ନୂଆପଡା: ଦିନିକିଆ ନୂଆପଡା ଗସ୍ତରେ ଆସିଛନ୍ତି ରାଜ୍ୟ ବିଦ୍ୟାଳୟ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ । ଏହି ଅବସରରେ ସେ ଖଡିଆଳ ପଞ୍ଚାୟତ ସମିତି ସଭାଗୃହ ଠାରେ ଜିଲ୍ଲା ଶିକ୍ଷା ବିଭାଗର ସମୀକ୍ଷା ବୈଠକ କରିଛନ୍ତି ।
ଚଳିତ ମାସ ଫେବୃୟାରୀ 19 ତାରିଖରେ ହେବାକୁ ଥିବା ମାଟ୍ରିକ ବୋର୍ଡ ପରୀକ୍ଷା କିଭଳି ଭାବରେ ଶାନ୍ତି ଶୃଙ୍ଖଳା ଭାବରେ ପରିଚାଳିତ ହେବ ତାହା ଉପର ଗୁରୁତ୍ୱାରୋପ କରିଛନ୍ତି ମନ୍ତ୍ରୀ । ଏହାସହ ନୂଆପଡା ଜିଲ୍ଲା ପ୍ରଶାସନ କେତେ ସଚେତନ ସେ ନେଇ ଆଲୋଚନା କରିଛନ୍ତି ମନ୍ତ୍ରୀ ।
ଜିଲ୍ଲାର ବିଭିନ୍ନ ସମ୍ବେଦନଶୀଳ ପରୀକ୍ଷା ସେଣ୍ଟରରେ ସିସିଟିଭି ଲଗାଯିବ ବୋଲି ମନ୍ତ୍ରୀ କହିଛନ୍ତି। ସେହିଭଳି ବିଗତ ବର୍ଷରେ ଜିଲ୍ଲାର ବୋଡେନ ବ୍ଲକ କରଙ୍ଗାମାଲ, ଏବଂ ଲିଟିସର୍ଗି ପରୀକ୍ଷା କେନ୍ଦ୍ରରେ ପ୍ରଶ୍ନପତ୍ର ଲିକ ହୋଇଥିଲା । ଫଳରେ ଗୋଟିଏ ସେଣ୍ଟରକୁ ବନ୍ଦ କରିବା ସହ ଅନ୍ୟ ସେଣ୍ଟରରେ ସିସିଟିଭି ଲଗାଯିବ ବୋଲି ମନ୍ତ୍ରୀ ଜଣାଇଛନ୍ତି।
‘ମୋ ସ୍କୁଲ’ ଓ ରାମସା ଯୋଜନାକୁ ଗୁରୁତର ସହ ବିଭାଗ ନେଇଥିବା କହିଛନ୍ତି ଗଣଶିକ୍ଷା ମନ୍ତ୍ରୀ । ଓଡିଶା ଆଦର୍ଶ ବିଦ୍ୟାଳୟ ହଷ୍ଟେଲ ବ୍ୟବସ୍ଥା ଉପରେ ପୁଙ୍ଖାନୁପୁଙ୍ଖ ଭାବରେ ଆଲୋଚନା କରାଯାଇଛି । ଖୁବ ଶୀଘ୍ର ସମସ୍ୟାର ସମାଧାନ ହେବ । ଏହା ସହ ଶିକ୍ଷାର ସାମଗ୍ରିକ ବିକାଶ ଦିଗରେ ସରକାର ଗୁରୁତ୍ବ ଦେଉଛନ୍ତି । ଏହାପରେ ଖଡ଼ିଆଳ ବ୍ଲକ ଛକ ସ୍ଥିତ ଉତ୍କଳ ବନ୍ଧୁ ବିଦ୍ୟାଳୟକୁ ଯାଇ ମଧ୍ୟାନ୍ନ ଭୋଜନ ଖାଇବା ସହ ଖାଦ୍ୟର ମାନ ଠିକ ଥିବା କହିଛନ୍ତି ମନ୍ତ୍ରୀ ।
ଶିକ୍ଷା ବିଭାଗର ସମୀକ୍ଷା ବୈଠକରେ ନୂଆପଡା ଜିଲ୍ଲାପାଳ ମଧୁସ୍ମିତା ସାହୁ, ଜିଲ୍ଲା ଶିକ୍ଷା ଅଧିକାରୀ ଲକ୍ଷ୍ମଣ ଭୋଇ, ନୂଆପଡା ବିଧାୟକ ରାଜେନ୍ଦ୍ର ଢୋଲକିଆ, ଖଡିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ ସମେତ ଜିଲ୍ଲାସ୍ତରୀୟ ଅଧିକାରୀ ଉପସ୍ଥିତ ଥିଲେ ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
