହୂ ହେବାକୁ ଯାଉଥିବା ରାଧିକାଙ୍କୁ ସ୍ବାଗତ କରିଥିଲେ ।
ଇଟିଭି ଭାରତ, ପୁରୀ
