ନୂଆପଡା: ଶିକ୍ଷକଙ୍କୁ ବଦଳି ଦାବିରେ ବିଦ୍ୟାଳୟର ଗେଟରେ ତାଲା ପକାଇଲେ ଛାତ୍ରଛାତ୍ରୀ ଓ ଅବିଭାବକ । ନୂଆପଡା ଜିଲ୍ଲା ବୋଡେ଼ନ ବ୍ଲକ ଡମଝର ଉଚ୍ଚ ପ୍ରାଥମିକ ବିଦ୍ୟାଳୟର ମୁଖ୍ୟ ଫାଟକରେ ତାଲା ପକାଇଛନ୍ତି ଛାତ୍ରଛାତ୍ରୀ । ବିଦ୍ୟାଳୟର ସହକାରୀ ଶିକ୍ଷକ ସୁରେଶ କୁମାର ଦୀପଙ୍କୁ ଅନ୍ୟତ୍ର ବଦଳି ଦାବିରେ ତୀବ୍ର ହେଲା ଆନ୍ଦୋଳନ । ବିଦ୍ୟାଳୟର ସହକାରୀ ଶିକ୍ଷକ ସୁରେଶ କୁମାର ଦୀପ ବିଦ୍ୟାଳୟକୁ ନିୟମିତ ଆସୁନଥିବାରୁ ଛାତ୍ରଛାତ୍ରୀଙ୍କ ଗଣିତ ପାଠ ପଢ଼ାରେ ବ୍ୟାଘାତ ସୃଷ୍ଟି ହେଉଛି ।
ଏଥିସହ ଶିକ୍ଷକ ଜଣଙ୍କ ଛାତ୍ରୀଙ୍କୁ ଅସଦାଚଣ କରୁଥିବା ଭଳି ସଙ୍ଗୀନ ଅଭିଯୋଗ ହୋଇଛି । ଫଳରେ ଏଭଳି ଶିକ୍ଷକଙ୍କୁ ଗାଁ ସ୍କୁଲରେ ପୁରାଇ ନଦେବାକୁ ଚେତାବନୀ ଦେଇଛନ୍ତି ଅବିଭାବକ ଓ ସରପଞ୍ଚ । ଏ ଘଟଣା ସମ୍ପର୍କରେ ଉଚ୍ଚ ସ୍ତରୀୟ ଅଧିକାରୀଙ୍କୁ ଗାଁ ଲୋକେ ଅଭିଯୋଗ କରିଥିଲେ । ଅଭିଯୋଗକୁ ଭିର୍ତ୍ତିକରି ଶିକ୍ଷକ ସୁରେଶ କୁମାର ଦୀପଙ୍କୁ ଅନ୍ୟତ୍ର ବଦଳି ମଧ୍ୟ ହୋଇଥିଲା । କିନ୍ତୁ ବଦଳି ଅଡରକୁ ବାତିଲ କରି ପୁଣି ଡମଝର ଉଚ୍ଚ ପ୍ରାଥମିକ ବିଦ୍ୟାଳୟକୁ ସହକାରୀ ଶିକ୍ଷକ ରୂପେ ଯୋଗଦାନ କରି ଆସିଥିବାବେଳେ ଗାଁରେ ଉତ୍ତେଜନା ସୃଷ୍ଟି ହୋଇଛି ।
ଏନେଇ ଅଷ୍ଟମ ଶ୍ରେଣୀର ଜଣେ ଛାତ୍ରୀ କହିଛନ୍ତି, ''ଶିକ୍ଷକ ସୁରେଶ କୁମାର ଦୀପ ବିଦ୍ୟାଳୟରେ ପାଠ ନପଡାଇବା ସହ ଆମକୁ ଦୁର୍ବ୍ୟବହାର କରୁଛନ୍ତି । ତେଣୁ ଆମେ ଚାହୁଁଛି ଶିକ୍ଷକଙ୍କ ବଦଳି କରାଯାଉ ।'' ଏନେଇ ଜଣେ ଅଭିଭାବକ କହିଛନ୍ତି, ''ବିଦ୍ୟାଳୟରେ ଶିକ୍ଷକ ସୁରେଶ କୁମାର ଦୀପ ଭଲରେ ପାଠ ପଢାଉ ନାହାନ୍ତି, ଅନେକ ସମୟରେ ଛାତ୍ରୀଙ୍କୁ ଖରାପ ନଜରରେ ଦେଖୁଛନ୍ତି'' ।
ନୂଆପଡା, ଇଟିଭି ଭାରତ
