ଅନୁଗୋଳ: ସାତକୋଶିଆ ଗଣ୍ଡ ଉପରେ ଉଡିଲା ଅଜଣା ହେଲିକପ୍ଟର । ଯେଉଁଠି ଡଙ୍ଗା ଚାଲିବା ନେଇ କଟକଣା ରହିଛି ସେଠାରେ ଉଡ଼ିଛି ହେଲିକପ୍ଟର । ନିଷିଦ୍ଧାଞ୍ଚଳ ସତ୍ତ୍ୱେ କିଏ ଓ କାହିଁକି ଗଣ୍ଡ ଉପରେ ହେଲିକପ୍ଟର ଉଡାଇଲା ତାହା ପ୍ରଶ୍ନବାଚୀ ସୃଷ୍ଟି କରିଛି । ଯାହାକି ବନ୍ୟପ୍ରାଣୀ ସଂରକ୍ଷଣ ନିୟମକୁ ଅବମାନନା କରୁଛି । ଏନେଇ ଏୟାର ଟ୍ରାଫିକ କଣ୍ଟ୍ରୋଲରଙ୍କୁ ତଥ୍ୟ ମାଗିଛି ବନ ବିଭାଗ ।
ସାତକୋଶିଆରେ ଉଡିଲା ହେଲିକପ୍ଟର:
ହେଲିକପ୍ଟରଟି ଗଣ୍ଡର ତଳ ଅବବାହିକା ଦିଗରୁ ଆଠମଲ୍ଲିକ ପାର୍ଶ୍ଵକୁ ଉଡାଣ କରିଥିଲା । ମାତ୍ର ୫୦ରୁ ୬୦ ଫୁଟ ଉଚ୍ଚରେ ଗଣ୍ଡ ଉପର ଦେଇ ଉକ୍ତ ହେଲିକପ୍ଟରଟି ଉଡୁଥିବା କିଛି ପ୍ରତ୍ୟକ୍ଷଦର୍ଶୀ କହିଛନ୍ତି । ଭୀଷଣ ଗର୍ଜନ ସହ ବତାସ ଭଳି ପବନ କରି ହେଲିକପ୍ଟରଟି ଉଡୁଥିବା ଦେଖାଯାଇଥିଲା । ଗଣ୍ଡ ଉପରେ ୩ଶହ ଫୁଟ ତଳକୁ କୌଣସି ବିମାନ ଉଡାଇବା ଦଣ୍ଡନୀୟ ଅପରାଧ ହୋଇଥିବା ବେଳେ କିଏ ଓ କାହିଁକି ଏପରି ସାହସ କଲା ତାହା ସ୍ପଷ୍ଟ ହୋଇନାହିଁ।
ବନ ବିଭାଗ ତରଫରୁ ସିଭିଲ ଆଭିଏସନ ନିର୍ଦ୍ଦେଶକଙ୍କୁ ଚିଠି:
ସାତକୋଶିଆ ବ୍ୟାଘ୍ର ପ୍ରକଳ୍ପ ଉପରେ ଅଜଣା ହେଲିକେପ୍ଟର ଉଡିବା ପରେ ବନ ବିଭାଗ ତରଫରୁ ଆରମ୍ଭ ହୋଇ ଯାଇଛି ତନାଘନା। ଗତ ୧୩ ତାରିଖ ଅପରାହ୍ନରେ ହେଲିକପ୍ଟରଟି ସାତକୋଶିଆ ଗଣ୍ଡ ଉପରେ ଉଡିଥିଲା । ୧୪ ତାରିଖ ସକାଳେ ପୁଣି ସେହି ରାସ୍ତା ଦେଇ ଫେରିଥିଲା। ସ୍ଥାନୀୟ ଲୋକେ ଏଭଳି ଏକ ଅଜଣା ହେଲିକେପ୍ଟର ଦେଖି ଭୟଭୀତ ହୋଇ ପଡ଼ିଥିଲେ । ସେଠାରେ ଥିବା ବନ କର୍ମଚାରୀମାନେ ବିଭାଗୀୟ ଉଚ୍ଚ ଅଧିକାରୀଙ୍କୁ ଏନେଇ ସୂଚନା ଦେଇଥିଲେ । ତେବେ ହେଲିକପ୍ଟରଟି କାହାର, କେଉଁଠୁ ଆସିଥିଲା ଏବଂ କୁଆଡେ ଯାଉଥିଲା ତାହାର କୌଣସି ସୂଚନା ମିଳିପାରି ନାହିଁ। ବନ ବିଭାଗ ତରଫରୁ ସିଭିଲ ଆଭିଏସନ ନିର୍ଦ୍ଦେଶକଙ୍କୁ ଚିଠି ଯୋଗେ ସମସ୍ତ ତଥ୍ୟ ମଗା ଯାଇଛି । କାରଣ ସାତକୋଶିଆ ଗଣ୍ଡ ହେଉଛି ବ୍ୟାଘ୍ର ପ୍ରକଳ୍ପର କୋର ଏରିଆ । ଏହା ଉପରେ ଏକ ନିର୍ଦ୍ଦିଷ୍ଟ ଉଚ୍ଚତାରେ କୌଣସି ବିମାନ ଉଡାଇବା ବନ୍ୟପ୍ରାଣୀ ସୁରକ୍ଷା ଆଇନକୁ ଉଲ୍ଲଘଂନ କରୁଛି।
ଏହା ମଧ୍ୟ ପଢନ୍ତୁ-ସାତକୋଶିଆ ଗଣ୍ଡକୁ ଛଡ଼ାଗଲେ ୧୨ ଘଡ଼ିଆଳ, କାହିଁକି ବଢୁନି ବଂଶ ? - GHARIAL CROCODILES
ଏହା ମଧ୍ୟ ପଢନ୍ତୁ-ସତ୍ତା ଖୋଜୁଛି ସାତକୋଶିଆ, ଗଭୀର ଗଣ୍ଡ ଏବେ ବାଲିଚର - SATKOSIA GORGE
ଡଙ୍ଗା ଚଳାଇବା ସହ ମାଛ ମାରିବାକୁ କଟକଣା:
ମହାନଦୀର ସାତକୋଶିଆ ଗଣ୍ଡରେ ତିନୋଟି ବିଲୁପ୍ତପ୍ରାୟ ପ୍ରଜାତି ଯଥା ଘଡ଼ିଆଳ କୁମ୍ଭୀର, ଇଣ୍ଡିଆନ ସ୍କିମର (ପାଣିଚରା) ଓ ବ୍ଲାକବିଲଡ଼ଟନ ଆଦି ପକ୍ଷୀ ବାସ କରୁଛନ୍ତି। ପରିବେଶ ସମ୍ବେଦନଶୀଳ ଅଞ୍ଚଳ ହୋଇଥିବା ସହ ଏହାକୁ ମାନ୍ୟତା ମିଳିଛି । ବର୍ତ୍ତମାନ ଘଡ଼ିଆଳ କୁମ୍ଭୀର ରାମସାର ସାଇ ଇଟର ମା’ ସହ ଇଣ୍ଡିଆନ ସ୍କିମର ପକ୍ଷୀଙ୍କ ମିଳନ ଓ ଅଣ୍ଡା ଦେବା ସମୟ । ଏହି ସମୟରେ ଗଣ୍ଡ ଉପର ଦେଇ ହେଲିକପ୍ଟର ଉଡିବା ଫଳରେ ଉକ୍ତ ବିଲୁପ୍ତପ୍ରାୟ ପ୍ରଜାତି ଚଳଣି ଉପରେ ପ୍ରଭାବ ପକାଇବା ଆଶଙ୍କା କରାଯାଉଛି । ପରିବେଶ ସମ୍ବେଦନଶୀଳ ଅଞ୍ଚଳ ହେବା କାରଣରୁ ନଦୀକୂଳରେ ବାସ କରୁଥିବା ଲୋକଙ୍କୁ ଡଙ୍ଗା ଚଳାଇବା ସହ ମାଛ ମାରିବାକୁ କଟକଣା ରହିଛି । ଅନେକ ସମୟରେ ସେମାନଙ୍କ ଡଙ୍ଗାକୁ ବନବିଭାଗ ଜବତ କରୁଛି । ସାଧାରଣ ଲୋକଙ୍କ ଜୀବନଜୀବିକା ଉପରେ ଆଇନର କଟକଣା ରହୁଥିବା ବେଳେ ଗଣ୍ଡର ମାତ୍ର ୫୦ ଫୁଟ ଉପରେ ହେଲିକପ୍ଟର ଉଡାଇବା ଘଟଣା ଉପରେ ବନବିଭାଗ କି ପଦକ୍ଷେପ ନେଇଛି ତାହା ସ୍ପଷ୍ଟ ହୋଇପାରିନାହିଁ ।
ସୂଚନାଯୋଗ୍ୟ ଯେ, ସାତକୋଶିଆ ଅଭୟାରଣ୍ୟ ମଧ୍ୟ ଦେଇ ମହାନଦୀ ଦୀର୍ଘ ପଥ ଅତିକ୍ରମ କରିଛି । ଆଠମଲ୍ଲିକର ବିନିକେଇରୁ ଆରମ୍ଭ ହୋଇ କଟକ ବଡ଼ମୂଳ ପର୍ଯ୍ୟନ୍ତ ସାତକୋଶିଆ ଗଣ୍ଡ ପରିବ୍ୟାପ୍ତ । ଗଣ୍ଡଟି ଅଭୟାରଣ୍ୟର କୋର ଅଞ୍ଚଳରେ ରହୁଥିବା ବେଳେ ଏହା ଉପରେ ଉଡାଣକୁ ନିଷିଦ୍ଧ କରାଯାଇଛି । ଅପରପକ୍ଷେ ଏହି ଘଟଣା ଉପରୁ ପରଦା ଉଠାଇବା ପାଇଁ ଭୁବନେଶ୍ୱର ସ୍ଥିତ ‘ଏୟାର ଟ୍ରାଫିକ କଣ୍ଟ୍ରୋଲର' ହେଲିକପ୍ଟରର ଉଡାଣ ନେଇ ପକ୍ଷ ରଖିବାକୁ ଦାବି ହୋଇଛି। ।
ଘଟଣା ନେଇ ମଧ୍ୟ ସ୍ପଷ୍ଟ କରିଛନ୍ତି ସାତକୋଶିଆ DFO ସରୋଜ କୁମାର ପଣ୍ଡା କହିଛନ୍ତି " ସାତକୋଶିଆ ଉପରେ ବିମାନ ଉଡି଼ବା ବନ୍ୟଜନ୍ତୁ ଆଇନ ବିରୋଧ । ସେ ତାଙ୍କ ବିଭାଗର କର୍ମଚାରୀ ଠାରୁ ସୂଚନା ପାଇବା ପରେ ତୁରନ୍ତ ଭୁବନେଶ୍ୱର ସ୍ଥିତ ‘ଏୟାର ଟ୍ରାଫିକ କଣ୍ଟ୍ରୋଲର' କୁ ହେଲିକପ୍ଟରର ଉଡାଣ ନେଇ ତଥ୍ୟ ମାଗାଯାଇଛି । ତଥ୍ୟ ମିଳିବା ପରେ ଯାହା ଆଇନ ରେ ବ୍ୟବସ୍ଥା ରହିଛି ସେ ଅନୁଯାୟୀ ପଦକ୍ଷେପ ନିଆଯିବ। ''
ଇଟିଭି ଭାରତ, ଅନୁଗୋଳ
